Вы тут

Лукашэнка прыме ўдзел у асноўнай дыскусіі на Мюнхенскай канферэнцыі


Сустрэча Асноўнай групы Мюнхенскай канферэнцыі па бяспецы стартуе сёння ў Мінску. У адкрыцці форуму і дыскусійнай сесіі "Адносіны Усход-Захад" прыме ўдзел Прэзідэнт Беларусі Аляксандр Лукашэнка. Гэтую інфармацыю БЕЛТА пацвердзілі ў прэс-службе кіраўніка дзяржавы.

Беларуская сталіца ўпершыню прымае сустрэчу гэтага форуму. Мюнхенскі фармат зарэкамендаваў сябе як адзін з найбуйнейшых і найаўтарытэтнейшых форумаў у свеце па супрацоўніцтве ў ваенна-палітычнай сферы.


 

Таму, безумоўна, гэта сустрэча — з шэрагу самых значных палітычных падзей за год у Беларусі. У форуме прымаюць удзел прэзідэнты Беларусі, Арменіі, прэм’ер-міністры Малдовы, Сербіі, кіраўнікі знешнепалітычных ведамстваў, прадстаўнікі міжнародных ваенных арганізацый і, канешне, вядучыя спецыялісты ў сферы бяспекі. Фармат дыялогу, у якім супольна задзейнічаны і эксперты, і афіцыйная ўлада, атрымаў назву “паўтарачнага ўзроўню” дыпламатыі. Унікальнасць яе ў тым, што афіцыйныя перагаворы ўлады значна фармалізаваныя, а дыскусіі экспертаў часам адарваныя ад рэальнасці. Ад сумяшчэння двух гэтых трэкаў чакаюцца найбольш якасныя і прадуктыўныя вынікі.

Секцыі Асноўнай групы праводзіліся ў разнастайных пунктах свету — Пекіне, Вене, Нью-Дэлі, Тэгеране, апошні раз  — у Вашынгтоне. Рашэнне здзейсніць сустрэчу ў Мінску  — па-першае, прызнанне напрацовак Беларусі ў дасягненні міру ў “гарачых кропках" рэгіёна (тут дарэчы ўспомніць пра Трохбаковую кантактную групу па Украіне і Мінскую групу АБСЕ  па ўрэгуляванні Карабахскага канфлікту). Па-другое, мае значэнне і знаходжанне краіны — паміж Захадам і Усходам, таму ўзаемаадносіны гэтых рэгіёнаў стануць вядучай тэмай для абмеркавання.

Градус сустрэчы, на думку спецыялістаў-міжнароднікаў, дадае рашэнне Злучаных Штатаў выйсці з дагавора аб РМСД і планы размясціць у Польшчы ваенную базу, якая атрымае назву “Форт Трампа”.

З нагоды візіту на “мінскую” Мюнхенскую канферэнцыю прэзідэнта Арменіі Армэна Саркісяна магчыма, што ў пэўных колах будзе абмяркоўвацца і Карабахскі канфлікт. “І ў Азербайджане з насцярожанасцю глядзяць за развіццём палітычных падзей, якія адбываюцца ў Арменіі. І Арменія вельмі акуратна, вельмі насцярожана шукае пункты судакранання ў вядзенні далейшых перагавораў па гэтым пытанні з Азербайджанам. Для нас, можна сказаць, гэта цяпер краевугольны камень вядзення палітыкі Арменіі”, — адзначыла эксперт, ветэран органаў бяспекі Арменіі  Марына Мкртчан падчас відэамосту, прысвечанага сустрэчы Асноўнай групы Мюнхенскай канферэнцыі, у прэс-цэнтры Sputnik Беларусь.

Як вядома, эканоміка з палітыкай заўсёды ходзяць разам, таму адна з тэм сустрэчы будзе закранаць эканамічную сітуацыю ва Усходняй Еўропе. У гэтым ракурсе найбольш актуальна гучыць праблематыка санкцый, узаемаадносіны ЕАЭС і Еўрапейскага саюза.

Важнае дасягненне сустрэчы ў Мінску — увогуле з’яўленне дыялогу. Як  адзначаюць эксперты, мы жывём у той час, калі сам факт размовы, дыскусіі супрацьлеглых бакоў — ужо навіна. “Адзінае, што мы сёння можам зрабіць для таго, каб сітуацыя не пагоршылася, а па магчымасці і паляпшалася, — набрацца цярпення і сфакусавацца на тым мінімуме пазітыўных ідэй, якія прымальныя для ўсіх бакоў і дапамогуць адсунуць на другі план той велізарны недавер і супярэчнасці. У цэлым зразумела, калі разбураецца сістэма кантролю над зброяй і сістэма стратэгічнай стабільнасці, якая на працягу дзесяцігоддзяў была краевугольным каменем міру і бяспекі на ўсёй планеце, гэта і павінна стаць тым сінэргічным эфектам”, — такім бачыць практычныя вынікі работы Асноўнай групы кіраўнік экспертнай ініцыятывы "Мінскі дыялог" Яўген Прэйгерман.

Ці знойдуць агульную мову афіцыйныя ўлады і эксперты, ці выпрацуюць прымальныя для ўсіх бакоў ідэі бяспекі і супрацоўніцтва, убачым па выніках форуму, якія падвядуць ужо ў чацвер. Але пацвярджэннем таго, што дыскусіі будуць насамрэч насычанымі і плённымі — шэраг аўтарытэтных гасцей. Сярод іх заяўлены генеральны сакратар АБСЕ Томас Грэмінгер, еўракамісар па еўрапейскай палітыцы суседства і перагаворах аб пашырэнні ЕС Ёханес Хан, першы намеснік прэм’ер-міністра Азербайджана Ягуб Эйюбаў.

Падрабязней пра сустрэчу Асноўнай групы Мюнхенскай канферэнцыі па бяспецы чытайце ў наступных нумарах “Звязды”.

Марыя ДАДАЛКА

Выбар рэдакцыі

Грамадства

Успаміны былой вязніцы пра Саласпілскі лагер смерці

Успаміны былой вязніцы пра Саласпілскі лагер смерці

Яна добра памятае той летні дзень. За акном сталі чутныя роў матацыклаў і нямецкая гаворка.

Грамадства

Першыя беларускія Соdе Сlub далучыліся да сусветнага руху

Першыя беларускія Соdе Сlub далучыліся да сусветнага руху

Як з дапамогай кода стварыць уласную анімацыю і «ажывіць» касмічны карабель? 

Грамадства

Як Віцебшчына развівае стасункі з Кітаем

Як Віцебшчына развівае стасункі з Кітаем

Наш карэспандэнт пастараўся згадаць самыя цікавыя прыклады сумеснай рэалізацыі праектаў.

Спорт

Анастасія Мірончык-Іванова: «Веру ў сябе і ў свае сілы»

Анастасія Мірончык-Іванова: «Веру ў сябе і ў свае сілы»

У спорце ёй двойчы прыходзілася пачынаць усё спачатку.