Вы тут

68 працэнтаў удзельнікаў рэгіянальнага праекта ЕС-ПРААН — жанчыны


Беларусь ідзе па сваім шляху развіцця, беручы на ўзбраенне і вопыт суседзяў, і еўрапейскія ініцыятывы. Несумненна і тое, што кожная праграма ў рамках дзяржавы (дзе б ні пераймаўся вопыт) павінна быць адаптаваная да мясцовых асаблівасцяў і ўмоў. У афіцыйных дакументах такая пазіцыя носіць назву тэрытарыяльна-арыентаваны падыход. Аб вопыце яго прымянення ў нашай краіне гаварылі на высокім узроўні ў рамках выніковай канферэнцыі праекта ЕС-ПРААН «Садзейнічанне развіццю на мясцовым узроўні ў Рэспубліцы Беларусь» (з нагоды заканчэння праграмы) прадстаўнікі міністэрстваў, ЕС, ПРААН, абласных і раённых выканаўчых камітэтаў, некамерцыйных арганізацый і бізнесу.


Фота БЕЛТА

Намеснік міністра эканомікі Аляксандр ЧАРВЯКОЎ (які кіраваў Каардынацыйным саветам праекта на першапачатковым этапе) падзяліўся гісторыяй стварэння і распрацоўкі праекта ў нашай краіне:

— У рэалізацыю праекта закладваліся чатыры ключавыя аспекты, якія маюць прынцыповае значэнне для рэгіянальнага развіцця. Праводзіўся маштабны эксперымент, у якім у кожным раёне распрацоўваліся канцэпцыі, а затым 30 найбольш актыўных стратэгій мясцовага развіцця атрымалі пашпарты тэрыторыі апераджальнага развіцця. Гэта быў першы крок да стратэгічнага планавання на мясцовым узроўні. Значным з'яўляўся і сам працэс распрацоўкі пашпартоў, у які ўключаліся ўсе зацікаўленыя (як прадстаўнікі мясцовай улады, грамадскіх арганізацый, бізнес-супольнасці, так і простыя мясцовыя жыхары), гэта значыць, распрацоўвалася методыка самога стратэгічнага дакумента. Яшчэ адзін аспект — мясцовыя ініцыятывы, ідэі і прапановы з месцаў. Для паспяховасці трэба быць кансалідаванымі з усімі ўдзельнікамі працэсу. Вельмі важным з'яўляецца фарміраванне дыялогу з мясцовай уладай, бізнесам і насельніцтвам, каб разам вызначаць стратэгіі развіцця, вылучаць прыярытэты і вызначаць шляхі рашэння праблем у канкрэтнай мясцовасці. Праект ЕС-ПРААН «Садзейнічанне развіццю на мясцовым узроўні ў Рэспубліцы Беларусь» на мікраўзроўні закранаў увесь цыкл стратэгічнага планавання генерацый ідэй, трансфармацыі іх у канкрэтныя праекты і іх далейшую рэалізацыю. З боку дзяржавы (у падтрымку далейшага развіцця ініцыятыў) сёння створаны камфортныя для прадпрымальніцкага асяроддзя ўмовы, для гэтага дзяржава зрабіла вялікі ўклад. Быў прыняты пакет нарматыўных дакументаў (Дэкрэт № 7 «Аб развіцці прадпрымальніцтва», указы Прэзідэнта аб развіцці гандлю, грамадскага харчавання, бытавога абслугоўвання, рамеснай дзейнасці, развіцці аграэкатурызму, аб рэгуляванні дзейнасці фізічных асоб і іншыя). Усе гэтыя дакументы ўзмацняюць механізмы самарэгулявання бізнесу, яго адказнасці за сваю працу перад грамадствам, пры гэтым захоўваецца мінімальна неабходны ўзровень кантролю з боку дзяржавы. Дзеянне дакумента ахоплівае сферы, у якіх засяроджана каля 95 працэнтаў малога і сярэдняга бізнесу.

Ініцыятывы, якія ідуць знізу ўверх, вядуць да развіцця патэнцыялу на месцах, калектыўнай адказнасці і, як следства, мабілізацыі сіл і рэсурсаў рэгіёна.

