Вы тут

На конкурсе ІNSРО 2018 беларусы заваявалі «серабро» і «бронзу»


У пачатку кастрычніка ў Стамбуле (Турцыя) праходзіў міжнародны конкурс навуковых работ Іntеrnаtіоnаl Sсіеnсе рrоjесt Оlуmріаd, ІNSРО 2018. Беларускія школьнікі ўдзельнічалі ў ім упершыню і прывезлі дадому высокія ўзнагароды — «серабро» і «бронзу».


ІNSРО з'яўляецца найбуйнейшым у рэгіёне форумам маладых вучоных, які праводзіцца з 2007 года пад патранатам міністэрства адукацыі Турцыі. З 2014 года ІNSРО набыў міжнародны статус. Сёлета конкурс аб'яднаў 26 краін-удзельніц, на ім было прадстаўлена 68 праектаў з больш чым 200, адабраных па выніках папярэдняй экспертызы членамі журы з ліку міжнародных экспертаў.

Абарона праектаў праходзіла ў чатырох секцыях: «Здароўе», «Інжынірынг», «Навакольнае асяроддзе» і «Энергія». Па ўмовах конкурсу прадстаўленая даследчая работа павінна быць выканана ўдзельнікамі самастойна, быць цалкам завершанай і мець практычную значнасць.

Навучэнцы аб'яднання па інтарэсах «Батаніка і прыкладная біялогія» Рэспубліканскага цэнтра экалогіі і краязнаўства Уладзіслаў Андрайчук і Паліна Кракасевіч выконвалі свае навуковыя даследаванні пад кіраўніцтвам педагога дадатковай адукацыі Алесі Аляксандраўны Шавялёвай у перыяд з верасня 2016 года па май гэтага года.

Навучэнцы прэзентавалі свае праекты ў двух фарматах: у выглядзе стэндавай абароны з загадзя падрыхтаваным дакладам і ў гутарцы з членамі журы. У ходзе прэзентацый тыя маглі задаваць любыя пытанні па тэме даследавання. Паколькі рабочай мовай конкурсу з'яўляецца англійская, ад удзельнікаў патрабавалася не толькі глыбокае валоданне прадметам даследавання, але і выдатнае веданне профільнай лексікі англійскай мовы.

Акрамя прэзентацыі ўласных праектаў, беларускія школьнікі атрымалі ўнікальную магчымасць пазнаёміцца з навуковымі работамі навучэнцаў з іншых краін, пагутарыць з навукоўцамі-эколагамі і аднагодкамі ў нефармальнай абстаноўцы, абмяняцца ідэямі, а на Дні культур паказаць народныя традыцыі Беларусі, пачаставаць усіх удзельнікаў конкурсу стравамі нацыянальнай кухні.

Па выніках прадстаўлення навуковых работ Уладзіслаў Андрайчук быў адзначаны сярэбраным медалём у секцыі «Інжынірынг» за свой праект «Аэрафільная водарасць Trеntероhlіа Umbrіnа Kutz як новы перспектыўны біятэхналагічны аб'ект», а Паліна Кракасевіч — бронзавым медалём у секцыі «Здароўе» за праект «Ацэнка антыфунгальных і кансервавальных уласцівасцяў міцэлію базідыяміцэтаў у працэсе вытворчасці касметыкі».

Акрамя гэтага, Рэспубліканскі цэнтр экалогіі і краязнаўства атрымаў магчымасць стаць афіляванай арганізацыяй конкурсу. Гэта азначае, што ў далейшым два праекты, выкананыя пад кіраўніцтвам педагогаў цэнтра, будуць дапушчаныя да ўдзелу ў конкурсе без папярэдняга ацэньвання.

Надзея НІКАЛАЕВА

Выбар рэдакцыі

Грамадства

Як сучасныя палешукі рыхтуюцца да свята Уваскрэсення Хрыстовага

Як сучасныя палешукі рыхтуюцца да свята Уваскрэсення Хрыстовага

Аўтар «Звязды» расказвае на прыкладзе сваёй сям'і.

Культура

ЗЕНА: Ад сцэны не стамляюся!

ЗЕНА: Ад сцэны не стамляюся!

Графік у артысткі вельмі насычаны.

Грамадства

Звыклыя выключнасці. Ці можна зразумець «лічбавае племя»?

Звыклыя выключнасці. Ці можна зразумець «лічбавае племя»?

Даследаванне «Пакаленне «Z» у пытаннях і адказах» было прадстаўлена падчас навуковага стэндапа, арганізаванага для навучэнцаў профільных педагагічных класаў у БДПУ.

Грамадства

Ежа ці сімвал? Самы час зацікавіцца роспісам яек

Ежа ці сімвал? Самы час зацікавіцца роспісам яек

Карэспандэнт «Звязды» схадзіла на майстар-клас па стварэнні «пісанак».