Вы тут

Гутарка з пісьменніцай Кацярынай Оаро


Ёсць людзі, якія натхняюць сваімі выказваннямі, дзеяннямі, думкамі... Часцей за ўсё гэта любімыя паэты, пісьменнікі, мастакі, палітыкі. А ёсць тыя, хто не проста натхняе, але і вучыць гэтаму іншых. Сярод такіх — пісьменніца і выкладчык пісьменніцкага майстэрства Кацярына Оаро. Мяккая і далікатная, шчырая і адкрытая, яна з лёгкасцю набывае новых сяброў.


«Дагэтуль на старонцы быў сухі тэкст, — так пачынаецца прадстаўленне Кацярыны на яе асабістым бізнес-сайце «Натхніць на раман». — Вучылася на факультэце журналістыкі і ў Літаратурным інстытуце імя М. Горкага. Выдала кніжку, за якую атрымала прэмію. Выкладала, пісала, рэдагавала, знаходжуся... Але мне хочацца змяніць інтанацыю і прапанаваць вам гарбату». За гэтым сказам — цэлая захапляльная гісторыя жыцця жанчыны ад маленства да сённяшніх дзён. Як вы маглі зразумець, банальныя, нікому не цікавыя ці занадта ўзвышаныя тэксты — гэта не пра Кацярыну. У кожным запошчаным на сайце матэрыяле — цікавінка, якая прываблівае не толькі тых, хто хоча навучыцца пісаць кнігі, але і больш вопытных, самадастатковых.

Піша пра сваё маленства: у сем гадоў пераехала з Крыма ў Беларусь — і факт разбаўляе сваімі пачуццямі, перажываннямі, успамінамі. «Тут я ўпусціла кавун... А тут мы падцягваліся з суседам на галінцы інжыра, каб ухапіць ротам ягады», — успамінае яна самыя дарагія ёй месцы ў любімым горадзе. Далей жвава расказвае пра сваю першую, зробленую самастойна для выратавання ад суму дзіцячую газету. Пра арганізаваны гурток па журналістыцы для школьнікаў, які ператварыўся ў сапраўдную «літаратурную майстэрню». Актыўная і жыццярадасная, яна яшчэ падчас вучобы паспела знайсці працу па душы — на радыё. Калі ёй стала не хапаць творчасці, не пабаялася паступіць у Маскоўскі літаратурны інстытут. Пасля завяла свой блог, а потым і сайт, дзе прапаноўвала ахвотным навучыцца пісьменніцкаму майстэрству. Зараз сайт «Натхніць на раман» папаўняецца цікавымі фактамі, мастацкімі тэкстамі Кацярыны, яе разважаннямі. Паколькі жанчына жыве ў Францыі, заняткі могуць праходзіць па відэа-канферэнц-сувязі, што ў наш час — даволі распаўсюджаная практыка.

Калі выпадае магчымасць, Кацярына прыязджае ў Беларусь. Дні на радзіме заўсёды праходзяць плённа: распланавана кожная гадзіна. У адзін з такіх прыездаў яна вырашыла падзяліцца досведам са студэнтамі журфака.

Утульная кавярня, цёплая гарбата, духмяная кава — нефармальная сустрэча... Некалькі дзяўчат з факультэта сціпла сядзяць у чаканні лекцыі ад пісьменніцы. Але Кацярына дае іншую ўстаноўку: «Раскажыце пра сябе, пра тое, чым хочаце займацца». І мы дзелімся планамі, перажываннямі і страхамі, абмяркоўваем будучыню журналістыкі, друкаваных выданняў.

Кацярына таксама расказвае пра сябе і свой досвед працы, жартуе і вучыць. Пры гэтым зусім не цісне сваім аўтарытэтам. Нягледзячы на розніцу ва ўзросце, мы адчуваем сябе з ёй на роўных, давяраем ёй на сто працэнтаў, і нам здаецца, што мы знаёмыя ўжо шмат гадоў...

Напрыканцы Каця падзялілася з намі адным сакрэтам па пабудове тэкстаў. А на развітанне — запрасіла дадавацца ў сябры на «Фэйсбуку» і шчыра паабяцала, што мы можам звяртацца да яе па параду ў любой сітуацыі і ў любы час.

Пасля сустрэчы не пакідала неверагоднае пачуццё лёгкасці, упэўненасці ў сваіх сілах. Я зразумела: у мяне ёсць галава для думак, рукі, каб пісаць. І магчымасці. Варта толькі захацець...

Юлія АДАМОВІЧ, студэнтка ІV курса факультэта журналістыкі БДУ

Загаловак у газеце: Навучыць... натхняцца

Выбар рэдакцыі

Культура

У нядзелю яўрэі святкуюць Новы год дрэў

У нядзелю яўрэі святкуюць Новы год дрэў

На гэта свята асаблівым чынам спажываюць розную садавіну, запіваючы келіхамі добра разбаўленага віна.

Грамадства

Як задаволіць кадравы голад у сферы ІТ?

Як задаволіць кадравы голад у сферы ІТ?

Работадаўцы кажуць, што быць добрым праграмістам і ўмець пісаць код для эфектыўнай работы ўжо недастаткова.

Культура

Балельшчыкі II Еўрапейскіх гульняў ужо рэзервуюць вясковыя гатэлі

Балельшчыкі II Еўрапейскіх гульняў ужо рэзервуюць вясковыя гатэлі

«Адышоў час, калі гасцям патрэбныя былі толькі «чарка і скварка», ім ужо цікавыя музеі, культурная праграма».