Андрэа ВІКТАРЫН, кіраўнік Прадстаўніцтва Еўрапейскага Саюза ў Рэспубліцы Беларусь, адзначыла ў якасці прыкладу паспяховай рэалізацыі праекта Смілавічы:

— Мне было вельмі прыемна ўбачыць, як змяніўся гэты гарадскі пасёлак, што там з'явіліся новыя аб'екты інфраструктуры, і як добра сёння скаардынаваны дзеянні ўдзельнікаў нашага праекта і іншых праектаў і праграм. І яшчэ адзін прыклад — вёска Уваравічы ў Гомельскай вобласці, дзе жыхары захацелі стварыць спартыўную пляцоўку — і стварылі.

Кіраўнік прадстаўніцтва ЕС назвала некалькі ўражальных лічбаў і фактаў:

— За чатыры гады ў Беларусі было рэалізавана 243 ініцыятывы ў самых розных галінах, на падтрымку гэтых ініцыятыў было выдаткавана 3 606 049 еўра (сафінансаванне склала 1 001 935 еўра); створана 30 ініцыятыўных груп, распрацавана 118 канцэпцый развіцця раёнаў; створана 30 пашпартоў ТАР (тэрытарыяльна арыентаваны падыход да развіцця) і план дзеянняў на пяць гадоў; створаны 24 новыя прадпрыемствы і 143 новыя працоўныя месцы; створана 352 аб'екты інфраструктуры. У тысяч беларусаў з'явіліся новыя магчымасці для адукацыі, занятасці, атрымання якасных сацыяльных і медыцынскіх паслуг у малых гарадах і сельскай мясцовасці. Акрамя таго, — асабліва падкрэсліла спадарыня Віктарын, — мне прыемна расказаць, што 68 працэнтаў усіх удзельнікаў праекта — жанчыны. 90 тысяч чалавек па ўсёй краіне атрымалі магчымасці для дадатковай адукацыі, а больш за 180 тысяч чалавек змаглі скарыстацца новымі інфраструктурнымі аб'ектамі і паслугамі ў галіне аховы здароўя і здаровага ладу жыцця. Было створана больш за 130 магчымасцяў для занятасці беларусаў, адкрыты новыя аб'екты і паслугі ў сферы турызму, у тым ліку безбар'ернага, для больш чым 350 000 жыхароў краіны. Новымі паслугамі ў сацыяльнай сферы ўжо могуць скарыстацца 60 тысяч чалавек па ўсёй краіне.

Андрэа Віктарын анансавала новы праект «Мясцовае эканамічнае развіццё», назвала яго «прамым працягам папярэдняга праекта» і агучыла бюджэт — 7 млн еўра (мінулы праект меў бюджэт у 5 млн еўра). Асноўны змест праекта — падтрымка малога і сярэдняга бізнесу, стартапаў.

Іаана Казана-Вішнявецкі, пастаянны прадстаўнік праграмы развіцця ААН у Беларусі, назвала «краевугольным каменем супрацоўніцтва мясцовага насельніцтва і ўладаў, без якога нельга было дасягнуць поспеху ў рэалізацыі праекта». Яна расказала, што бачыла ў Дрыбіне Школу шапавалаў, у Пружанах — керамічную майстэрню, і адзначыла:

— Фінансаванне Еўрапейскага саюза і суправаджэнне развіцця мясцовых супольнасцяў камандай ПРААН у Беларусі далі магчымасць многім жыхарам раёнаў навучыцца браць вырашэнне праблем у свае рукі і атрымаць доступ да міжнароднай тэхнічнай дапамогі.

Вольга ПРАЛЮК

Загаловак у газеце: Вялікія ініцыятывы малых гарадоў

Выбар рэдакцыі

Грамадства

Сувораўскае вучылішча вачыма яго навучэнцаў

Сувораўскае вучылішча вачыма яго навучэнцаў

Быць сувораўцам ва ўсе часы было прэстыжна. 

Культура

Харвацкі кінафестываль ZаgrеbDох даследуе рэгіён вялікім экранам

Харвацкі кінафестываль ZаgrеbDох даследуе рэгіён вялікім экранам

Балканскія краіны паўсталі перад гледачом з іх надзённым.

Эканоміка

Новыя жыллёвыя ўмовы. Абараніць уласнікаў, спажыўцоў і пастаўшчыкоў паслуг

Новыя жыллёвыя ўмовы. Абараніць уласнікаў, спажыўцоў і пастаўшчыкоў паслуг

Пра новаўвядзенні, якія дэпутаты мусяць разгледзець на вясновай сесіі.