Вы тут

Алена Русакевіч. Фантастыка ў сучасным мастацтве Беларусі


У Нацыянальным цэнтры сучасных мастацтваў Рэспублікі Беларусь праходзіць выстаўка «Ірэальнае ў сучасным беларускім мастацтве», дзе прадстаўлены творы з музейнай калекцыі НЦСМ РБ. Экспазіцыя складаецца з работ знакамітых сучасных беларускіх аўтараў. Арганізатары прапануюць пазнаёміцца з фантастычным светам, які адлюстроўваюць у сваіх творах айчынныя мастакі. На выстаўцы прадстаўлены жывапіс, графіка і скульптура, у якіх візуалізуюцца самыя нетрывіяльныя вобразы, што ўзнікаюць у галаве творчай асобы, пераказваюцца або пераасэнсоўваюцца сюжэты з беларускага народнага фальклору, хрысціянскай і антычнай міфалогіі.


Нягледзячы на вузкую тэматычную накіраванасць, выстаўка дае магчымасць пазнаёміцца з цэлым пластом сучаснага мастацтва Беларусі. Прадстаўлены творы аўтараў, творчасць якіх фарміруе сучаснае культурнае асяроддзе і мае ролю своеасаблівага камертона, які ўплывае на развіццё мастацтва ў краіне.

У эксплікацыі да выстаўкі гаворыцца пра фантастыку ў візуальным мастацтве як пра нацыянальны брэнд. Сапраўды, практычна на любой выстаўцы твораў беларускіх аўтараў канца ХХ — пачатку ХХІ стагоддзя можна сустрэць розныя сімвалы, знакі і сюжэты, якія адсылаюць да старажытнай міфалогіі і фальклору. З аднаго боку, стварэнне нацыянальнага брэнда ў мастацтве — гэта плюс. Але з іншага — гэта фарміруе зацыкленасць аўтараў на некаторых выяўленчых сродках.

Даволі часта глядач, які прыходзіць на выстаўку сучаснага беларускага мастацтва, сярод шматлікіх дамавікоў, вавілонскіх вежаў і ладзей толькі зрэдку можа сустрэць творы, якія размаўляюць з ім новай мастацкай мовай. У такіх відах сучаснага мастацтва Беларусі, як жывапіс, графіка і скульптура, развіццё аўтарскай канцэпцыі нярэдка замыкаецца на адных і тых жа персанажах, аб’ектах і метафарах. Натуральна, існуе мноства ўніверсальных ісцін, якія будуць папулярныя ва ўсе часы. Аднак сучасны свет дыктуе новыя тэмы і сюжэты, і трэба адзначыць, што многія аўтары звяртаюцца ў сваёй творчасці да іх адлюстравання. Але, на жаль, спосабы выкладання ідэі часта застаюцца такімі ж, як і сорак гадоў назад. Папулярнасць этнічных матываў у мастацтве канца ХХ стагоддзя было апраўдана сацыяльна-палітычнымі фактарамі. Зразумела, не трэба забываць пра персанажаў з нацыянальнага фальклору. Але чаму б маладым мастакам пераасэнсоўваць не толькі класічныя для беларускага мастацтва сюжэты, але і формы іх выкладання?

У выніку атрымліваецца: як пра нацыянальны брэнд сёння можна гаварыць не пра фантастыку, а пра метады, якімі многія аўтары ўжо якое дзесяцігоддзе карыстаюцца ў сваёй творчасці. Аднастайнасць і беднасць мастацкіх сродкаў могуць прывесці да абясцэньвання гэтых твораў. Бо за сценамі выставачнай залы, якую наведвае публіка, аб’яднаная любоўю да такіх сюжэтаў, падобныя творы рызыкуюць застацца нецікавымі. І варта ўлічваць той факт, што гэта не толькі пытанне актуалізацыі і папулярызацыі сучаснага мастацтва Беларусі. Гэта яшчэ і пытанне вызначэння статусу такіх відаў мастацтва, як жывапіс, графіка і скульптура, у сучасным творчым асяроддзі краіны.

Дадаць каментар

Выбар рэдакцыі

Грамадства

75 год таму пачалося вызваленне Беларусі

75 год таму пачалося вызваленне Беларусі

23 верасня 1943 года, савецкімі войскамі быў вызвалены ад нямецка-фашысцкіх захопнікаў першы населены пункт Беларусі — раённы цэнтр Камарын.

Грамадства

Каму і чым дапаможа ТЦСАН

Каму і чым дапаможа ТЦСАН

Ад дапамогі дома пажылым і да стварэння крызісных пакояў для ахвяр хатняга гвалту.

Грамадства

Маштабныя вучэнні прайшлі ў краіне

Маштабныя вучэнні прайшлі ў краіне

Актыўная фаза камандна-штабнога вучэння Узброеных Сіл прайшла ў Беларусі ў верасні.