У сёлетнім ХХІІ фестывалі беларускай песні ў Літве, які прымаў горад Вісагінас, паўдзельнічалі таксама беларускія гурты з Латвіі ды Беларусі
Сем творчых калектываў з розных гарадоў Літвы, а таксама з Латвіі ды Беларусі паўдзельнічалі ў ХХІІ міжнародным фестывалі беларускай песні, які прайшоў сёлета 6 кастрычніка ў Вісагінасе. Ладзіла яго Згуртаванне беларускіх грамадскіх арганізацый Літвы. Змагла ж адбыцца імпрэза дзякуючы падтрымцы Дэпартамента нацыянальных меншасцяў пры Урадзе Літвы, Амбасады Беларусі ў Літве. Гэты фэст, нагадаю, кожны год праходзіць у розных гарадах Літвы, дзе працуюць беларускія суполкі: Вільнюс, Клайпеда, Панявежыс, Шальчынінкай, Шаўляй, Друскінінкай, Вісагінас.
Пачалося спеўнае свята з адкрыцця перасоўнай выставы “Жыццё ў Слове” з фондаў Дзяржаўнага музея гісторыі беларускай літаратуры. На пачатку фэст-канцэрта вядучыя Сяргей Шабадалаў і Валянціна Іванова не прамінулі сказаць: беларусы таварыства “Крок” у Вісагінасе святкуюць сёлета 20?гадовы юбілей свайго вакальнага калектыву “Світанак”.
Гледачоў і ўдзельнікаў канцэрта віталі ганаровыя госці: Амбасадар Беларусі ў Літве Аляксандр Кароль, мэр Вісагінаса Даля Штраўпайце, загадчык консульскага аддзела Пасольства Расіі ў Літве Таццяна Наважылава, Ганаровы консул Казахстана ў Літве Йонас Ягмінас, прэзідэнт Згуртавання беларускіх грамадскіх арганізацый Літвы Ларыса Слесарава, дырэктар Цэнтра беларускай культуры й старшыня Беларускага таварыства “Уздым” у Даўгаўпілсе Жанна Раманоўская, член Саюза пісьменнікаў Беларусі Станіслаў Валодзька. На свяце былі й старшыні беларускіх суполак Літвы Алег Давідзюк, Рэгіна Дзьмухоўская, Марыя Рабовіч, Валянцін Стэх.
У сёлетнім фэсце паўдзельнічалі розныя беларускія вакальныя гурты: “Сябрына” з Вільнюса (мастацкі кіраўнік Валянціна Кавальчук), “Сузор’е” і “Світанак” з Вісагінаса (імі кіруюць адпаведна Ніна Мельнікава і Алена Пішчыкене), “Раніца” з Шальчынінкая (Францішак Міцкелевіч), “Купалінка” з Клайпеды (Валянціна Снігур). Ганаровымі гасцямі фэсту сёлета былі запрошаны гурты “Купалінка” з Даўгаўпілса (Латвія, Вячаслаў Пятроў), “Церніца” з Мінска (Галіна Несцяровіч) і Аляксандра Гайдук, спявачка з беларускай сталіцы. Са сцэны гучала багата беларускіх народных і аўтарскіх песень, якія цёпла сустракалі гледачы. І на гэты раз гучалі песні на словы Станіслава Валодзькі “Ода Беларусі”, “Зязюля”, “Дзічка” і гімн беларусаў Літвы “Беларускі дом” кампазітараў Аляксадра Рудзя, Сяргея Ціханава і Міколы Яцкова ў выкананні Сяргея Шабадалава, ансамбляў “Раніца” і “Купалінка” (Клайпеда), а гімн у завяршэнне канцэрта выконваўся сумесна ўсімі ўдзельнікамі фестывалю.
Выказваем удзячнасць Дэпартаменту нацыянальных мен- шасцяў пры Урадзе Літвы, Амбасадзе Беларусі ў Літве за падтрымку фестывалю. Дзякуем Згуртаванню беларускіх грамадскіх арганізацый Літвы, намаганнямі якога фэст быў створаны, сталеў — і стаў цяпер святам, якое паядноўвае беларусаў.
Вольга Відзовіч, г. Вісагінас
Фота Жанны РАМАНОЎСКАЙ
Мерапрыемства праводзіцца на добраахвотнай аснове.
Не выявіць ні секунды абыякавасці.