26 Верасень, серада

Вы тут

Як фермер з Гродзенскага раёна забяспечвае збор малака ад насельніцтва


Аляксандр Зубрыцкі не толькі сам актыўна здае малако на прыёмны пункт, але і збірае яго ў жыхароў навакольных вёсак. Штодзень ён адвозіць на прыёмны пункт да 600 літраў.


— У нас 23 здатчыкі па калгасе, — расказвае Аляксандр Зубрыцкі, — я забіраю малако з самага ранку і вязу ў найбліжэйшы населены пункт — пасёлак Сапоцкін. Людзі задаволеныя, бо гэта выгадна, і малака здаём нямала.

Раней Аляксандр вазіў толькі сваю прадукцыю. Сям'я Зубрыцкіх з вёскі Рацічы трымае ажно 12 кароў і здае да 100 літраў у дзень. У мясцовым калгасе «Ніва-2003» прапанавалі аформіць яшчэ і збор малака ад насельніцтва. І вось ужо трэці год Аляксандр на сваім «бусе» штодзень курсіруе па вёсках, каб забраць лішкі малака ў іншых. І калгасу такі расклад выгадны, бо не трэба задзейнічаць транспартны сродак, кіроўцу і грузчыка, што для сельгаспрадпрыемства даволі дорага.

Для многіх вяскоўцаў магчымасць здаваць лішкі — адна з умоў утрымання статка. На гэтым можна нядрэнна зарабіць. Вынік ацэньваецца па тлушчы. Чым яго больш, тым і кошт вышэйшы. Напрыклад, за літр малака тлушчам не менш 3,6 % атрымліваецца 51 капейка. Разлік — кожныя дзесяць дзён. За месяц можна зарабіць адну, а то і дзве вясковыя зарплаты. На гэты прадукт зрабіў стаўку і фермер Аляксандр Зубрыцкі.

— Канешне, гэта добрая дапамога для сямейнага бюджэту, па сутнасці, мы з гэтага і жывём. Што атрымалі за малако, тое і маем, — кажа Аляксандр.

Першую кароўку сям'я набыла 11 гадоў таму. Аляксандр звольніўся са службы і задумаўся аб сваёй гаспадарцы. Да таго ж у сям'і падрасталі чатыры дачкі. А малако для дзяцей, як вядома, — асноўны прадукт харчавання. Калі першая карова ацялілася, купілі яшчэ адну. Паступова нарошчвалі статак, а некалькі гадоў таму ім выдзелілі 25 гектараў зямлі пад фермерскую гаспадарку.

— Справа ў тым, што не хапала кармоў. Участкі для выпасу не маглі забяспечыць патрэбу для такога статка, — растлумачыў Аляксандр. — Таму звярнуўся ў калгас, каб атрымаць зямлю для нарыхтоўкі кармоў і аформіў фермерскую гаспадарку.

Усе жывёлы, у адрозненне ад калгасных, пасуцца на пашы. Аляксандр свой статак утрымлівае ў памяшканні толькі ў халодны перыяд. Затое каровы не маюць праблем з капытамі, як большасць калгасных, а дояцца не менш за 10 гадоў. Гэта станоўча ўплывае на развіццё ўласнай гаспадаркі.

— На дамашнія малочныя прадукты ёсць попыт нават сярод вяскоўцаў, — кажа Аляксандр, — мы для сябе вырабляем і тварог, і масла, і смятану. Маглі б таксама прадаваць, але не паспяваем вырабляць такія аб'ёмы, бо ў саміх вялікая сям'я. Некаторыя жыхары трымаюць кароў толькі для сябе і прадаюць малако сваім суседзям.

На пачатак года ў Падлабенскім сельсавеце зарэгістравана 115 дойных жывёл. Гэта нямала. Згодна з чыпаваннем, колькасць дойнага статку не змяншаецца. Наадварот, некаторыя жыхары набылі цялят і збіраюцца іх гадаваць. За мінулы год насельніцтвам здадзена 21 тона малака ад 23 здатчыкаў.

Ці захаваецца такое становішча налета, Аляксандр сумняваецца. Ён паведаміў, што найбліжэйшы прыёмны пункт у пасёлку Сапоцкін можа быць закрыты ў сувязі з развіццём турыстычнай інфраструктуры, у прыватнасці, будаўніцтвам стаянкі веламаршруту. Тады прыйдзецца вазіць малако ў больш аддалены сельсавет, які знаходзіцца за 50 кіламетраў. Аляксандр лічыць, што ў спякоту вельмі складана забяспечыць на такой адлегласці якасць малака, яно можа падкіснуць. Такая сітуацыя непакоіць і гаспадароў, якія трымаюць некалькі кароў і прывыклі да ўстаноўленага парадку.

Мы спыталі, чаго чакаць вяскоўцам ад гэтай сітуацыі ў старшыні Сапоцкінскага пасялковага Савета Ліліі Шаматовіч, якая паведаміла, што прыёмны пункт закрывацца ні ў якім разе не будзе.

— У раёне распрацоўваецца праект па будаўніцтве веладарожкі і стаянкі. Праз Сапоцкін пралягае адзін з міжнародных веламаршрутаў, які павінен злучыць Гродна з Аўгустоўскім каналам. Але гэта ніякім чынам не паўплывае на здачу малака. Прыёмны пункт працуе ў асобным будынку, дзе раней быў сепаратарны цэх. Ніхто яго закрываць не збіраецца. Веламаршрут і стаянка не будуць ніякім чынам закранаць ні прыватныя ўчасткі, ні землі сельсавета. Малако тут будуць прымаць, як і прымалі.

Маргарыта УШКЕВІЧ

Фота Анатоля КЛЕШЧУКА

Загаловак у газеце: Вясковы бізнес

Дадаць каментар

Выбар рэдакцыі

Палітыка

Уладзімір Андрэйчанка расказаў пра найбольш значныя законапраекты

Уладзімір Андрэйчанка расказаў пра найбольш значныя законапраекты

 «Толькі агульнымі намаганнямі мы зможам супрацьстаяць няпростым выклікам часу».

Грамадства

Як у Беларусі абясшкоджваюць боепрыпасы

Як у Беларусі абясшкоджваюць боепрыпасы

​Колішняя Беларуская ваенная акруга лічылася адной з самых магутных у СССР.

Грамадства

Выхоўваць ці любіць? Шчырая размова з педагогам пра бацькоўскія страхі

Выхоўваць ці любіць? Шчырая размова з педагогам пра бацькоўскія страхі

«Калі ў вас адкрыўся рот, каб накрычаць на дзіця, спыніцеся хоць на секунду…» 

Грамадства

Чым здзівіў сёлета «Кліч Палесся»

Чым здзівіў сёлета «Кліч Палесся»

Этнафэст стаў вядомым далёка за межамі Беларусі.