23 Верасень, нядзеля

Вы тут

Прэзідэнт павіншаваў школьнікаў з Днём ведаў


Першакласнікі хвалююцца і чакаюць свайго першага званка. Вучні старшых класаў ужо ведаюць, што з панядзелка трэба брацца за вучобу. Першы дзень восені — не толькі Дзень ведаў, але і дзень сустрэч. Прэзідэнт Беларусі Аляксандр Лукашэнка ў гэтую суботу наведаў сярэднюю школу ў аграгарадку Александрыя Шклоўскага раёна.


Для Прэзідэнта гэта родная школа, дзе яго і сёння сустракаюць настаўнікі. “Вы ведаеце, што гэта школа займае асаблівае месца ў маім жыцці, — падзяліўся кіраўнік дзяржавы. — Так будзе і ў вас. Калісьці і я, будучы вучнем, стаяў на лінейцы, чакаючы чарговага навучальнага года. З тымі падзеямі звязана вялікая колькасць уражанняў, асабістых перажыванняў, самых розных. Але з часам усе яны сталі дарагімі сэрцу ўспамінамі”.  

Аляксандр Лукашэнка звярнуў увагу на тое, што дзеці павінны асэнсоўваць, што ўсе гэтыя ўрокі і кантрольныя — свайго роду рэпетыцыя дарослага жыцця. Каб прайсці гэты шлях годна, трэба браць усё, што дае школа. Трэба станоўча ставіцца і да цяжкасцяў. “Таму што менавіта яны вучаць пераадольваць сумненні і няўпэўненасць, выбудоўваць адносіны з аднакласнікамі і педагогамі. Гэта і ёсць каштоўны вопыт, які стане для вас сур’ёзнай апорай у будучыні”,  — звярнуўся да дзяцей кіраўнік дзяржавы.

Настаўнікі заўсёды падкажуць выйсце з цяжкага становішча і, як звярнуў увагу Прэзідэнт, менавіта самыя патрабавальныя, уважлівыя і мудрыя застануцца ў памяці. Яны вучаць прымаць рашэнні і дзейнічаць у няпростых сітуацыях, якія таксама трапляюцца ў нашым імклівым жыцці.

У александрыйскай школе ёсць і свае педагагічныя дынастыі, Аляксандр Лукашэнка сам вяртаўся сюды настаўнікам і ніколі не губляў сувязь з роднай зямлёй. “Я магу сказаць дакладна, што толькі ведаючы шлях дадому, можна ўпэўнена рухацца наперад”, — падкрэсліў Прэзідэнт.

Веды не дзеля адзнакі, а дзеля высокіх мэт гэта ключ да будучыні. Жадаючы поспехаў у гэтым навучальным годзе, кіраўнік дзяржавы сказаў, што ён будзе паспяховым, калі адразу настроіцца на сур’ёзную працу. Але не трэба забываць і пра адпачынак. Найлепшы, на думку Прэзідэнта, — гэта фізічная актыўнасць. Дарэчы, навучэнцы ў падарунак ад кіраўніка дзяржавы атрымалі новае абсталяванне для спартыўнай пляцоўкі. І адразу ж першага верасня яго апрабавалі. Прэзідэнту ў адказ яны падарылі фотаальбом “Сцяжынкамі малой радзімы”.

Павіншавала ў гэты святочны дзень александрыйскіх школьнікаў і спявачка Алёна Ланская, якая ўсіх натхніла сваімі песнямі. Юлія Быкава таксама спела некалькі кампазіцый для вучняў і іх бацькоў.

Пасля такога надзвычайнага адкрыцця лінейкі празвінеў першы званок, а Прэзідэнт пайшоў у клас старога будынка сваёй школы, дзе яго чакалі 18 першакласнікаў. На сваім першым уроку яны пачулі наказы і віншаванні ад кіраўніка дзяржавы, а таксама расказ пра тое, як ён сам праводзіў свае школьныя гады. Як сядзеў за трэцяй партай, а потым вярнуўся ў навучальную ўстанову ў якасці педагога.

