26 Верасень, серада

Вы тут

Навядзенне парадку на зямлі патрабуе навуковых падыходаў


І выключае фармалізм.

Удзельнікі выязной калегіі Міністэрства прыродных рэсурсаў і аховы навакольнага асяроддзя на прыкладзе Лагойскага раёна абмеркавалі работу, што праводзіцца ў краіне па навядзенні парадку на зямлі.


Другасныя рэсурсы — задача № 1

Шмат пытанняў у розных рэгіёнах краіны сёння выклікае работа ў галіне абыходжання з адходамі. Паводле інфармацыі Мінпрыроды, за першае паўгоддзе 2018 года выяўлена 3788 фактаў размяшчэння адходаў у несанкцыянаваных месцах, да адміністрацыйнай адказнасці прыцягнута 987 вінаватых асоб, сума штрафаў склала 219 тысяч рублёў. Акрамя таго, спецыялісты зафіксавалі 1028 фактаў захавання другасных матэрыяльных рэсурсаў (ДМР) на палігонах і 1976 парушэнняў правілаў эксплуатацыі аб'ектаў захавання цвёрдых камунальных адходаў (ЦКА).

На Лагойшчыне таксама ёсць праблемы ў гэтай сферы. Як расказаў дырэктар РУП «Лагойскі камгас» Яўген Халімоненка, штогод у раёне ўтвараецца каля 12 тысяч тон адходаў. Іх захоўваюць на двух палігонах (у райцэнтры і ў Плешчаніцах), там жа знаходзяцца і нарыхтоўчыя пункты па зборы ДМР. Пры гэтым Лагойшчына моцна адстае ад большасці рэгіёнаў краіны па здабычы ДМР — толькі 6,3 % адходаў трапляюць на перапрацоўку.

Дарэчы, нізкія ўзроўні (6-10 %) выкарыстання ЦКА ёсць і ў іншых рэгіёнах — такая сітуацыя назіраецца ў 22 раёнах краіны, большасць з якіх знаходзіцца ў Мінскай вобласці.

— Гэта сведчыць пра фактычную адсутнасць работы камунальных гаспадарак у згаданым кірунку, — упэўнены міністр прыродных рэсурсаў і аховы навакольнага асяроддзя Андрэй Худык (на фота). — Неабходна вывучыць паспяховы вопыт другіх рэгіёнаў і пачаць прымяняць яго. Напрыклад, запушчаная ў канцы мінулага года ў Слонімскім раёне лінія па сартаванні ЦКА ўжо сёння дазваляе выкарыстоўваць 34 % адходаў.

Міністр таксама звярнуў увагу інспектараў па ахове навакольнага асяроддзя на неабходнасць павышэння эфектыўнасці кантрольнай дзейнасці.

Каб у рабоце па абыходжанні з адходамі выкарыстоўваць найлепшыя і самыя эфектыўныя тэхналогіі і метады, Мінпрыроды плануе сумесна з Мінжылкамгасам распрацаваць тэхнічны кодэкс устаноўленай практыкі «Правілы абыходжання з камунальнымі адходамі».

Ла­гой­шчы­на — адзін з са­мых праб­лем­ных рэ­гі­ё­наў Мін­скай воб­лас­ці  па рас­паў­сюдж­ван­ні бар­шчэў­ні­ку Са­сноў­ска­га.

Падлічыць агрэсара

Другое важнае пытанне, якое абмеркавалі падчас калегіі, — барацьба з баршчэўнікам Сасноўскага. Праблема засілля гэтай расліны актуальная не толькі для Беларусі, але і Расіі, Украіны і некаторых краін Еўрасаюза. Цалкам вынішчыць агрэсара, на думку міністра, немагчыма, але можна істотна знізіць плошчы, якія ён займае.

— Барацьба з распаўсюджваннем баршчэўніка Сасноўскага — справа не аднаго года, — упэўнены Андрэй Худык. — Насенне гэтай інвазіўнай расліны доўгі час захоўваецца ў глебе. З яго дапамогай, а таксама дзякуючы развітому кораню, на наступны год баршчэўнік зноў можа ўзысці. Каб сур'ёзна знізіць яго колькасць, патрэбна работа як мінімум трох-пяці гадоў.

У краіне налічваецца 1148 карыстальнікаў зямельных участкаў і водных аб'ектаў, у якіх выяўлена 4534 месцы росту баршчэўніку Сасноўскага. Агульная плошча «захопу» — 2924,1 га. Найбольш інвазіраванай застаецца Віцебская вобласць — на яе прыходзіцца 72,7 % ад агульнай плошчы, якую займае расліна. На другім месцы — Міншчына (12,5 %), пры гэтым каля 30 % усіх зараснікаў баршчэўніку вобласці знаходзіцца ў Лагойскім раёне.

Сёння з агрэсарам змагаюцца ўсімі даступнымі сродкамі (хімічнымі, механічнымі, камбінаванымі) і з удзелам зацікаўленых арганізацый — прадпрыемстваў меліярацыйных сістэм і сельскай гаспадаркі.

Як расказаў намеснік міністра прыродных рэсурсаў і аховы навакольнага асяроддзя Аляксандр Корбут, за першае паўгоддзе 2018 года праведзены ўсе запланаваныя мерапрыемствы па рэгуляванні колькасці баршчэўніку Сасноўскага. Выключэнне складае Віцебская вобласць, там выканана толькі 85 % ад задання.

Пры гэтым, па словах Андрэя Худыка, падчас інвентарызацыі часта выяўляецца, што рэальная плошча, якую сёння займае баршчэўнік, не адпавядае даным, пазначаным у мясцовых планах. Так, у Аршанскім раёне яна павялічылася ў шэсць разоў, у Чашніцкім — у сем і г. д.

Міністр упэўнены — каб убачыць рэальную карціну, у краіне неабходна правесці палявыя абследаванні для выяўлення новых месцаў росту баршчэўніку. Вынікі гэтай інвентарызацыі будуць адлюстраваны ў рэспубліканскім плане мерапрыемстваў па навядзенні парадку на зямлі на 2019 год. Акрамя таго, у наступным годзе Мінпрыроды плануе распрацаваць тэхнічны кодэкс устаноўленай практыкі, які вызначыць патрабаванні да правядзення работ па абмежаванні распаўсюджвання і колькасці інвазіўных раслін.

Вераніка КОЛАСАВА

Фота Вольгі ПРАЛЮК

Загаловак у газеце: Калі дакладнасць — залог эфектыўнасці

Дадаць каментар

Выбар рэдакцыі

Палітыка

Уладзімір Андрэйчанка расказаў пра найбольш значныя законапраекты

Уладзімір Андрэйчанка расказаў пра найбольш значныя законапраекты

 «Толькі агульнымі намаганнямі мы зможам супрацьстаяць няпростым выклікам часу».

Грамадства

Як у Беларусі абясшкоджваюць боепрыпасы

Як у Беларусі абясшкоджваюць боепрыпасы

​Колішняя Беларуская ваенная акруга лічылася адной з самых магутных у СССР.

Грамадства

Шчырая размова з вядомым педагогам пра бацькоўскія сумненні і страхі

Шчырая размова з вядомым педагогам пра бацькоўскія сумненні і страхі

«Калі ў вас адкрыўся рот, каб накрычаць на дзіця, спыніцеся хоць на секунду…» 

Грамадства

Чым здзівіў сёлета «Кліч Палесся»

Чым здзівіў сёлета «Кліч Палесся»

Этнафэст стаў вядомым далёка за межамі Беларусі.