У гарадскім пасёлку Копысь Аршанскага раёна Мітрапаліт Мінскі і Заслаўскі Павел, Патрыяршы Экзарх усяе Беларусі асвяціў храм Праабражэння Гасподняга. Для тутэйшых гэта стала сапраўдным святам. Каб прыняць удзел у літургіі, вернікі прыехалі з суседніх вёсак, Оршы і нават Віцебска.
Сярод афіцыйных гасцей былі старшыня Віцебскага абласнога Савета дэпутатаў Уладзімір Цярэнцьеў, намеснік старшыні Віцебскага аблвыканкама Уладзімір Пенін, старшыня Аршанскага райвыканкама Ігар Ісачанка і іншыя.
Вяскоўцы з удзячнасцю ўспаміналі Прэзідэнта, бо менавіта калі ён наведваў сваю малую радзіму, яны прасілі яго аб рэканструкцыі храма. І вось цяпер пасёлак упрыгожвае новы. Наогул у Копысі шмат робіцца для таго, каб умовы для жыцця былі не горшыя, чым у горадзе.
Як паведаміў карэспандэнту «Звязды» настаяцель храма, протаіерэй Сергій Вараб'ёў, новую царкву пабудавалі меней чым за год на месцы, дзе быў храм у аварыйным стане. Дарэчы, на гэтым месцы першы драўляны храм з'явіўся яшчэ ў пачатку XVІІІ стагоддзя.
Паводле слоў архіепіскапа Віцебскага і Аршанскага Дзімітрыя, калісьці ў Копысі было сем храмаў. Цяпер дзейнічаюць два. Праўда, ёсць яшчэ адна старая капліца, якую калісьці пабудавалі па просьбе работнікаў кафляных заводаў.
Патрыяршы экзарх падзякаваў усім, хто прымаў удзел у рэалізацыі праекта: праекціроўшчыкам, будаўнікам, дабрачынцам. Сярод тых, хто фінансава дапамог у пабудове храма, — сенатар, генеральны дырэктар кіруючай кампаніі холдынга «Беларуская гарбарна-абутковая кампанія «Марко» Мікалай Мартынаў. Яго Патрыяршы Экзарх узнагародзіў ордэнам святой прападобнай Ефрасінні Полацкай. Між іншым, Мітрапаліт адзначыў узнагародамі і іншых мецэнатаў.
— Новая царква — яшчэ адна крыніца святой вады, ласкі Святога Духа. Храм — гэта неба на зямлі. Той, хто хоча дакрануцца да неба, хай прыходзіць сюды на сустрэчу з Богам...
Дарэчы, юнае насельніцтва ў Копысі, дзе жывуць каля 850 чалавек, з задавальненнем наведвае гурток гісторыі і культуры праваслаўя. Тры сястры міласэрнасці групы міласэрнасці пры храме пастаянна наведваюць пацыентаў бальніцы гарадскога пасёлка і тых, хто жыве ў дамах-інтэрнатах у Якаўлевічах і Бабінічах.
Усяго ў Віцебскай вобласці налічваецца 265 культавых аб'ектаў.
Аляксандр ПУКШАНСКІ
Аршанскі раён — Віцебск
А разам з імі навучанне, сацпакет і нават жыллё.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».