23 Верасень, нядзеля

Вы тут

Будучыня — гэта мы!


Так сцвярджаюць залескія дзяўчаты, якія не баяцца браць на сябе адказнасць за ўласны лёс і будучыню сваёй малой радзімы.


Жнівень — месяц незвычайны, ён пераломны. У перакладзе з латыні аugustus — вялікасны, боскі. У шэрагу значных з'яў гадавога цыклу і жыцця чалавека менавіта на яго выпадаюць падзеі, што вызначаюць у далейшым наступствы прынятых рашэнняў. Для аграрыяў у апошні летні месяц відавочны вынікі земляробчай працы. Для маладых спецыялістаў гэта пачатак працоўнай дзейнасці па размеркаванні, а вось для актыву аграгарадка Залессе, што на Смаргоншчыне, — пачатак цікавай работы па новым праекце.

Няўрымслівая ініцыятарка грамадскіх пачынанняў, улюбёная ў сваю родную вёску з багатай гісторыка-культурнай спадчынай Ала Шыцікава сабрала самых актыўных маладых зямлячак, каб талакой зрабіць крокі па замацаванні моладзі ў гэтых слынных мясцінах. Дапамагчы ў карыснай справе павінен праект «Будучыня — гэта мы», што атрымаў фінансавую падтрымку як пераможца конкурсу міні-грантаў Асацыяцыі агенцтваў мясцовай дэмакратыі (АLDА) пры Савеце Еўропы.

У межах праекта будуць праведзены работы па добраўпарадкаванні гістарычных мясцін, што звязаны з памяццю пра Першую сусветную вайну, распрацаваны веламаршруты па гэтых аб'ектах, выдадзена брашура пра гісторыю Залесся, створаны зона адпачынку і валейбольная пляцоўка. А яшчэ моладзь пачала вывучаць вопыт работы мясцовых органаў кіравання і самакіравання дзеля таго, каб бачыць перспектывы і магчымасці свайго асабістага ўдзелу ў больш эфектыўнай дзейнасці мясцовых органаў улады.

У Залескім сельскім выканкаме з так званымі стажорамі сустракаліся і расказвалі пра структуру дзяржаўных органаў улады, фарміраванне іх сістэмы і арганізацыю работы старшыня раённага Савета дэпутатаў Іван Рамановіч і старшыня Залескага сельвыканкама Зянон Грышкевіч. Некаторыя ўдзельнікі праекта знаёміліся з пытаннямі, што датычацца кампетэнцыі сельвыканкама, а старшакласніцы мясцовай школы Ангеліна Кянько, Паліна Марыніна і супрацоўніца музея-сядзібы М. К. Агінскага Святлана Александровіч накіраваліся з Іванам Рамановічам у райцэнтр, а затым на сустрэчу з выбаршчыкамі ў Асінаўшчыну.

Надалей лідары моладзі будуць сустракацца са старастамі вёсак, браць удзел у рабоце дэпутацкага корпусу, прысутнічаць на пасяджэннях камісій, на сесіях і нават вынесуць на разгляд дэпутатаў сваю праграму замацавання моладзі ў сельскай мясцовасці.

Ала Шыцікава ўпэўнена, што ніхто, акрамя мясцовых жыхароў, не здолее спыніць працэс вымірання вёсак, адтоку з перыферыі маладых спецыялістаў. Таму бачыць сваю задачу ў абуджэнні мясцовай ініцыятывы на карысць малой радзімы.

Ала СТРАШЫНСКАЯ

Дадаць каментар

Выбар рэдакцыі

Грамадства

75 год таму пачалося вызваленне Беларусі

75 год таму пачалося вызваленне Беларусі

23 верасня 1943 года, савецкімі войскамі быў вызвалены ад нямецка-фашысцкіх захопнікаў першы населены пункт Беларусі — раённы цэнтр Камарын.

Грамадства

Каму і чым дапаможа ТЦСАН

Каму і чым дапаможа ТЦСАН

Ад дапамогі дома пажылым і да стварэння крызісных пакояў для ахвяр хатняга гвалту.

Грамадства

Маштабныя вучэнні прайшлі ў краіне

Маштабныя вучэнні прайшлі ў краіне

Актыўная фаза камандна-штабнога вучэння Узброеных Сіл прайшла ў Беларусі ў верасні.