Вы тут

У панядзелак у Беларусі стартуе Сусветны тыдзень прадпрымальніцтва


У сувязі з гэтай падзеяй арганізатары сабралі прэс-канферэнцыю ў Нацыянальным прэс-цэнтры, на якой падрабязна расказалі аб усіх выстаўках і форумах на працягу сямі дзён. Нагадаем, Сусветны тыдзень прадпрымальніцтва — гэта штогадовае глабальнае мерапрыемства, якое аб'ядноўвае 170 краін у пошуку новых ідэй для прадпрымальніцтва ўсяго свету. Беларусь правядзе яго ўжо ў восьмы раз.


Як адзначыла намеснік дырэктара ТАА «Цэнтр дзелавых камунікацый «БелБіз» Анастасія Хамянкова, гэта падзея з'яўляецца важнай для нашай краіны, паколькі паказвае ролю прадпрымальнікаў у развіцці эканомікі дзяржавы — сюды ўваходзіць, напрыклад, і стварэнне працоўных месцаў. Дарэчы, сёлета мерапрыемства пройдзе пры падтрымцы Савета Міністраў і Міністэрства эканомікі Беларусі, у прыватнасці.

Намеснік міністра эканомікі Беларусі Дзмітрый Матусевіч расказаў, што падчас Сусветнага тыдня прадпрымальніцтва плануецца падпісаць праект эканамічнага развіцця Беларусі на мясцовым узроўні. Паводле яго слоў, да выніковага рашэння прыйшлі сумесна з ПРААН і Еўрапейскім саюзам, дакумент можа быць падпісаны ўжо 13 лістапада і ў такім выпадку закране 12 раёнаў краіны. Намеснік міністра назваў і сумы, прадугледжаныя праектам: па 500 тысяч еўра на рэгіён.

«У рамках гэтага дакумента, калі ён пройдзе ўсе працэдуры і запрацуе ў пачатку 2019 года, кожны з раёнаў зможа рэалізаваць шэраг ініцыятыў як па падтрымцы інфраструктуры, бізнесу, так і кластарных ініцыятыў, сацыяльнага прадпрымальніцтва», — растлумачыў Дзмітрый Матусевіч.

Форум пройдзе ў выставачным цэнтры «БелЭкспа». 13—14 лістапада адбудзецца выстаўка GEW EXPO — гэта першая пляцоўка для інавацыйных кампаній, якія гатовы прэзентаваць свае ідэі міжнароднай супольнасці і дзяржаве на самым высокім узроўні. Стэнды падзелены па секцыях: фінансавыя тэхналогіі, інвестыцыі, інавацыі, падтрымка бізнесу, адукацыя для бізнесу, тэхналогіі для бізнесу і тэхнічныя супольнасці.

Яшчэ адна пляцоўка — Міжнародны форум прадпрымальніцтва. Ён арганізаваны для прадстаўнікоў бізнес-супольнасці і стартап-экасістэмы. Мэта — абмеркаваць, як ствараць добры прадукт і развіваць бізнес. Перад гасцямі выступяць эксперты ў сваіх сферах, у тым ліку і замежныя.

Цікава, што Сусветны тыдзень прадпрымальніцтва разлічаны і на падлеткаў: так, 14 лістапада адбудзецца дзелавая канферэнцыя, на якой спікерамі выступяць юныя прадпрымальнікі. Яны прадставяць свае праекты і ідэі перад аўдыторыяй, для дзяцей уваход на мерапрыемства будзе бясплатны.

Не абышлося і без хакатона — гэта такі форум распрацоўшчыкаў, падчас якога спецыялісты з розных абласцей разам працуюць над рашэннем якой-небудзь праблемы. На Тыдні прадпрымальніцтва ён пачнецца 12 лістапада і будзе доўжыцца 48 гадзін. Тэхнічныя спецыялісты прымуць выклік ад міжнародных кампаній і створаць новае рашэнне пры ўдзеле экспертаў з Вялікабрытаніі. Дарэчы, сёлета задачы на форуме паставіць і знакамітая кампанія ІKEA.

Тэматыка Тыдня ў многіх краінах розная, аднак ёсць тэма, якая аб'ядноўвае ўсіх, — гэта жаночае прадпрымальніцтва. У гэтым годзе ў Беларусі ў рамках нацыянальнага конкурсу «Прадпрымальнік года» Міністэрства эканомікі пагадзілася на тое, каб Міжнародная фінансавая карпарацыя ў Беларусі (адзін з партнёраў мерапрыемства. — Аўт.) выставіла дзве дадатковыя намінацыі: «Найлепшая жанчына-прадпрымальнік Беларусі» і «Найлепшы старт жаночага бізнесу».

Яшчэ адзін важны кірунак Тыдня, на які звярнулі ўвагу арганізатары, — інклюзіўнае прадпрымальніцтва. Саветнік па гандлёвых і эканамічных пытаннях Пасольства Вялікабрытаніі ў Беларусі Інэса Палтаран адзначыла, што вельмі важна падтрымліваць такія пачынанні, паколькі для інавацыйных ідэй бар'ераў не існуе.

Уладзіслаў ЛУКАШЭВІЧ

Загаловак у газеце: Падтрымаць словам і справай

Выбар рэдакцыі

Грамадства

Як выхаваць даследчыка за школьнай партай?

Як выхаваць даследчыка за школьнай партай?

Чаму ўсе краіны, якія развіваюць інавацыйную эканоміку, робяць сёння стаўку на STЕM? 

Грамадства

Ці набудуць у гаспадароў старыя хаты?

Ці набудуць у гаспадароў старыя хаты?

Адэльскі сельскі савет, што ў Гродзенскім раёне, можна назваць брамай у Еўрасаюз.

Калейдаскоп

Вясёлыя гісторыі нашых чытачоў

Вясёлыя гісторыі нашых чытачоў

Пра дастаўку шафы, пасажыра вярхом на памідоры і канцэрт Віктара Вуячыча.