Акрамя таго, Аляксандр Лукашэнка сустрэўся са сваімі настаўнікамі. Разам з імі ён успомніў былыя часы. Таццяна Карпечанка была яго класным кіраўніком. Налета ёй споўніцца 95 гадоў. Яна запрасіла Прэзідэнта на свой юбілей. Разам з настаўнікамі яны зрабілі сумеснае фота на памяць.

Не менш за першакласнікаў хвалюецца і новы дырэктар Александрыйскай сярэдняй школы Аляксандр Бобрыкаў. Ён прыступіў да сваіх абавязкаў у сярэдзіне жніўня, ужо асвоіўся і гатовы сустракаць сваіх вучняў. Дарэчы, усяго ў школе ў гэтым годзе будуць навучацца 206 юнакоў і дзяўчат.

“Сучасная база школы вельмі моцная, новае абсталяванне ўсё ўстаноўлена, новы вучэбны клас хіміі, сучасны клас фізікі, кабінет інфарматыкі, —  расказвае дырэктар. —  Таксама для пачатковых класаў падарылі мультыборды. Гэта значыць на сёння гэта не школа, а казка ў маім уяўленні. Дагэтуль я працаваў у іншай школе на пасадзе загадчыка гаспадаркі, камплектацыя школы там таксама на высокім узроўні, але тут няма параўнання”.

Сваё першага верасня Аляксандр Бобрыкаў таксама вельмі добра памятае. Як ён хваляваўся, стоячы з букетам астраў у першым радзе. Але адзначае, што сёння для яго, як новага дырэктара, дзень не менш хвалюючы. Як кіраўнік сельскай школы, ён адзначае, што тут галоўнае —  увага настаўнікаў і бацькоў. “Сельская школа сёння практычна нічым не адрозніваецца ад гарадской. Аснашчэнне ў нас нават лепшае, чым у гарадскіх школ. Да таго ж у іх напаўняльнасць класаў большая, у нас класы меншыя, гэта значыць увагу навучэнцам мы можам даваць нашмат больш, чым у гарадскіх школах. Гэта характарызуе нашу паспяховасць. Яна ў нас высокая. Каля 50 % выпускнікоў ідзе ў вышэйшыя навучальныя ўстановы. У асноўным гэта сельскагаспадарчыя, паколькі большасць бацькоў працуе на вёсцы. Хаця выбіраюць і інфарматыку”.

У александрыйскую школу прыходзяць і маладыя настаўнікі, такія як Уладзіслаў Захарэнь. Сам ён з Мёршчыны, але выбраў гэтую ўстанову для размеркавання. У хлопцаў 5—9 класаў Уладзіслаў будзе выкладаць працу. Разлічвае заахвоціць вучняў нацыянальнымі рамёствамі.

Дарэчы, да гэтага вучэбнага года ў краіне пабудаваны тры новыя школы: у Мінску, Бабруйску і Ляскоўцы (Мінскі раён). Сёння каля 110 тысяч першакласнікаў пайшлі ў навучальныя ўстановы рэспублікі. Першы ўрок прайшоў пад назвай “Мне выпала шчасце тут нарадзіцца…” і быў прысвечаны Году малой радзімы.

Надзея АНІСОВІЧ, Александрыя

Фота БЕЛТА

Дадаць каментар

Выбар рэдакцыі

Грамадства

75 год таму пачалося вызваленне Беларусі

75 год таму пачалося вызваленне Беларусі

23 верасня 1943 года, савецкімі войскамі быў вызвалены ад нямецка-фашысцкіх захопнікаў першы населены пункт Беларусі — раённы цэнтр Камарын.

Грамадства

Каму і чым дапаможа ТЦСАН

Каму і чым дапаможа ТЦСАН

Ад дапамогі дома пажылым і да стварэння крызісных пакояў для ахвяр хатняга гвалту.

Грамадства

Маштабныя вучэнні прайшлі ў краіне

Маштабныя вучэнні прайшлі ў краіне

Актыўная фаза камандна-штабнога вучэння Узброеных Сіл прайшла ў Беларусі ў верасні.