Вы тут

Беларускія тэнісісткі згуляюць са славацкімі


26—27 кастрычніка пройдзе матч другога раўнда плэй-оф І групы Еўра-Афрыканскай зоны Кубка Дэвіса Славакія — Беларусь. Сустрэчы тэнісістаў дзвюх камандаў адбудуцца на корце Нацыянальнага тэніснага цэнтра NTC Aegon Arena ў Браціславе. Нашы сапернікі выбралі для будучага матча грунтавое пакрыццё. Капітан беларускай каманды Уладзімір Валчкоў абвясціў спіс гульцоў, якія прымуць удзел у паядынках. Гэта Ілья Івашка, Ягор Герасімаў, Яраслаў Шыла, Аляксандр Згіроўскі і Максім Мірны. Адзначым, што беларусы сёння займаюць 32-е месца ў рэйтынгу камандаў у Кубку Дэвіса.


Каманда Славакіі ў гэтым спісе знаходзіцца крыху ніжэй — на 35-й пазіцыі. Дома яны выступяць такім складам: Марцін Кліжан, Лукаш Лацка, Філіп Полашэк, Норберт Гомбаш, Ігар Зеленай, капітан каманды — Дамінік Хрбаты.

Нагадаем, найлепшым вынікам для беларускай каманды ў Кубку Дэвіса з'яўляецца выхад у паўфінал Сусветнай групы ў 2004 годзе, а найлепшым у славакаў лічыцца выхад у фінал у розыгрышы 2005 года. Тады на дамашняй арэне ва ўпартым паядынку яны саступілі зборнай Харватыі з лікам 2:3.

На старце цяперашняга сезона ў лютым беларускія тэнісісты прайгралі ў Санкт-Пёльтэне камандзе Аўстрыі з «сухім» лікам 0:5, а ў сярэдзіне верасня ў Маскве саступілі расіянам — 2:3. Славакі ў гэтым сезоне правялі адзін матч, прайграўшы ў пачатку красавіка на сваёй арэне камандзе Босніі і Герцагавіны — 2:3. Гісторыя сустрэч Беларусі і Славакіі налічвае адзін паядынак, ён адбыўся ў верасні 2010 года на кортах Палаца тэніса ў Мінску. На аналагічнай стадыі ў барацьбе за захаванне прапіскі ў І групе Еўра-Афрыканскай зоны наша каманда саступіла славацкім тэнісістам з лікам 1:4. За зборную Беларусі ў тым матчы гулялі Уладзімір Ігнацік, Максім Мірны, Сяргей Бетаў і Андрэй Васілеўскі. Прайграўшы тую матчавую сустрэчу, беларусы апусціліся ў дывізіён рангам ніжэй і пачыналі наступны сезон з ІІ групы Еўра-Афрыканскай зоны.

Дар'я ЛАБАЖЭВІЧ

Выбар рэдакцыі

Культура

Акцёр Віктар Манаеў: Жыццё само па сабе з'яўляецца камедыяй

Акцёр Віктар Манаеў: Жыццё само па сабе з'яўляецца камедыяй

Размова пра сучаснае стаўленне да культуры, гастролі Купалаўскага тэатра ў савецкія часы і здымкі ў фільме «Ідзі і глядзі».

Грамадства

Зваршчык з Мсціслава стварае ўнікальныя жалезныя скульптуры

Зваршчык з Мсціслава стварае ўнікальныя жалезныя скульптуры

Аляксандра Папова ў Мсціславе ведаюць усе.

Калейдаскоп

Вясёлыя гісторыі чытачоў

Вясёлыя гісторыі чытачоў

Пра куфэрак и вяртанне блуднага мужа.