Гледачы даволі доўга папракалі тэлеканал «Сталічнае тэлебачанне» ў адсутнасці свайго прадукту і падабенстве да расійскай кнопкі РэнТБ. Але ўсё зменіцца ў новым тэлесезоне ўжо з 1 лістапада: новы кіраўнік канала Ігар Луцкі і яго каманда падрыхтавалі маштабны рэбрэндынг, які будзе відаць і вонкава, і па змесце, анансавалі адразу дзве новыя прэм'еры, «перайгралі» ранішні эфір і цалкам абновяць сайт.
Больш падрабязна пра праекты і планы «Звяздзе» расказаў кіраўнік дырэкцыі спецпраектаў СТБ Максім МЕТА.
— Адна з абвешчаных прэм'ер — дакументальны праект «Таямніцы Беларусі». Наколькі ён «доўгайграючы» і якія таямніцы наогул раскрые гледачам?
— Знята ўжо шэсць серый праекта, аднак колькі іх будзе ўвогуле, пакажа час. Дакументальныя праекты на беларускім тэлебачанні — штука дастаткова рэдкая, бо іх вытворчасць не толькі каштуе досыць дорага, але і патрабуе прыцягнення значнай колькасці рэсурсаў... Калі гаварыць пра фармат, мы стараліся распрацоўваць такія тэмы, якія нібыта ляжаць на паверхні, але глядзець на іх з нечаканага ракурсу, шукаць новы паварот. Напрыклад, гісторыя забойства Кенэдзі Лі Харві Освальдам — здаецца, пра яго ў свой час не гаварыў толькі лянівы, — але хто такі сам Освальд, як на яго паўплывалі два гады жыцця ў Беларусі і што гавораць сведкі?.. Мы знайшлі суперэксклюзіўных герояў, у тым ліку людзей, якія асабіста з ім сустракаліся, сябравалі, працавалі побач, — і ўпершыню на айчынным тэлебачанні, дый увогуле на тэлебачанні, з першых вуснаў мы даведаліся вельмі цікавыя рэчы. Не менш захапляльнымі атрымаліся і іншыя серыі праекта — пра таямніцы мінскага метро, пра лёс і загадкавы адыход з жыцця Яўгеніі Янішчыц, пра элітныя «наменклатурныя кватэры» — як і для каго яны размяркоўваліся ў Краіне Саветаў у 1920—1980-х гг... Падкрэслю, мы не робім стаўку на скандальнасць, гэта грунтоўныя, якасныя журналісцкія расследаванні. Таму, канешне, спадзяёмся, што праект стане цыклавым і атрымае працяг — але ўсё залежыць ад таго, ці спадабаецца ён гледачам. Уключыце тэлевізар ужо ў гэту пятніцу, паглядзіце, наколькі цікавай атрымаецца прэм'ера.
— У канцы тыдня «выстраліць» ваша рэаліці-шоу «Вёска. LІVЕ» — наколькі смелае, настолькі ж і натуральнае — нават дзіўна, што раней нікому не ўдавалася так паказальна сутыкнуць ілбамі вёску і горад.
— Насамрэч гэты жанр для нашага тэлебачання таксама дастаткова рэдкі, бо вымагае вялікай колькасці тэхнікі, часу, занятых у вытворчасці людзей... Мы, шчыра кажучы, спраўляліся даволі сціплымі сіламі. Цікавасць была якраз у тым, каб адшукаць вядучага з «незамыленым» позіркам на вёску. Зладзілі цэлы кастынг, у якім самай цікавай сярод амаль 20 прэтэндэнтак падалася Ліза Палішчук з гурта «Лас-Вегас» — і мы нічога не прыдумляем, калі кажам, што яна нічога не ведае пра вёску: яна такая гарадская дзяўчынка, якая ў роднай краіне далей за МКАД не выязджала, у яе няма ні дзядуль, ні бабуль з вёскі, і таму самыя звычайныя рэчы, большасці з нас знаёмыя з дзяцінства, для яе — дзіва дзіўнае. На здымачнай пляцоўцы мы працавалі без сцэнарыя наўмысна, ніякіх прапісаных рэплік — усе рэакцыі і эмоцыі абсалютна жывыя, народжаныя «на натуры». Ліза і яе наіўнае ўспрыманне вёскі ўваходзяць у клінч з Уладзімірам Субатам — гэта вопытны журналіст, мэтр, які глыбока ведае тэму і які дастаткова жорстка «троліць» прыгоды гарадской дзяўчынкі. Заўважу, у праграме яны ніводнага разу не сустракаюцца, Ліза працуе на палетках, Уладзімір каментуе падзеі ў тэлестудыі. І толькі ў фінале мусяць сустрэцца, што называецца, вочы ў вочы. Што з гэтага выйшла? 12 серый па 39 хвілін кожная, прэм'ерная — амаль гадзіна. Мы паспрабавалі закрануць розныя галіны аграпрамысловага комплексу (авечкагадоўля, вытворчасць сыру і іншых малочных прадуктаў, мясная вытворчасць, побыт звычайнай вясковай гаспадаркі), зрабілі геаграфію праекта як мага шырэйшай, аб'ехалі практычна ўсю краіну. Разлічваем на тое, што праграма будзе цікавай для аўдыторыі рознага ўзросту, — і зноў жа чакаем адваротнай сувязі, у тым ліку праз новы сайт СТБ.
— Чула, што будуць вялікія перамены ў ранішнім эфіры. У «Студыі добрага настрою» застануцца тыя ж вядучыя і захаваецца звыклая назва. А што зменіцца?
— «Раніца. Студыя добрага настрою» стартуе ўжо сёння, 1 лістапада, і будзе, бадай, самай заўважнай праграмай у плане абнаўлення. У нас новая студыя, якая размяшчаецца ў кінатэатры «Электрон», новыя дэкарацыі, новая графіка і мноства новых рубрык, цікавых для розных катэгорый гледачоў. Тэмы ўзялі максімальна разнастайныя, ад эканамічнага агляду да ежы або гаджэтаў — пра ўсё гэта вядучыя будуць расказваць у лёгкай, дзесьці забаўляльнай форме, але тым не менш праграма застанецца інфармацыйна насычанай і карыснай. Асабіста я перакананы, што, гледзячы нашу праграму, чалавек атрымае поўны інфармацыйны зрэз падзей у краіне і свеце і няма патрэбы шчоўкаць пультам.
Акрамя таго, ужо ў лістападзе мы будзем рабіць праграму «Раніца Беларусі» на РТР-Беларусь — пакуль што раз на тыдзень па суботах будзем закрываць дзве гадзіны эфіру ўласным кантэнтам. Новыя вядучыя — іх імёны мы пакуль не рассакрэчваем —- мяркую, шмат каго парадуюць.
— На ваш погляд, чым яшчэ варта было б разнастаіць эфір? Многія гледачы з настальгіяй прыгадваюць музычныя і забаўляльныя праекты СТБ...
— Мы будзем вельмі шчыльна назіраць за тым, як гледачы адрэагуюць на новыя праекты. Цяпер наша задача — запусціць ключавыя навінкі, а далей будзем прымаць рашэнні зыходзячы з глядацкай зацікаўленасці.
...Ці плануе СТБ зноў запусціць музычна-забаўляльныя праграмы, а можа, нават замахнуцца на ўласную кінавытворчасць? Кіраўнік дырэкцыі спецпраектаў адказвае дыпламатычна: «У будучыні ўсё можа быць».
Вікторыя ЦЕЛЯШУК
Амаль тысяча дзвесце чалавек сабраліся, каб вырашаць найважнейшыя пытанні развіцця краіны.
Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.