Вы тут

Формула кіравання жыллём: давер уласнікаў, дапамога дзяржавы і прафесіяналы


У Беларусі створаць школу навучання спецыялістаў па кіраванні нерухомасцю, перад пачаткам капрамонту будуць праводзіць грамадскія слуханні па тарыфах жыллёва-камунальных паслуг, а мясцовыя ўлады, якія займаюцца пытаннямі дзейнасці таварыстваў уласнікаў, стануць павышаць свае веды. Пра змены ў Жыллёвы кодэкс Беларусі, неабходнасць дыялогу паміж уладамі і ўласнікамі, абавязковую дапамогу дзяржавы і шмат што іншае гаварылі ўдзельнікі канферэнцыі па прафесійным кіраванні жыллём, якую сёлета ўжо дзявяты раз арганізавала Міжнародная асацыяцыя менеджменту нерухомасці (МАМН).


Прыватнае паветра ў сценах агульнай уласнасці

Каб зацікавіць гаспадароў кватэр у клопаце пра ўласнае жыллё, трэба заваяваць іх давер і ўпэўніць, што ўсё, што робіцца дзяржавай, — дзеля іх і на доўгатэрміновую перспектыву. Рамачныя ўмовы, якія можа забяспечыць улада, добрая заканадаўчая база і давер уласнікаў, — формула, якая дазволіць дасягнуць прафесійнага кіравання жыллём у Беларусі. Так мяркуюць нямецкія спецыялісты, якія дапамагаюць наладжваць у нашай краіне палітычны дыялог і адаптаваць свой вопыт пры актуалізацыі беларускага заканадаўства.

— Слухаючы адно аднаго, мы вырашылі праблемы, якія былі ў нас у Германіі, і я ведаю, як з дапамогай палітычнага дыялогу дасягнуць гэтага тут. З аднаго боку, дырэктыўнымі рашэннямі зверху нічога не дасягнуць без падтрымкі людзей, з другога — незадаволенасць уласнікаў нічога не вырашыць без падтрымкі зверху, — упэўнены Вернэр МЕРКЕЛЬ, старшыня праўлення МАМН.

Сапраўды, у адзіночку ні дзяржава, ні ўласнік нічога не зробяць. З такім меркаваннем згодны ўсе ўдзельнікі канферэнцыі з васьмі краін, якія таксама маюць вопыт прыватызацыі і цяжкасцяў, з якімі яны сутыкнуліся. Спецыялісты ўпэўнены: забяспечыць неабходныя рамачныя ўмовы — задача дзяржавы, аднак пры гэтым яе ўдзел у жыцці ўласнікаў павінен абмяжоўвацца прынцыпам: столькі, колькі неабходна, але па магчымасці мала.

— Кватэра — толькі частка будынка, яна можа існаваць, толькі калі захоўваецца дом, — мяркуе Вернэр Меркель. — Тое, што чалавек набывае ва ўласнасць, — фактычна паветра, у межах якога можна рухацца і якое з усіх бакоў абкружана агульнай уласнасцю, асобна ад якой існаваць нельга. Неабходна дэкларацыя аб падзеле агульнай уласнасці, каб было разуменне, дзе агульная маёмасць, а дзе — прыватная.

Падтрымка дзяржавы патрэбна яшчэ і для таго, каб чалавек не адчуваў, што яго зрабілі ўласнікам прымусова. Прыватнага жылля ў Беларусі 94 %, аднак многія, пэўна, хацелі б ім не валодаць, а арандаваць на добрых умовах. Асабліва тыя, у каго няма сродкаў выконваць доўгатэрміновыя абавязкі ўласніка па аплаце паслуг і захаванні дома ў належным стане.

Пяць дзён на экзамен і 56 гадзін на навучанне

Прафесійных кіраўнікоў нерухомасцю ў нашай краіне дагэтуль не хапае. Няма прафесіяналаў з практычным вопытам, якія падрыхтавалі б адпаведных кваліфікаваных кіраўнікоў. Тым не менш Міністэрства ЖКГ прызнае, што кіраванне — гэта асноватворная паслуга, з дапамогай якой забяспечваюцца ўсе працэсы, звязаныя з эксплуатацыяй шматкватэрнага жылля, а прафесіяналізм у кіраванні — аснова якаснага абслугоўвання і камфортнага пражывання. Гэта дазваляе спадзявацца, што неўзабаве мы займеем кіраўнікоў, веды якіх будуць атрыманы не за два тыдні перакваліфікацыі, як цяпер, а на базе прафесійнай адукацыі.

