Вы тут

Барбер з Мінску расказвае пра сваю працу


Моднае цяпер слова прыйшло да нас з англійскай мовы. У перакладзе — цырульнік. А англійскае слова ўтворана ад лацінскага bаrbа, што ў сваю чаргу азначае «барада». Барбер — гэта чалавек, якому сучасны мужчына можа смела даверыць стрыжку, афармленне вусоў, барады або зрабіць сабе «каралеўскае» галенне. Сёння мы пазнаёмімся з барберам Аляксандрам Кудрыцкім з аднаго са сталічных барбершопаў і даведаемся пра самае цікавае ў яго працы.


— Стрыгчы я пачаў з 14 гадоў. Калі збіраліся з сябрамі ў двары, яны давяраліся мне, нягледзячы на тое, што былі і кур'ёзныя моманты. Аднойчы ў сябра пасля маёй чарговай аўтарскай стрыжкі ўся галава была ў шрамах і цякла кроў. Але ніхто не злаваўся, было весела. Калі я ўжо дакладна вырашыў, што хачу быць цырульнікам, бацькі, аднакласнікі, многія сябры круцілі галавой і казалі: «Гэта не мужчынская прафесія». Затое цяпер ніхто не дзівіцца і не асуджае, наадварот, распытваюць з цікавасцю і просяць запісаць іх да мяне, каб падстрыгчы бараду або зрабіць класную прычоску, — кажа Аляксандр.

Як стаць барберам? «Можна скончыць сярэднюю спецыяльную навучальную ўстанову па спецыяльнасці «Цырульніцкае майстэрства», а можна прайсці адпаведныя курсы. Глядзець на «Юцюбе» розныя відэаролікі, хадзіць на семінары, майстар-класы — таксама дапамога ў навучанні. Яшчэ адзін спосаб — папрацаваць памочнікам у дасведчанага спецыяліста. Важная ўмова — стараннасць, мэтанакіраванасць, і будзе плён», — раіць суразмоўнік.

Інструменты для барбера — важныя рэчы. Кожны работнік атрымлівае ў салоне фен і машынкі для стрыжкі, а вось астатняе трэба дакупляць самастойна. «З кожным разам разумею, што трэба ўсё больш, а кошт прылад для стрыжак зусім не нізкі». Дарэчы, якая розніца паміж назвамі «барбер» і «цырульнік»? Аляксандр кажа, што па сутнасці яе няма, але некаторыя адрозненні ў працы першых і другіх прысутнічаюць. У барбершопе аказваюць абмежаваны спектр паслуг — там працуюць выключна з мужчынамі: голяць небяспечнай брытвай, робяць стайлінг барады і вусоў. У некаторых асабліва модных установах таксама прадаюць аксесуары і нават адзенне для мужчын, а яшчэ могуць зрабіць татуіроўку або пірсінг.

— У нас працуе выключна мужчынскі калектыў, таму размовы паміж майстрам і кліентам ідуць на адпаведныя тэмы. Дарэчы, стасункі — неад'емная частка працы барбера. Для мяне не праблема пачаць размову з новым кліентам, але заўсёды гляджу, як настроены сам чалавек: адзін нясе станоўчую энергетыку і гатовы жартаваць, а другі пануры і закрыты, тады я разумею, што лезці не трэба, — гаворыць Аляксандр. — У нашым барбершопе праводзяцца сумесныя майстар-класы, часам мяне запрашаюць правесці семінар, падзяліцца вопытам, якога ў мяне набралася ўжо 16 гадоў. Напрыклад, калі на стрыжку барберу даецца гадзіна, я за гэты час і стрыжку раблю, і бараду стрыгу. Часта прыходзяць хлопцы з канкрэтным фота і кажуць: «Я хачу так». У большасці выпадкаў гэта можна паўтарыць і зрабіць усё крута, але бывае, што стрыжка не падыходзіць для канкрэтнай формы галавы або ў чалавека ад прыроды прабор на правы бок, а ён хоча на левы. Таму я прапаноўваю альтэрнатыву, пераконваючы, чаму лепш зрабіць па-іншаму.

У мяне стрыгуцца вядомыя спартсмены, спевакі, бізнесмены, музыканты, рэжысёры, простыя кліенты. Прыходзяць як хлопчыкі 11—12 гадоў, так і людзі за 50. Кожны дзень — новы вопыт, сяброўства, незабыўныя эмоцыі. Барбер — чалавек творчы, з тонкім густам і прасторавым мысленнем. Як і ў любым рамястве, трэба набірацца вопыту, не баяцца працаваць з людзьмі і пастаянна ўдасканальвацца. Я падтрымліваю стасункі са знаёмымі з розных краін і магу сказаць, што многія хваляць беларусаў за працаздольнасць і высокі ўзровень майстэрства.

Дар'я ШЛАПАКОВА, студэнтка ІV курса факультэта журналістыкі БДУ

Загаловак у газеце: Барбер — «укарачальнік» барады

Выбар рэдакцыі

Культура

У нядзелю яўрэі святкуюць Новы год дрэў

У нядзелю яўрэі святкуюць Новы год дрэў

На гэта свята асаблівым чынам спажываюць розную садавіну, запіваючы келіхамі добра разбаўленага віна.

Грамадства

Як задаволіць кадравы голад у сферы ІТ?

Як задаволіць кадравы голад у сферы ІТ?

Работадаўцы кажуць, што быць добрым праграмістам і ўмець пісаць код для эфектыўнай работы ўжо недастаткова.

Культура

Балельшчыкі II Еўрапейскіх гульняў ужо рэзервуюць вясковыя гатэлі

Балельшчыкі II Еўрапейскіх гульняў ужо рэзервуюць вясковыя гатэлі

«Адышоў час, калі гасцям патрэбныя былі толькі «чарка і скварка», ім ужо цікавыя музеі, культурная праграма».