Вы тут

Сёння стартуюць ІІІ Юнацкія Алімпійскія гульні


Наша каманда адправілася ў Аргенціну яшчэ ў сераду, у яе склад увайшлі 37 спартсменаў і 18 трэнераў. Беларускія атлеты выступяць у 16 відах спорту: акрабатыка, барацьба, спартыўная гімнастыка, мастацкая гімнастыка, веславанне на байдарках і каноэ, акадэмічнае веславанне, дзюдо, лёгкая атлетыка, сучаснае пяцібор'е, стральба з лука, кулявая стральба, тэніс, настольны тэніс, парусны спорт, плаванне і скачкі на батуце.


Сярод галоўных прэтэндэнтаў на медалі ў Буэнас-Айрэсе плыўчыха Анастасія Шкурдай, якая ўжо не раз падымалася на п'едэсталы міжнародных спаборніцтваў, гімнастка Ганна Каменшчыкава, скакун на батуце Іван Літвіновіч, лёгкаатлеты Аляксей Александровіч і Ганна Зубкова.

На провадах каманды першы віцэ-прэзідэнт Нацыянальнага алімпійскага камітэта Андрэй Асташэвіч зачытаў удзельнікам спаборніцтваў пажаданні кіраўніка дзяржавы, прэзідэнта Нацыянальнага алімпійскага камітэта Аляксандра Лукашэнкі. «Памятайце, абараняць спартыўную славу Беларусі — вялікі гонар. Перакананы, што вы пацвердзіце высокі ўзровень айчыннай сістэмы падрыхтоўкі атлетаў і годна прадставіце сваю Радзіму на юнацкіх Алімпійскіх гульнях у Аргенціне». Прэзідэнт НАК выказаў надзею, што Гульні шырока расчыняць перад маладымі беларускімі атлетамі дзверы ў спорце найвышэйшых дасягненняў і стануць яркім пачаткам кар'еры.

ІІІ летнія юнацкія Алімпійскія гульні пройдуць у Буэнас-Айрэсе, гэта ўсяго другі выпадак пасля Рыа-2016, калі паўднёваамерыканскі горад прымае спаборніцтвы такога маштабу. Адзначым, што ў Аргенціне з'явяцца новаўвядзенні, якіх няма на дарослых Алімпіядах. На-
прыклад, лёгкая атлетыка будзе прадстаўлена ў незвычайным фармаце: за выключэннем кросу на 4000 метраў, у астатніх дысцыплінах не будзе фінальных раўндаў. Пераможцы і прызёры ў бегу, скачках і кіданні будуць вызначаныя па выніках дзвюх спроб.

Пасля працяглага перапынку ў алімпійскую праграму вяртаецца крос. Апошні раз спаборніцтвы па бегу па перасечанай мясцовасці праводзіліся на Алімпійскіх гульнях у 1924 годзе ў Парыжы. Лёгкаатлеты, якія спецыялізуюцца на дыстанцыях 1500, 2000 і 3000 метраў, пасля завяршэння сваёй асноўнай праграмы прабягуць крос, які вызначыць медалістаў.

У гімнастыцы пройдзе новае комплекснае каманднае спаборніцтва, у якім будуць удзельнічаць спартсмены з усіх чатырох гімнастычных дысцыплін: акрабатыкі, спартыўнай і мастацкай гімнастыкі, скачках на батуце.

У парусным спорце дэбютуе кайтсёрфінг. Удзельнікам трэба будзе зрабіць два заплывы, па выніках якіх найлепшыя кваліфікуюцца ў фінал.

Хакей на траве будзе прадстаўлены ў Буэнас-Айрэсе больш кароткай, але дынамічнай версіяй, вядомай як Hockey5s. Аналагічным чынам футбол заменены на футзал. Замест 40-хвілінных таймаў і 11 спартсменаў, якія гулялі на адкрытым паветры, як гэта было ў Сінгапуры і Нанкіне, каманды будуць праводзіць 20-хвілінныя таймы ў камандах з пяці чалавек у закрытым памяшканні. Гандбол, між тым, рухаецца ў іншы бок з увядзеннем пляжнай версіі, усе гульні пройдуць на пяску. Веласіпедысты змогуць выступіць у трох дысцыплінах: крытэрыуме, гонцы на 60 кіламетраў і індывідуальнай гонцы з раздзельным стартам. Гэта дазволіць ім набраць як мага больш ачкоў для сваёй каманды.

Таксама ўпершыню пройдуць спаборніцтвы па BMX-фрыстайле, якія ўжо ўвайшлі ў праграму Гульняў-2020 у Токіа.

Дар'я ЛАБАЖЭВІЧ

Дадаць каментар

Выбар рэдакцыі

Эканоміка

 Эксперт: Да новага года рост цэн на нерухомасць спыніцца

Эксперт: Да новага года рост цэн на нерухомасць спыніцца

А калі і падрасце, то не больш чым на 0,5-1 працэнт.

Грамадства

Як і хто дапамагае змагацца з восамі ў кватэры?

Як і хто дапамагае змагацца з восамі ў кватэры?

Неяк ранкам я знайшла ў сябе на кухні некалькі вос. 

Культура

Форум тэатральнага мастацтва «ТЭАРТ» пакінуў на сэрцы рваныя раны

Форум тэатральнага мастацтва «ТЭАРТ» пакінуў на сэрцы рваныя раны

Мядзведзь на сцэне, Чэхаў на мове жэстаў і самая дакладная перадача стану дэпрэсіі.