Вы тут

Ці пашырацца магутнасці Гродзенскага смеццесартавальнага завода?


Зараз ён абслугоўвае толькі горад, але ёсць магчымасць, каб прыняць адходы з усяго Гродзенскага раёна. Цяпер у раёне дзейнічае 15 міні-палігонаў, але камунальныя службы і мясцовыя ўлады не спяшаюцца скіраваць смеццевыя патокі на перапрацоўчы завод.


Гродзенскі раён — адзін з самых населеных у вобласці, тут пражывае амаль 50 тысяч чалавек. З іх у горадзе-спадарожніку Скідзелі — больш за 10 тысяч. Зразумела, што і адходаў утвараецца нямала. Напрыклад, у Гожскім сельскім Савеце адных толькі садаводчых таварыстваў каля 40, і ў сезон смецце ледзь паспяваюць вывозіць. Між тым да раздзельнага збору адходаў справа пакуль не дайшла. Праўда, была спроба зарыентаваць жыхароў і дачнікаў на збор палімераў, але яна не дала вынікаў: у кантэйнер па звычцы выкідалі ўсё разам.

Вывозяцца на палігон і адходы вялікай Скідзельскай зоны. У сельскім Савеце расказалі, што чулі аб планах па закрыцці палігона, які знаходзіцца на тэрыторыі сельсавета, але гэтыя пытанні не ў кампетэнцыі мясцовых улад. Дарэчы, такую сітуацыю, калі смецце вывозіцца адразу на палігон, можна назваць тыповай не толькі для Гродзенскага, але і многіх іншых раёнаў. З той розніцай, што на тэрыторыі раёна вось ужо другі год дзейнічае смеццесартавальны завод, магутнасцю 120 тысяч тон у год. Як паведаміў дырэктар завода Вячаслаў Андрыеўскі, магчымасці для перапрацоўкі ёсць.

— Завод прымае камунальныя адходы толькі з абласнога цэнтра. Гэта звязана з заварваннем гарадскіх смеццеправодаў і арганізацыяй раздзельнага збору другаснай сыравіны. Працэс можна лічыць наладжаным. Доля адсартаваных адходаў значна ўзрасла. Мы гатовы прыняць яшчэ больш смецця ад насельніцтва і адсартаваць яго, — адзначыў дырэктар.

На заводзе наогул выйшлі з ініцыятывай закрыцця навакольных міні-палігонаў. Аргумент важкі — адсутнасць ліній сартавання. Таму ўсе адходы, у тым ліку і другасная сыравіна, трапляюць на сметнік. Выгляд другаснай сыравіны вельмі ўражвае экскурсіі, якія часта сюды прыязджаюць, заўважае дырэктар завода. Наогул, перапрацоўка адходаў — справа выгадная. Добра ідзе рэалізацыя пластыку магілёўскім перапрацоўшчыкам. Яны гатовы браць яшчэ больш сыравіны.

— Мы бачым, што патрэба ёсць, і нашы лініі справяцца з большай нагрузкай. Цяпер справа за камунальнымі службамі і раённымі ўладамі, якія павінны прыняць рашэнне аб закрыцці міні-палігонаў, каб усё смецце з тэрыторыі раёна праходзіла праз наш завод, — рэзюмуе Вячаслаў Андрыеўскі.

У аддзеле камунальнай гаспадаркі райвыканкама такая прапанова не выклікала энтузіязму. Каментарый прагучаў даволі лаканічна: «Пакуль пралічваем эканамічны бок». Зразумела, што камунальная гаспадарка не хоча несці страты па адвозцы смецця за некалькі дзясяткаў кіламетраў, калі ёсць паблізу міні-палігон. У рэшце рэшт гэта адаб'ецца і на бюджэце. Да таго ж колькасць смеццявозаў разлічана пад адпаведны маршрут. Калі зараз, напрыклад, машына робіць некалькі рэйсаў, то пры новым раскладзе іх колькасць зменшыцца, што можа пагоршыць чысціню населеных пунктаў. З такімі аргументамі цяжка не пагадзіцца.

Між тым на заводзе прапануюць пачаць гэту работу ў эксперыментальным рэжыме. У першую чаргу задзейнічаць навакольныя сельсаветы. У рэшце рэшт 15 міні-палігонаў, якія існуюць у раёне, рана ці позна давядзецца закрываць. Дык чаму не пачаць зараз?

Аляксандр Адаменка, намеснік старшыні Гродзенскага абласнога камітэта прыродных рэсурсаў і аховы навакольнага асяроддзя:

— У вобласці распрацаваны графік закрыцця міні-палігонаў на тры гады. Гэта значыць, што ў гэты тэрмін усе міні-палігоны вобласці павінны быць выведзены з эксплуатацыі. Згодна з графікам налета ў Гродзенскім раёне павінны быць закрыты пяць міні-палігонаў і праз год — астатнія дзесяць. У цэлым па вобласці сёлета стаіць задача закрыць каля паўсотні аб'ектаў, у наступныя два гады — астатнія 210.

Маргарыта УШКЕВІЧ, фота аўтара

Загаловак у газеце: Перапрацоўка — справа выгадная

Выбар рэдакцыі

Грамадства

Дыета ад хандры. Што жаваць, каб не перажываць

Дыета ад хандры. Што жаваць, каб не перажываць

«Сумныя» прадукты — прэч з халадзільніка!

Грамадства

«Сталінскі праспект мы называлі брадвеем». Як і чым жылі беларускія стылягі

«Сталінскі праспект мы называлі брадвеем». Як і чым жылі беларускія стылягі

Пасля смерці Сталіна «жалезная заслона», якая аддзяляла Савецкі Саюз ад навакольнага свету, прыадчынілася.

Калейдаскоп

Усходні гараскоп на наступны тыдзень

Усходні гараскоп на наступны тыдзень

АВЕН. Неабходна будзе сканцэнтраваць намаганні на рабоце.

Грамадства

Прынцып Інэсы Караткевіч: цаніць кожную хвіліну

Прынцып Інэсы Караткевіч: цаніць кожную хвіліну

«Ні разу не пашкадавала, што прыйшла працаваць у такую ўнікальную структуру, як спажыўкааперацыя»