Вы тут

Дысплазія — не прыгавор, а заклік да дзеяння


На прыёме ў артапеда ў першы месяц жыцця дзіцяці можа высветліцца непрыемная дэталь: у малога — няспеласць тазавых касцей (у народзе кажуць «прыроджаны вывіх»). Часцей за ўсё пры гэтым дзіцячы ўрач кажа словы «дысплазія тазасцегнавога сустава», якія імгненна палохаюць усіх без выключэння маладых бацькоў. Але палохацца — зусім не тое, што трэба рабіць у гэтай сітуацыі. Варта запасціся цярпеннем і строга выконваць рэкамендацыі медыкаў. Пра іх расказаў урач-рэнтгенолаг 3-й гарадской дзіцячай клінічнай паліклінікі Мінска Вячаслаў КРАСОЎСКІ.


— Цяпер гэта вельмі распаўсюджаная паталогія — з ёй нараджаецца да 25 % дзяцей. У большасці выпадкаў пад пастаянным наглядам артапеда суставы самастойна «дарастаюць» і прыходзяць у анатамічную норму. У астатніх ім варта крышачку дапамагчы, — кажа Вячаслаў Красоўскі. — У той жа час дысплазія суставаў, якая засталася без увагі бацькоў і ўрачоў у першы год жыцця, ужо на другі-трэці год можа сфарміраваць у дзіцяці цяжкія запаленчыя працэсы, хваравіты вывіх сцягна і ў будучым — кульгавасць на ўсё жыццё.

Дысплазія тазасцегнавога сустава — гэта прыроджанае парушэнне працэсу ўтварэння сустава, якое можа стаць прычынай вывіху галоўкі сцягна. Спрыяльнымі фактарамі ўзнікнення захворвання з'яўляюцца спадчыннасць, гінекалагічныя хваробы маці і паталогія цяжарнасці. Заўважана і сувязь з экалагічнай сітуацыяй.

— Дысплазія ў 10 разоў часцей сустракаецца ў дзяцей, калі іх бацькі мелі прыкметы прыроджанага вывіху сцягна, а таксама калі ў жанчыны падчас цяжарнасці было тазавае перадляжанне плода, найчасцей падчас першых родаў. Часта захворванне з'яўляецца наступствам медыкаментознай карэкцыі цяжарнасці ці таксікозу, — тлумачыць Вячаслаў Красоўскі. — Часцей захворванне пашкоджвае левы тазасцегнавы сустаў (60 %), радзей правы (20 %) ці абодва (20 %). Паколькі дысплазія можа стаць прычынай парушэння функцыі канечнасці і нават інваліднасці, то лячыць яе важна ў раннім перыядзе жыцця дзіцяці.

Папярэдні дыягназ можа быць выстаўлены яшчэ ў радзільным доме. У гэтым выпадку трэба цягам трох тыдняў звярнуцца да дзіцячага артапеда, які правядзе неабходнае абследаванне і складзе схему лячэння. Акрамя таго, для выключэння гэтай паталогіі ўрачы аглядаюць усіх дзяцей ва ўзросце 1-4 месяцаў. Пры падазрэннях на дысплазію накіроўваюць на дадатковыя абследаванні. Ультрагукавая дыягностыка з'яўляецца сёння добрай альтэрнатывай рэнтгеналагічнаму даследаванню такіх дзетак. Яна бяспечная і дастаткова інфарматыўная.

Асноўны метад прафілактыкі дысплазіі — шырокае спавіванне. А для лячэння выкарыстоўваюцца артапедычныя прылады, якія надзейна фіксуюць ножкі дзіцяці ў сагнутым і разведзеным выглядзе. Гэта розныя шыны, пластыкавыя гарсэты і нават гіпсавыя фіксатары. Самая папулярная фіксуючая прылада — так званае стрэмя Паўліка, названае ў гонар чэшскага ўрача-артапеда, які яго стварыў. Не абысціся з такім дыягназам без масажу і гімнастыкі. Канкрэтным практыкаванням і прыёмам вас навучыць лечачы артапед, паколькі іх набор строга залежыць ад таго, як менавіта недафарміраваны сустаў. Выкарыстанне пераносак, слінгаў, рукзакоў і аўтакрэслаў не забаронена, але выбіраць варта тыя мадэлі, якія дазваляюць малому свабодна трымацца, шырока расставіўшы ногі. Дарэчы, у краінах Азіі і Афрыкі, дзе жанчыны традыцыйна носяць сваіх немаўлят на сабе, прымацоўваючы іх на спіну ці на жывот (дзіця ўвесь час праводзіць седзячы, з шырока расстаўленымі ножкамі), такой з'явы, як дысплазія тазасцегнавога сустава ў дзяцей, увогуле не існуе.

— Трэба ўсведамляць, што лячэнне дысплазіі — справа не хуткая. Як правіла, яно займае некалькі месяцаў, а часам і год-паўтара, — папярэджвае Вячаслаў Красоўскі. — Бо тазасцегнавы сустаў не можа прыняць правільнае становішча і абрасці звязкамі за некалькі дзён. Таму лячэнне і рэкамендацыі ўрача варта выконваць пастаянна, пакуль іх не адменяць.

Зразумела, бацькам не вельмі прыемна штодня «стрыножваць» сваё дзіця артапедычнымі прыладамі, а на ноч спавіваць з падушкай паміж ножак ці «закоўваць» у пластыкавы гарсэт. Але вашы старанні і цярпенне таго вартыя. Гэты час хутка пройдзе, і здаровае дзіця парадуе вас першымі крокамі.

Алена КРАВЕЦ

Выбар рэдакцыі

Культура

Як  мастак Май Данцыг ствараў свае карціны

Як мастак Май Данцыг ствараў свае карціны

Наватар, «шасцідзясятнік», ваяўнічы аптыміст — гэта ўсё пра яго.

Грамадства

Як ператварыць звычайны ўрок беларускай літаратуры у творчую майстэрню?

Як ператварыць звычайны ўрок беларускай літаратуры у творчую майстэрню?

Настаўнікі ўпэўнены: ці будуць вучні чытаць, у многім залежыць ад іх саміх. 

Эканоміка

Петришенко: Называть ЕАЭС экономическим союзом сегодня можно только авансом

Петришенко: Называть ЕАЭС экономическим союзом сегодня можно только авансом

Однако наша страна надеется, что это временные трудности.

Грамадства

Апублікаваны поўны тэкст Канцэпцыі інфармацыйнай бяспекі Беларусі

Апублікаваны поўны тэкст Канцэпцыі інфармацыйнай бяспекі Беларусі

Дзяржаўным органам і іншым арганізацыям даручана кіравацца палажэннямі канцэпцыі ў практычнай дзейнасці.