Вы тут

Краязнаўцы рыхтуюцца да агляду


Падчас падрыхтоўкі да Дня беларускага пісьменства аддзяленням СПБ было прапанава ўключыць у склад дэлегацый пісьменнікаў, якія найбольш актыўна працуюць па тэме «Краязнаўства». «Калі больш дакладна, у тэме “Радзімазнаўства”, — заўважае першы намеснік старшыні СПБ Алена Стэльмах. — Адно з пытанняў на апошнім прэзідыуме СПБ якраз было прысвечана аналізу літаратуры гэтага напрамку. І вось у Іванаве адбудзецца своеасаблівы агляд творчых сіл, скіраваных да адвечных жыццёвых каштоўнасцей. Гэта сапраўды вельмі ёмісты пласт літаратуры, які ў Год малой радзімы набывае асабліва важкае гучанне».


Мабыць, няма таго пісьменніка, які б не звяртаўся да асабістага досведу ўспрымання рэчаснасці: не ўспамінаў пра свой род, Бацькаўшчыну, не асэнсоўваў вытокі жыццёвага сталення. За апошнюю чвэрць стагоддзя айчынная літаратура значна папоўнілася творамі, дзе ўсё глыбей спазнаецца і ўсведамляецца багатае гістарычнае мінулае беларусаў, значнасць нашай культуры, мовы, самабытных традыцый. Можна з упэўненасцю гаварыць пра тое, што гады незалежнай Беларусі (больш адкрытыя архівы, інтэрнэткрыніцы) паспрыялі росту нацыянальнай самасвядомасці беларусаў, і ў аснове гэтага працэсу, несумненна, літаратурныя здабыткі як класікаў, так і сучасных літаратараў.

— Няўмольны час многае мяняе: знікаюць вёскі, іншыя паселішчы, а з імі адыходзяць у нябыт і адметнасці навакольных мясцін, — працягвае Алена Стэльмах. — Але, дзякуючы руплівым краязнаўцам, не страчваецца повязь вякоў. Кнігі, як скарбонкі памяці, захоўваюць для нашчадкаў дух слынных прашчураў.

У павільёне Саюза пісьменнікаў Беларусі 2 верасня будзе наладжана выстаўка найбольш адметных твораў нашых сучаснікаў — Алеся Карлюкевіча, Анатоля Статкевіча-Чабаганава, Міхася Пазнякова, Ігара Пракаповіча, Антона Параскевіна, Івана Ярашэвіча. Кнігі гэтых і многіх іншых аўтараў распавядаюць пра вёскі і паходжанні розных назваў, пра славутых людзей, пра камяні, якія таксама ўмеюць гаварыць...

Пляцоўка Саюза пісьменнікаў Беларусі ў Іванаве пачне працаваць 1 верасня ў 12.00. «Ад родных ніў з любоўю шчырай» — так у Брэсцкім абласным аддзяленні СПБ назвалі творчую праграму, дзе будзе прадстаўлена выстаўка карцін берасцейскіх пісьменнікаў-мастакоў Мікалая Бусько і Анатоля Галушкі. Тут жа будзе працаваць кніжная выстаўка «Брэстчына літаратурная». Узнагароды атрымаюць пераможцы абласнога літаратурнага конкурсу «Духоўная велiч». Пісьменнікі правядуць прэзентацыі сваіх кніжных навінак, выступяць самадзейныя артысты з Брэста, Лунінца, Іванава.

2 верасня а палове адзінаццатай на пляцоўцы СПБ збяруцца прадстаўнікі ўсіх дэлегацый, дзе да ўдзельнікаў свята з прывітальным словам звернецца кіраўніцтва саюза пісьменнікаў, найбольш актыўныя ўдзельнікі Дня беларускага пісьменства атрымаюць узнагароды.

Радаваць прыгожым словам гасцей свята берасцейцы пачнуць з самага рання. А вось далей творчую эстафету падхопяць аддзяленні. З 12.00 да 13.45 Магілёўскае абласное прапануе праграму «Тут пашчасціла мне нарадзіцца». З 13.45 да 14.30 Мінскае абласное прадставіць творчы праект «Міншчына — сэрца Радзімы маёй». З 14.30 да 15.15 Мінскае гарадское аддзяленне пакажа святочную імпрэзу «Тут усё бацькоўскае, святое». Палескі экслюзіў «Палессе. Зямля святая. Зямля Кірылы...» з 15.15 да 16.00 прадставіць Гомельскае абласное аддзяленне. А Гродзенскае абласное аддзяленне далучыцца з праграмай «Родны край — маё натхненне» з 16.00 да 17.00.

Нагодай для такой назвы літаратурна-мастацкай дзеі, якую прадставіць Саюз пісьменнікаў Беларусі на галоўнай пляцоўцы свята а 14 гадзіне стала выданне кнігі пад аднайменнай назвай. Гэта фотаальбом са здымкамі Уладзіслава Цыдзіка і вершамі 65-ці сучасных беларускіх паэтаў, творы якіх прысвечаны Радзіме. Праект ажыццёўлены пры падтрымцы Міністэрства інфармацыі Рэспублікі Беларусь.

Згодна са сцэнарыем, на сцэну выйдуць аўтары, чые ўзнёслыя радкі ўпрыгожваюць выданне, — Міхась Пазнякоў, Навум Гальпяровіч, Марыя Кобец, Святлана Быкава, Ірына Карнавухава, Бажэна Ганушкіна, Віктар Кажура, Юлія Алейчанка, Маргарыта Латышкевіч. Прагучаць і песні ў выкананні Эдуарда Ханка, Алега Елісеенкава, Кастуся Цыбульскага, Сяргея Краўца, Таццяны Атрошанка і ўраджэнца іванаўскай зямлі Леаніда Нікольскага.

Іванаўскай бібліятэцы ад Саюза пісьменнікаў Беларусі будуць перададзены кніжныя навінкі, якія далучаць чытачоў да цікавага і захапляльнага свету літаратуры.

Марыя ЛІПЕНЬ

Выбар рэдакцыі

Культура

У нядзелю яўрэі святкуюць Новы год дрэў

У нядзелю яўрэі святкуюць Новы год дрэў

На гэта свята асаблівым чынам спажываюць розную садавіну, запіваючы келіхамі добра разбаўленага віна.

Грамадства

Як задаволіць кадравы голад у сферы ІТ?

Як задаволіць кадравы голад у сферы ІТ?

Работадаўцы кажуць, што быць добрым праграмістам і ўмець пісаць код для эфектыўнай работы ўжо недастаткова.

Культура

Балельшчыкі II Еўрапейскіх гульняў ужо рэзервуюць вясковыя гатэлі

Балельшчыкі II Еўрапейскіх гульняў ужо рэзервуюць вясковыя гатэлі

«Адышоў час, калі гасцям патрэбныя былі толькі «чарка і скварка», ім ужо цікавыя музеі, культурная праграма».