Вы тут

У Шанхаі пройдзе выстаўка імпартных тавараў Сhіnа Іntеrnаtіоnаl Іmроrt Ехро


У Шанхаі з 5 па 10 лістапада ў самым вялікім у свеце выставачным комплексе (яго плошча — 1,5 мільёна квадратных метраў) пройдзе Першая кітайская міжнародная выстаўка імпартных тавараў і паслуг Сhіnа Іntеrnаtіоnаl Іmроrt Ехро. На яе прыедзе каля 2800 кампаній са 130 краін. Плануецца, што колькасць аптовых пакупнікоў дасягне 150 000. Беларускі бок актыўна рыхтуецца да ўдзелу ў ёй.


Сяргей ЦЯРЭНЦЬЕЎ, начальнік упраўлення Азіі, Аўстраліі і Акіяніі Міністэрства замежных спраў Беларусі, на сустрэчы з журналістамі ў Нацыянальным прэс-цэнтры пракаментаваў асноўныя моманты падрыхтоўкі. Ён адзначыў, што, нягледзячы на тэндэнцыю да ўзмацнення пратэкцыянізму сваіх рынкаў, Кітай праводзіць выстаўку менавіта імпарту і паказвае сваю адкрытасць, гатоўнасць працягваць працу з замежнымі кампаніямі. «Гэта адпавядае нашым інтарэсам, таму на выстаўцы будзе прадстаўлены самы перадавы беларускі экспартны патэнцыял. Менавіта таму падрыхтоўцы дадзенай выстаўкі ўдзялялася вялікая ўвага», — падкрэсліў супрацоўнік МЗС.

Падчас падрыхтоўкі беларускім бокам былі праведзены два пробныя «прагоны» — прэзентацыі з дапамогай пасольства Кітая. Па словах Сяргея Цярэнцьева, наша краіна падыходзіць да мерапрыемства ў якасна новым выглядзе. Гэта ўнікальныя напрацоўкі, якія будуць і потым выкарыстоўвацца ў працы з кітайцамі, каб больш эфектыўна прасоўваць рэчы і паслугі на іх рынак. Беларускі бок разлічвае на вельмі пазітыўны вынік як падчас выстаўкі, так і на гады наперад.

Валерый Садоха, дырэктар Нацыянальнага цэнтра маркетынгу і кан'юнктуры цэн Міністэрства замежных спраў Беларусі, расказаў пра арганізацыю мерапрыемства. Выстаўка будзе падзелена на два блокі, якія будуць прадстаўляць краіну і прадпрыемствы. У рамках першага з іх будуць праводзіцца прэзентацыі, дэгустацыі, у нашай культурнай праграме будзе ўдзельнічаць ансамбль «Купалінка». Дызайн павільёна выкананы з выкарыстаннем беларускага арнаменту, выявы васілька — ужо прыступілі да яго будаўніцтва. На выстаўцы будуць прысутнічаць розныя міністэрствы і ўстановы, у тым ліку прадстаўнікі індустрыяльнага парка «Вялікі камень».

У камерцыйным блоку Беларусь будзе прадстаўлена на шасці пляцоўках. Гэта «Сельскагаспадарчыя і харчовыя прадукты», «Аўтамабілебудаванне» і іншае. У Шанхай прыедзе больш за 80 айчынных арганізацый. З іх 28 прадпрыемстваў прадстаўляюць мяса-малочную прадукцыю. Як лічыць Валерый Садоха, кожнаму неабходна даць магчымасць выйсці на гэты рынак, а далей усё будзе залежаць ад іх. Сёння большасць прадпрыемстваў мае сайты на кітайскай мове. Шмат у каго ёсць кітайскія сертыфікаты.

Падчас выстаўкі — 7 лістапада — будзе праходзіць Беларуска-кітайскі дзелавы форум. А за дзень да яго беларускія прадпрыемствы плануюць паўдзельнічаць у Міжнароднай трансгранічнай канферэнцыі. Яна дазволіць устанавіць прамыя кантакты з кітайскімі кампаніямі-імпарцёрамі. Слоган канцэпцыі нацыянальнай экспазіцыі «Беларусь — Кітай: сяброўства, супрацоўніцтва, перспектывы».

Надзея АНІСОВІЧ

Загаловак у газеце: Сустракаемся ў Шанхаі

Дадаць каментар

Выбар рэдакцыі

Культура

Форум тэатральнага мастацтва «ТЭАРТ» пакінуў на сэрцы рваныя раны

Форум тэатральнага мастацтва «ТЭАРТ» пакінуў на сэрцы рваныя раны

Мядзведзь на сцэне, Чэхаў на мове жэстаў і самая дакладная перадача стану дэпрэсіі.

Спорт

Настасся Чарняўская: Трэба, каб людзі ведалі: бадмінтон — рэальны спорт

Настасся Чарняўская: Трэба, каб людзі ведалі: бадмінтон — рэальны спорт

Якія задачы ставяцца перад камандай у 2019 годзе і што самае важнае ў бадмінтоне?

Грамадства

Які ўрок лепшы: перакулены або традыцыйны?

Які ўрок лепшы: перакулены або традыцыйны?

Як зрабіць, каб у вучняў загарэліся вочы?

Грамадства

Губернатар Гродзеншчыны - пра перспектыўныя праекты рэгіёна

Губернатар Гродзеншчыны - пра перспектыўныя праекты рэгіёна

Горад-спадарожнік, анкалагічны цэнтр, «вёскі будучыні»...