Вы тут

У Гродзенскай вобласці каля 15 тысяч школьнікаў будуць вучыцца па-беларуску


У новым навучальным годзе каля 15 тысяч школьнікаў будуць навучацца на беларускай мове. У абласным цэнтры павялічылася колькасць першакласнікаў, якія пойдуць у беларускамоўныя класы.


З кожным годам беларускамоўных вучняў становіцца больш, канстатуе завуч СШ № 32 г. Гродна Валянціна БАГДАНОВІЧ. Быў час, калі ахвотных вучыцца на роднай мове можна было пералічыць па пальцах. Адзін-два чалавекі на ўсю школу. Але і тады навучальная ўстанова забяспечвала вучэбны працэс у індывідуальным парадку.

— У нас, у адпаведнасці з Канстытуцыяй, дзве дзяржаўныя мовы, таму нават калі адзін вучань выказаў жаданне навучацца на беларускай, мы гэта права рэалізуем. Настаўнік займаецца з вучнем асобна па кожным прадмеце, згодна з раскладам заняткаў, але ў іншым памяшканні. Праблем з гэтым не было, — кажа завуч.

У старшых класах заняткі ідуць па-ранейшаму, індывідуальна. А вось у пачатковай школе ўжо намеціўся прагрэс — тут сфарміраваны паўнавартасныя класы. Праўда, яны невялікія, па 6-9 чалавек (усяго 25 вучняў). Але ў гэтым навучальным годзе першакласнікаў будзе ўжо 10 чалавек. Гэта самы высокі набор за апошнія дзесяць гадоў.

— З чым звязана такая тэндэнцыя? Мабыць, з тым, што ў беларускамоўных дзяцей ёсць будучыня, — разважае Валянціна Багдановіч. — У вышэйшых навучальных установах адкрываюцца факультэты з выкладаннем на беларускай мове, няма праблем і з ЦТ, любы прадмет можна здаваць на дзвюх мовах па выбары — рускай ці беларускай. Ды і ўвогуле многія выкладчыкі ў ВНУ свае дысцыпліны выкладаюць па-беларуску. Ёсць такія ў Гродзенскім медыцынскім універсітэце, Гродзенскім дзяржаўным універсітэце імя Янкі Купалы. Гэта добра працуе на прэстыж роднай мовы, пашырае кола беларускамоўнай аўдыторыі.

Значную ролю адыгрывае і пазіцыя бацькоў. Яны ў першую чаргу вызначаюць, на якой мове будзе вучыцца іх дзіця. І пачынаецца гэты шлях нават не са школы, а з дзіцячага садка. Як паведаміла галоўны спецыяліст галоўнага ўпраўлення адукацыі Гродзенскага аблвыканкама Ірына МАЛЕВІЧ, у трох дашкольных установах горада працуе дзевяць беларускамоўных груп. А ўсяго па вобласці такія групы наведваюць восем тысяч дашкольнікаў. Бацькі ўсё часцей выбіраюць для сваіх дзяцей навучанне на беларускай мове. Многія ў сям'і таксама размаўляюць па-беларуску.

— Сённяшнія бацькі вучыліся ў той час, калі адбыўся пераход на дзяржаўную беларускую мову — быў перыяд, калі амаль усе школы былі беларускамоўныя, у тым ліку і наша, — адзначае Валянціна Багдановіч. — Таму і пазіцыя бацькоў такая: мы вучылі родную мову, і дзеці абавязаны гэта рабіць, кожны грамадзянін павінен ведаць сваю родную мову.

Не сакрэт, што некаторыя бацькі робяць такі выбар з-за малаколькаснасці беларускамоўнага класа. Гэта даволі слушны аргумент для тых, хто хоча больш індывідуальнага падыходу да навучання. Калі ў звычайных класах па 28—30 вучняў, то ў беларускім класе іх 10. Завуч школы адзначыла, што менавіта ў малаколькасных класах больш алімпіяднікаў. Да таго ж, калі вучань умее думаць на дзвюх мовах, яму потым прасцей даецца авалодванне іншымі — замежнымі — мовамі.

Аб папулярнасці роднай мовы сведчыць і тое, што каля дзвюх тысяч выпускнікоў Гродзеншчыны сёлета здавалі ЦТ менавіта на беларускай і паказалі найлепшыя вынікі па краіне.

— Мы даволі патрабавальна ставімся да падбору кадраў, як у дзіцячых садках, так і школах, — зазначае Ірына Малевіч. — Выхавацелі і педагогі павінны не толькі добра валодаць беларускай мовай, але і ведаць гістарычную спадчыну нашай краіны, культурныя і духоўныя традыцыі беларусаў.

Маргарыта УШКЕВІЧ

Выбар рэдакцыі

Эканоміка

Петришенко: Называть ЕАЭС экономическим союзом сегодня можно только авансом

Петришенко: Называть ЕАЭС экономическим союзом сегодня можно только авансом

Однако наша страна надеется, что это временные трудности.

Грамадства

Апублікаваны поўны тэкст Канцэпцыі інфармацыйнай бяспекі Беларусі

Апублікаваны поўны тэкст Канцэпцыі інфармацыйнай бяспекі Беларусі

Дзяржаўным органам і іншым арганізацыям даручана кіравацца палажэннямі канцэпцыі ў практычнай дзейнасці.

Калейдаскоп

Каля 150 спартсменаў-аматараў хочуць выступіць у «даеўрапейскіх гульнях»

Каля 150 спартсменаў-аматараў хочуць выступіць у «даеўрапейскіх гульнях»

Трэніроўкі і здымкі ўдзельнікаў пачнуцца ў красавіку.

Грамадства

Сувораўскае вучылішча вачыма яго навучэнцаў

Сувораўскае вучылішча вачыма яго навучэнцаў

Быць сувораўцам ва ўсе часы было прэстыжна.