Прафесія спецыяліста па кіраванні нерухомасцю сумеснага домаўладання абазначана ў Адзіным кваліфікацыйным даведніку пасад служачых. Сумесна з Мінжылкамгасам распрацавана дарожная карта, на падставе якой у наступным годзе пачнуць ствараць сваю беларускую школу навучання кіраўнікоў. І рабіць гэта трэба на базе каледжаў пры атрыманні трохгадовай сярэдняй спецыяльнай адукацыі, каб з часам падрыхтаваная моладзь змагла замяніць некваліфікаваных кіраўнікоў, якія цяпер часта абіраюцца на сходзе ўласнікаў з жыхароў-пенсіянераў, мяркуе Генадзь КАЛЁНАЎ, выканаўчы дырэктар МАМН.

— Дзяржаве жыццёва неабходны такі крок, бо рыхтаваць трэба не толькі кадры кіраўнікоў для таварыстваў уласнікаў (ТУ), а і спецыялістаў жыллёва-камунальных службаў. Сённяшнія курсы павышэння кваліфікацыі спецыялістаў сумежных прафесій, на якія даецца ў лепшым выпадку 56 гадзін навучання, — дыскрэдытуюць саму ідэю прафесіі спецыялістаў па кіраванні нерухомасцю. Такі чалавек пачынае працаваць, робіць памылкі, і, як вынік, кажуць, што ідэя самакіравання кепская. У Германіі пасля каледжа толькі экзамен у гандлёва-прамысловай палаце займае пяць дзён, а ў нас за два дні рыхтуюць спецыяліста?! А вось у каледжы моладзь за тры гады зможа атрымаць веды і вопыт, каб без практычных памылак кіраваць нерухомасцю.

Вучыць і рэалізоўваць

З неабходнасцю прафесіяналізацыі кіраўнікоў нерухомасцю, набыцця ведаў, якія можна атрымаць толькі шляхам перадачы вопыту, напрацаванага гадамі, і дыялогу з уласнікамі цалкам згодны і ў Міністэрстве ЖКГ.

— Улада павінна дапамагчы ўласнікам прыняць рашэнне, калі яны не могуць вызначыцца самастойна. Людзі павінны быць забяспечаны нармальнымі паслугамі, — лічыць Генадзь ТРУБІЛА, першы намеснік міністра ЖКГ. — Пры распрацоўцы змен у Жыллёвы кодэкс было шмат нюансаў і спрэчак, асабліва наконт павышэння патрабаванняў да старшынь праўленняў ТУ і іх прафесійнай падрыхтоўкі. Аднак нашы прапановы і вынікі дыялогу з прадстаўнікамі МАМН адлюстраваны ў праекце кодэкса, які будзе заслуханы ў Палаце прадстаўнікоў Нацыянальнага сходу ў другім чытанні.

Скаргі на дзейнасць таварыстваў, з аднаго боку, звязаны з адсутнасцю кантролю мясцовымі ўладамі, з другога — недастатковым залучэннем уласнікаў у кіраванне сваім жыллём як удзельнікаў працэсу, а не назіральнікаў збоку. Менавіта таму сярод планаваных змен прадугледжана трансфармацыя ролі мясцовых выканкамаў з апякунскай на арганізатарскую. З гэтай нагоды мяркуецца арганізаваць навучанне і павышэнне кваліфікацыі спецыялістаў райвыканкамаў і адміністрацый раёнаў у гарадах, якія займаюцца пытаннямі дзейнасці ТУ, каб вызначыць крытэрыі ацэнкі ведаў такіх людзей, дадаў ён.

У планах у МАМН таксама нямала. Асацыяцыя рыхтуе брашуру «Жыллёвыя асацыяцыі: традыцыі, навацыі, стратэгія і ўстойлівасць», у якой будуць адлюстраваны напрацоўкі і рэкамендацыі шматгадовага супрацоўніцтва з нямецкімі спецыялістамі, адаптаваныя да беларускіх рэалій. Мяркуецца таксама ўкараніць у практыку спецыяльныя правілы да пачатку будаўніцтва і праектавання дома, а таксама замацаваць у законе ідэю даць магчымасць кіраваць нерухомасцю канфесійным арганізацыям.

Ірына СІДАРОК

Выбар рэдакцыі

Грамадства

Што паглядзець у Хоцімску?

Што паглядзець у Хоцімску?

У Хоцімску нават ёсць кола агляду.

Грамадства

«За больш чым сем год былі ўсяго адны суткі без баявога выезду»

«За больш чым сем год былі ўсяго адны суткі без баявога выезду»

Гісторыя кар'еры падпалкоўніка ў адстаўцы Генадзя Цімахоўцава.

Палітыка

Беларусь і ЕС падпішуць візавае пагадненне не пазней за 2 лютага 2020 года

Беларусь і ЕС падпішуць візавае пагадненне не пазней за 2 лютага 2020 года

Верагодна, гэта адбудзецца ўжо ў гэтым лістападзе. 

Грамадства

Як праходзіў ваенна-гістарычны фестываль «Мір-1812»

Як праходзіў ваенна-гістарычны фестываль «Мір-1812»

Трэці раз ваенна-гістарычны фестываль «Мір-1812» на два дні перанёс пасёлак больш чым на два стагоддзі назад.