У райцэнтры Узда, што на Міншчыне, упершыню прайшлі абласныя гульні-спаборніцтвы сярод супрацоўнікаў службы хуткай дапамогі.
У іх прынялі ўдзел 23 фельчарскія, агульнапрофільныя і спецыялізаваныя ўрачэбныя брыгады з 22 раёнаў вобласці і горада Жодзіна. У кожную каманду ўваходзілі чатыры чалавекі: тры медыкі і кіроўца. Усяго ж было сфарміравана дзевяць пляцовак, дзе ўрачы дэманстравалі сваё майстэрства і прафесіяналізм у выратаванні пацярпелых. Усе сітуацыі былі змадэляваны як у сапраўднасці і не паўтаралі адна адну. Імітавалі наступныя выпадкі: некаторыя з удзельнікаў сталі ахвярамі выбухаў, нехта атрымаў траўму пры падзенні, кагосьці ўджаліла пчала, хтосьці трапіў у дарожна-транспартнае здарэнне. Неабходна было імгненна прымаць адзіна правільнае рашэнне, каб аблегчыць пакуты або нават выратаваць жыццё ахвяр непрадбачаных сітуацый. У ролях пацярпелых выступалі валанцёры і прадстаўнікі Чырвонага Крыжа.
Словам, заданні былі максімальна набліжаныя да рэальнай паўсядзённай работы медыкаў «хуткай». Усе яны на выдатна справіліся з пастаўленай задачай, прафесійна падышлі да справы. Але, як вызначыла журы, найлепшыя вынікі паказала каманда Мінскай раённай цэнтральнай бальніцы.
— Гэтыя гульні дазволілі вызначыць найбольш падрыхтаваных супрацоўнікаў хуткай дапамогі, якія валодаюць глыбокімі ведамі, высокім прафесіяналізмам, яшчэ раз праверыць навыкі па аказанні неадкладнай медыцынскай дапамогі на дашпітальным этапе, — адзначыў галоўны спецыяліст галоўнага ўпраўлення па ахове здароўя Мінаблвыканкама Міхаіл Аляхновіч.
Таццяна ЛАЗОЎСКАЯ
Фіналістка праекта «Акадэмія талентаў» на АНТ — пра творчасць і жыццё.
Амаль тысяча дзвесце чалавек сабраліся, каб вырашаць найважнейшыя пытанні развіцця краіны.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
