З павагай да настаўніка

У пачатку лістапада Дом літаратара сустрэне настаўнікаў беларускай і рускай мовы і літаратуры творчай праграмай. У выкананні паэтаў Міхася Пазнякова, Міколы Мятліцкага, Навума Гальпяровіча, Аліны Легастаевай, Ірыны Карнаухавай прагучаць вершы пра Радзіму, пра лепшыя чалавечыя пачуцці. Артысты рыхтуюць песні на словы беларускіх паэтаў.

— Вывучэнне літаратуры ў школе і ў навучальных установах — гэтае пытанне хвалюе Саюз пісьменнікаў і разглядаецца як адно з найбольш актуальных, — распавяла першы намеснік старшыні Саюза пісьменнікаў Беларусі Алена Стэльмах. — Бо традыцыйна больш грунтоўнае знаёмства з лепшымі творамі айчыннай і замежнай класікі, сучасных пісьменнікаў звязана менавіта са школьнай праграмай.

Цяпер Нацыянальны інстытут адукацыі Міністэрства адукацыі шукае больш творчыя формы вывучэння літаратуры. На думку Алены Стэльмах, гэта важна яшчэ і для таго, каб не страціўся інтарэс да кнігі. У прыватнасці, зараз ідзе працэс перагляду праграм па беларускай літаратуры для вучняў 9—11 класаў. Саюз пісьменнікаў Беларусі гатовы дапамагчы сваімі прапановамі.

Марыя ЛІПЕНЬ