Ірына Нікішова — гаспадыня музея хлеба, які знаходзіцца ў вёсцы Бацвінава Чачэрскага раёна. У гэтым шматзначным слове — гаспадыня — крыецца і тое, што Ірына Міхайлаўна яшчэ і выдатны майстар па выпечцы хлебабулачных вырабаў. Гэтаму рамяству яе, работніка культуры, навучыла маці. Амаль кожны дзень яна замешвае муку, робіць цеста, накладвае яго ў формы, ставіць у жар. Гэтую магічную працэдуру бачаць і экскурсіі, і выпадковыя турысты, і школьнікі, і, вядома, аднавяскоўцы.
Музей дзейнічае ўжо дзесяць гадоў. Ён узнік у рамках праекта мясцовай ініцыятывы, падтрыманай Праграмай развіцця ААН.
Часта пытаюць у гаспадыні, чаму ў яе атрымліваюцца такія смачныя і прыгожыя булкі-пірагі, на што Ірына прыгадвае гісторыю: «Калі адкрывалі наш музей, я выпекла хлябок, які быў падобны на сонейка. З таго часу, як прыкмета, пірагі атрымліваюцца на славу».
Анатоль КЛЯШЧУК, фота аўтара
Канцэрт для дзяцей і моладзі, пластычны спектакль Ягора Дружыніна і «Рок-панарама».