Руды параіў пастаўшчыкам больш актыўна выходзіць на кітайскі рынак

Пастаўшчыкам беларускай прадукцыі неабходна больш актыўна выходзіць на кітайскі рынак, заявіў у эфіры тэлеканала "Беларусь 1" у праграме "Галоўны эфір" Надзвычайны і Паўнамоцны Пасол Беларусі ў Кітаі Кірыл Руды.

Паводле слоў дыпламата, цяпер на першы план выходзяць пытанні маркетынгу, заходу ў кітайскія сеткі, стварэння магазінаў беларускіх тавараў. Бо калі нашы прадпрыемствы рэалізуюць прадукцыю са склада, у канчатковым выніку ў кітайскіх крамах цана на беларускі тавар узрастае ў 5-8 разоў, на гэтай розніцы зарабляюць пасярэднікі. "Каб дадаць кошт свайму прадукту і больш зарабіць, трэба даходзіць да канчатковага пакупніка, адкрываць тут вытворчасці, свае крамы, усё гэта паступова трэба пачынаць рабіць, адаптуючы вытворчасць пад густы спажыўцоў. Крамы беларускіх тавараў у Кітаі ёсць, але іх адкрываюць кітайскія бізнесмены. Пытанне ў тым, што пакуль беларускія пастаўшчыкі прадаюць са склада, а не прыходзяць непасрэдна на кітайскі рынак. У той жа час кітайскія бізнесмены бачаць перспектывы, яны раскручваюць беларускія брэнды, падаюць нашы прадукты як экалагічна чыстыя, самі адкрываюць крамы пад беларускімі брэндамі. Для нас гэта толькі плюс, але хацелася б, каб больш грошай прыходзіла ў Беларусь", - сказаў Кірыл Руды.

Як адзначыў пасол, перавага Беларусі ў тым, што праз яе тэрыторыю пралягаюць усе жалезныя дарогі, што вядуць з Кітая ў ЕС. "І на зваротным шляху мы можам загружаць гэтыя чыгуначныя кантэйнеры. У нас за апошнія тры гады колькасць кантэйнерных цягнікоў вырасла ў 9 разоў, і колькасць саміх кантэйнераў па выніках гэтага года будзе каля 3 тыс. Па выніках 2020 года плануецца давесці іх да 5 тыс. Чыгуначныя перавозкі субсідуюцца кітайскімі ўладамі і па кошту транспартных тарыфаў параўноўваюцца з марскімі, але пры гэтым яны хутчэй. У выніку нашы тавары прыходзяць хутчэй чыгункай па тых жа коштах, што і марскімі перавозкамі - з Аўстраліі ці Новай Зеландыі", - звярнуў увагу Кірыл Руды.

Ён падкрэсліў, што кітайскі рынак - самы рослы ў свеце. "Сёння мы ўжо параўноўваем кітайскія гарады з еўрапейскімі краінамі. Пекін, умоўна, - гэта як Швецыя па ВУП. Для нас будзе дастаткова аднаго горада або раёна цэлага горада для таго, каб забяспечыць яго нашымі прадуктамі. І калі мы зойдзем сюды, выбудуем стратэгічныя адносіны і нас будуць пазнаваць, то застацца тут можна назаўжды", - дадаў дыпламат.