Вы тут

Чым здзівіў Беларускі тыдзень моды


Тыдзень моды ў Нью-Ёрку запомніўся паказам бялізны ад спявачкі Рыяны і куцюрнымі сукенкамі з пер'ем. На подыуме ў Лондане не было ніводнай рэчы з натуральнага футра. У Мілане натхняліся 1980-мі і Майклам Джэксанам, а ў Парыжы прэзентавалі сумачкі ў форме яйка і лятаючай талеркі. Пазнаёміцца з навінкамі ад беларускіх дызайнераў можна было на тыдні моды, які праходзіў у Мінску з 7 да 11 лістапада.


Мод­ны ка­муф­ляж.  Ды­зай­нер Тац­ця­на Яф­рэ­ма­ва.

Увосень традыцыйна прадстаўляюць калекцыі на сезон вясна-лета. Дызайнер Таццяна Яфрэмава, напрыклад, зрабіла стаўку на чырвонае: бліскучыя спадніцы-мідзі, сукенкі са спартыўнымі манжэтамі на рызінках. А таксама прапанавалі ўспомніць пра стыль мілітары — адчуць сябе «ў поўным узбраенні» можна ў камбінезоне колеру хакі і камуфляжнай сукенцы. Ствараючы калекцыю, Таццяна Яфрэмава думала аб супрацьстаянні чалавечага і штучнага інтэлекту і аб тым, як у гэтым свеце заставацца сабой.

Просты крой, свабодныя сілуэты — такім бачыць адзенне сучаснай гараджанкі дызайнер Віталіна Гардзіеўская. Яна настойвае: сексуальнасць не ў кароткіх спадніцах, а ва ўпэўненасці. На подыуме мільгалі шырокія кашулі ўнісекс амаль да калена, прамыя сукенкі да самай падлогі, спартыўныя «касухі». Дагэтуль Віталіна Гардзіеўская стварала толькі скураныя аксесуары, таму сумкі ў яе калекцыі заслугоўваюць асаблівай увагі. Напрыклад, паясныя сумкі, якія наступнай вясной па-ранейшаму застануцца актуальныя.

Брэнд Nеlvа натхняўся прыродай. Фішкай стаў раслінны прынт. У калекцыі некалькі стылявых кірункаў: адзенне для офіса, паўсядзённага жыцця і свят. Элегантныя вобразы дапаўняюць сумачкі, упрыгожаныя макрамэ, мюлі (від абутку без заднікаў) і хусткі-павязкі. Брэнд запусціў таксама новую лінію адзення, якая адлюстроўвае рытм часу — Frіdау («пятніца») bу Nеlvа. Галоўны пасыл гэтай калекцыі — радавацца кожнаму імгненню. Тут ёсць рэчы як для летняга шпацыру па горадзе, так і для курортнага адпачынку, рамантычныя і іранічныя. Яркія сукенкі ў рыбкі і кубачкі з-пад кавы, аранжавы камбінезон, падобны да формы рабочага, адназначна прыцягнуць увагу навакольных. У якасці галаўнога ўбору падыдуць пластыкавы казырок ці панама.

Рас­лін­ныя ма­ты­вы  ў ка­лек­цыі ад Nеlvа.

Дызайнер Ларыса Балунова зрабіла стаўку на мінімалізм, архітэктурны крой і графіку і прэзентавала мікс офіснага стылю і прыбярэжнай рамантыкі. Сустракаць вясну яна прапануе ў сукенках на запах, кюлотах, свабодных камбінезонах, шортах-бермудах у спалучэнні з доўгім жакетам. Асноўныя тканіны — бавоўна і лён. Колеры — чырвоны, цёмна-сіні, белы і нюд.

Ад­цен­ні нюд  не страч­ва­юць па­зі­цый.

Зусім іншую гаму выбрала мадэльер Наталля Корж: цёмна-зялёныя, шэрыя, цёмна-фіялетавыя, лавандавыя адценні. Яе вясенняя калекцыя ўключае паліто з фігурным швом, даўгія элегантныя сукенкі, паўпразрыстыя тунікі — варыянт для тых, хто ідзе ў оперу ці рэстаран і хоча выглядаць дорага. Сярод матэрыялаў — арганза і шоўк.

У рамках тыдня моды быў прэзентаваны праект Еthісаl Fаshіоn Shоw. Дызайнеры працавалі з этнічнай тэматыкай, а галоўным матэрыялам для пашыву калекцый стаў лён. Нацыянальны каларыт перадавалі праз выявы птушак на адзенні, традыцыйныя галаўныя ўборы мінулых гадоў, саламяныя завушніцы.

Пра­ект  Еthісаl Fаshіоn Shоw.

Але галоўнае на гэтым тыдні моды не адзенне. Першая важная падзея — праект «Новыя магчымасці». «Звязда» ўжо пісала пра яго: упершыню калекцыю разам з дызайнерамі стваралі людзі з інваліднасцю — аздаблялі рэчы вышыўкай і вязанымі карункамі. Арганізатары праекта спадзяюцца, што большасць гэтага адзення будзе прададзена, а майстрыхі з асаблівасцямі развіцця змогуць часцей атрымліваць заказы. Другая падзея датычылася мадэляў. Падчас асобных паказаў на подыум разам з маладымі дзяўчатамі выходзілі жанчыны старэйшага ўзросту. Прыгажосць без межаў ужо стала сусветным трэндам. Так, у верасні ў Мілане калекцыю Dоlсе&Gаbbаnа дэманстравалі актрыса Моніка Бялучы і мама вынаходцы Ілана Маска Мая. І хоць у модзе па-ранейшаму захоўваюць вернасць стандартам, на першы план даўно выйшла не тыповасць, а ўнікальнасць.

Наталля ЛУБНЕЎСКАЯ

Фота аргкамітэта BFW

Загаловак у газеце: Стаўка на лён, мінімалізм і элегантнасць

Выбар рэдакцыі

Рэгіёны

Сок з дастаўкай і з ледзяшамі: на Брэстчыне пачаўся сезон нарыхтоўкі бярозавіку

Сок з дастаўкай і з ледзяшамі: на Брэстчыне пачаўся сезон нарыхтоўкі бярозавіку

Як мы бярозавік куплялі на гандлёвай пляцоўцы лясгаса і ў лясніцтве

Культура

Анатоль Ярмоленка: Нас натхняе беларуская паэтычная класіка

Анатоль Ярмоленка: Нас натхняе беларуская паэтычная класіка

Творчая вечарына народнага артыста Беларусі прайшла ў адной з мінскіх гімназій.