Час, калі ўсе адходы жыццядзейнасці выкідаліся ў смеццеправоды, гамяльчане нават забылі. Разам з намеснікам генеральнага дырэктара дзяржаўнага аб'яднання «ЖКГ Гомельскай вобласці» Алегам Спірыдонавым успамінаем, калі тое было. Не адразу, але па паперах знаходзім дату. Работу па закрыцці смеццеправодаў у Гомелі пачалі яшчэ ў 1994, а закончылі ў 2011 годзе. Столькі часу спатрэбілася, каб пераканаць жыхароў усёй вобласці ў відавочных плюсах. Няма смеццеправода — няма смуроду гніення і хлоркі, прусакоў і пацукоў, пажараў ад недакуркаў і грукату сярод ночы. Толькі сталыя людзі сёння прыгадаюць, як сістэматычна яны забіваліся і патрабавалі спецыяльнага тэхнічнага абслугоўвання, каб чысціць і дэзынфікаваць. Зніклі гэтыя з'явы з жыцця, цяпер толькі бульба ці каляскі захоўваюцца ў памяшканнях вакол гэтай прылады сумнеўнай зручнасці.
Тэхнікі, якая іх абслугоўвала, на Гомельшчыне цяпер няма адпаведна. Замест яе набыта новая, прыстасаваная пад так званыя еўракантэйнеры. Пры пагрузцы смецце з іх практычна не высыпаецца. Кантэйнер падкатваецца да машыны, тая сама адкрывае накрыўку і справа зроблена.
— Гомель — першы горад у Беларусі, у якім смеццеправоды ўвогуле зніклі, — падкрэслівае Алег Спірыдонаў. — Потым і па вобласці ўсе заварылі. Але ж галоўная мэта сёння — максімальна падзяляць і перапрацоўваць смецце. Гэта ж другасныя рэсурсы. Пры карыстанні смеццеправодам гэта немагчыма. Сёння жыхары Гомельшчыны прызвычаіліся да таго, каб выкідаць смецце ў розныя кантэйнеры. Большая частка гэта робіць.
Цікаўлюся, ці сутыкаліся пры барацьбе за экалогію з супрацьлеглымі меркаваннямі.
— Канешне, — кажа Алег Віктаравіч. — Працэс пераканання доўгі, але таго варты. Былі супраць у асноўным асобныя людзі, якія прызвычаіліся да смеццеправодаў, і сталыя, каму зусім цяжка выходзіць з дому і несці смецце на пляцоўку. Але ж сёння ўсе пляцоўкі — у крокавай даступнасці.
Сапраўды, блізка ад свайго дома я налічыла пяць. У залежнасці ад таго, у які бок іду, там і выкідаю смецце. Дарэчы, усе пляцоўкі ўладкаваны, агароджаны. Канешне, здараецца, што іх перакульваюць, але ж вельмі рэдка.
Дзеці сёння актыўна ўключыліся ў дзейнасць па раздзяленні смецця: кампанія вясёлых янотаў у сродках масавай інфармацыі робіць сваю справу. Многія бацькі гавораць, што малыя цяпер не дадуць выкінуць смецце не ў тую скрыню, што яму адпавядае. Думаю, яны здольны пераканаць і бацькоў, і дзядоў, што клопат аб будучыні планеты варты яшчэ аднаго заваранага смеццеправода.
Ірына АСТАШКЕВІЧ
Фота Вольгі АНУФРЫЕВАЙ
Васілеўскія такія: на Зямлі і ў космасе ліхія!
Ідэнтычнасць праз спадчыну.
Беларусь — у тройцы лідараў па захваральнасці.