23 Верасень, нядзеля

Вы тут

Касманаўты і астранаўты з 17 краін сустрэліся з грамадскасцю


Сёння ў рамках ХХХІ Міжнароднага кангрэсу ўдзельнікаў касмічных палётаў прайшоў Дзень супольнасці. Касманаўты і астранаўты наведвалі ўстановы адукацыі ў Мінску , Чэрвені, Смілавічах,  сустракаліся з дзятвой у Мінскім планетарыі. Іх сустракалі ў Беларускім нацыянальным тэхнічным універсітэце, БДУІР, Беларускім дзяржаўным медыцынскім універсітэце, Ваеннай акадэміі, Мінскім сувораўскім вучылішчы, Беларускай дзяржаўнай акадэміі авіяцыі, у інстытутах Нацыянальнай акадэміі навук, на вытворчых прадпрыемствах, якія займаюцца распрацоўкамі па касмічнай тэматыцы.


Стала ўжо добрай традыцыяй – у рамках кожнага кангрэсу адзін дзень адводзіць пад сустрэчы з грамадскасцю. Для людзей, якія ўжо пабывалі ў космасе, гэта магчымасць “запаліць“ касмічнымі марамі моладзь, адказаць на іх шматлікія пытанні, расказаць, як змяняецца ўспрыманне свету, калі ты глядзіш на нашу планету зверху.

У Беларускі  дзяржаўны ўніверсітэт сёння завіталі дванаццаць касманаўтаў і астранаўтаў з Расіі, Швецыі, Германіі і ЗША. Гэта першы маштабны візіт вядомых астранаўтаў у вядучую ВНУ краіны. Абыліся сустрэчы на механіка-матэматычным, біялагічным, хімічным факультэтах, факультэце радыёфізікі і камп’ютарных тэхналогій, у Інстытуце прыкладных фізічных праблем БДУ.

Госцем фізічнага факультэта стаў астранаўт NASA , прафесар Джэфры ХОФМАН, які ажыццявіў пяць касмічных экспедыцый на шатлах. Ён з’яўляецца членам Міжнароднай акадэміі астранаўтыкі, Міжнароднага астранамічнага саюза, Амерыканскага інстытута аэранаўтыкі і астранаўтыкі, Амерыканскага астранамічнага таварыства і іншых навуковых арганізацый. Узнагроджаным пяццю медалямі “За касмічны палёт”, мае два медалі “За выключныя заслугі” і два медалі NASA.  Джэфры Хофман першым у гісторыі перасягнуў мяжу па часе знаходжання чалавека ў калязямной прасторы ў тысячу гадзін.

Да студэнтаў геаграфічнага факультэта завіталі двойчы герой Савецкага Саюза Віктар САВІНЫХ і амерыканскі астранаўт Марыё РАНКА. Подзвігу Віктара Савіных і Уладзіміра Джанібекава, якім давялося шукаць і “вяртаць да жыцця” касмічную станцыю, сувязь з якой была страчана, прысвечаны мастацкі фільм “Салют-7”.  Была рэальная пагроза таго, што яна ўпадзе на Зямлю. Натуральна, што студэнтаў цікавілі падрабязнасці, наколькі праўдападобнай можна лічыць гэту кінаработу.

Марыё Ранка здзейсніў тры касмічныя вандроўкі на шатлах і адзін выхад у адкрыты космас. Ен служыў афіцэрам мэтэаслужбы на дэсантным караблі,  афіцэрам экалагічнай службы ВМС ЗША, праводзіў акіянаграфічныя і гідраграфічныя даследаванні, займаўся выкладаннем.  Для студэнтаў геафаку ён таксама падрыхтаваў прэзентацыю – прадэманстраваў унікальныя фатаграфіі, зробленыя ім падчас касмічных экспедыцый, у тым ліку і ў адкрытым космасе. А затым адказваў на іх шматлікія пытанні, у тым ліку і па сваім больш вузкім геаграфічным профілі.  

А ў сталічны кінатэатр “Піянер” на сустрэчу са школьнікамі з розных рэгіёнаў прыйшлі расійскі касманаўт Юрый УСАЧОЎ і жанчына-астранаўт з Вялікабрытаніі – доктар Хелен ШАРМЭН. Юрый Усачоў падчас адной з чатырох сваіх  экспедыцый  шэсць (!) разоў выходзіў у адкрыты космас. А Хелен стала першым касманаўтам у Вялікабрытаніі. Для гэтага ёй давялося канкурыраваць з 13 тысячамі сваіх суайчыннікаў.  Яна не была лётчыкам, канструктарам ці інжынерам, затое добра разбіралася ў хіміі, працавала  хімікам-тэхнолагам на кандытарскай фабрыцы. І, напэўна, ёй вельмі хацелася трапіць у космас. Сёння яна займаецца навукай і выкладаннем.  

Юрый Усачоў і Хелен Шармэн выказалі ўпэўненасць, што чалавек, які высадзіцца на Марсе, ужо нарадзіўся, больш таго, ён ужо вучыцца ў школе. Таму ім можа стаць кожны з прысутных у зале, калі, канешне, вельмі гэтага захоча.

 

 

 

 

Надзея НІКАЛАЕВА

Фота Таццяны ТКАЧОВАЙ

Каментары

Афігенныя фота. Асабліва дзесятае - можна разглядаць бясконца

Дадаць каментар

Выбар рэдакцыі

Грамадства

75 год таму пачалося вызваленне Беларусі

75 год таму пачалося вызваленне Беларусі

23 верасня 1943 года, савецкімі войскамі быў вызвалены ад нямецка-фашысцкіх захопнікаў першы населены пункт Беларусі — раённы цэнтр Камарын.

Грамадства

Каму і чым дапаможа ТЦСАН

Каму і чым дапаможа ТЦСАН

Ад дапамогі дома пажылым і да стварэння крызісных пакояў для ахвяр хатняга гвалту.

Грамадства

Маштабныя вучэнні прайшлі ў краіне

Маштабныя вучэнні прайшлі ў краіне

Актыўная фаза камандна-штабнога вучэння Узброеных Сіл прайшла ў Беларусі ў верасні.