На пашыраным пасяджэнні Бюро Прэзідыума НАН Беларусі быў дадзены ўрачысты старт адзінаццатай Беларускай антарктычнай экспедыцыі. У гэтым годзе на лядовы кантынент адправяцца восем удзельнікаў: як спецыялісты, якія ўжо пабывалі раней ў Антарктыдзе, так і пачаткоўцы.
На Паўднёвы полюс Зямлі накіроўваюцца нязменны начальнік усіх беларускіх антарктычных экспедыцый Аляксей Гайдашоў, вядучы спецыяліст — намеснік начальніка экспедыцыі Дзмітрый Лукашанец, інжынер-метэаролаг Сяргей Байкоў, інжынер-радыёметрыст Уладзіслаў Базылевіч, інжынер-механік па эксплуатацыі машын і механізмаў Артур Івашка, урач-хірург Сяргей Сухараў, інжынер-механік дызель-электрастанцыі Аляксей Хаткевіч і электраманцёр па рамонце і абслугоўванню электраабсталявання Аляксандр Лянкевіч. Шэсць членаў экспедыцыі з’яўляюцца супрацоўнікамі НАН Беларусі (Рэспубліканскага цэнтра палярных даследаванняў, Інстытута фізікі, НПЦ НАН Беларусі па біярэсурсах) і Белдзяржуніверсітэта (Нацыянальнага навукова-даследчага цэнтра маніторынгу азонасферы).
Членаў экспедыцыі чакае нялёгкая праца па будаўніцтве ўласнага дома на берагах Антарктыкі — Беларускай антарктычнай станцыі "Гара Вячэрняя”. На лядовы кантынент будзе дастаўлена больш як 100 тон грузу: будаўнічых канструкцый, модуляў, матэрыялаў, паліва і іншых неабходных рэчаў для забеспячэння жыццядзейнасці станцыі. Беларускім палярнікам трэба будзе не толькі яго прыняць, правесці ўстаноўку модуляў, забяспечыць іх увод, але і выканаць вялікі комплекс навуковых даследаванняў у адпаведнасці з праграмай. Менавіта для гэтага ў Антарктыду і накіроўваюцца 8 чалавек. Першыя ўдзельнікі экспедыцыі адправяцца ў дальнюю дарогу ўжо 4 і 8 лістапада (5 чалавек). Ім трэба будзе падрыхтаваць станцыю да прыёму расійскага навуковага судна з абсталяваннем і распачаць навуковыя даследаванні ў рамках заданняў дзяржаўнай праграмы па засваенні Антарктыды.
Старшыня Прэзідыуму НАН Беларусі акадэмік Уладзімір Гусакоў выказаў упэўненасць, што дзеянні і паслядоўныя крокі беларускага боку будуць у поўнай ступені адзначаны сусветнай антарктычнай супольнасцю, і на мяжы дваццатых гадоў цяперашняга стагоддзя Рэспубліка Беларусь стане паўнапраўным удзельнікам міжнароднага антарктычнага калектыву па даследаванні і выкарыстанні палярных раёнаў Зямлі — атрымае статус Кансультатыўнага боку Дагавору аб Антарктыцы.
Надзея НІКАЛАЕВА
Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
Васілеўскія такія: на Зямлі і ў космасе ліхія!
