Камсамол — не проста ўзрост
Шэраг выставаў, сустрэч, творчых акцый прайшлі ў Беларусі з нагоды 100-х угодкаў ВЛКСМ. У прыватнасці, у Нацыянальным мастацкім музеі працуе выстава “Юнацтва камсамольскае”. У экспазіцыі — больш за 60 твораў жывапісу, графікі, скульптуры, створаныя ў 1920–80-я гады. Яны адлюстроўваюць эпізоды грамадзянскай вайны, ліквідацыі непісьменнасці, падзеі ды герояў ваенных гадоў, удзел моладзі ў вялікіх будоўлях, працу на вытворчасці. Творы на іншыя тэмы таксама ў своеасаблівым камсамольска-святочным кантэксце.
З віншаваннем да ўсіх, для каго камсамол — не проста ўзрост, звярнуўся Прэзідэнта Беларусі. Пра пераемнасць традыцый, новыя моладзевыя праекты й задачы на будучыню ішла зацікаўленая размова пад час яго сустрэчы з актывам БРСМ у Палацы Незалежнасці 29 кастрычніка. Былі ў зале розныя пакаленні камсамольцаў: ад ветэранаў руху да яго пераемнікаў. Сам Аляксандра Лукашэнка прыйшоў на сустрэчу са сваім камсамольскім білетам, прызнаўся: для яго камсамол быў вялікай школай жыцця. Ён параіў юнакам і дзяўчатам, якім, верагодна, давядзецца працаваць і за мяжой: “Толькі не губляйце свае карані!” А вечарам у Палацы Рэспублікі прайшлі ўрачысты сход і канцэрт, прысвечаныя юбілею камсамола.
Ёсць такое слова: хаб
У Мінску на пачатку лістапада прайшла сустрэча Асноўнай групы Мюнхенскай канферэнцыі па бяспецы. Падводзячы яе вынікі, старшыня канферэнцыі Вольфганг Ішынгер заўважыў: Мінск ужо шмат гадоў дэманструе прыхільнасць да мірнага ўрэгулявання канфліктаў, і ў сукупнасці з геаграфічным становішчам тое робіць яго важным месцам міжнароднай дыпламатыі. Паводле слоў палітыка, цяпер ёсць неабходнасць надаваць больш увагі дзяржавам, якія знаходзяцца між Захадам і Усходам. У прыватнасці, казаў ён, у Мінску была магчымасць выслухаць Прэзідэнта Арменіі, выступалі намеснік Міністра замежных спраў Грузіі, Прэм’ер-міністр Малдовы: “Гэта краіны, праблемам якіх у сферы бяспекі часам мы ўсе надаем недастаткова ўвагі: як Усход, так і Захад. Таму я прыйшоў да думкі, што Мінск — выдатная ідэя, і мне прыемна, што я меў рацыю”.
Вольфганг Ішынгер падкрэсліў: “Мінск стаў хабам міжнароднай дыпламатыі. Мінская група па пошуку шляхоў мірнага ўрэгулявання карабахскага канфлікту працуе два дзесяцігоддзі, некалькі гадоў функцыянуе група па ўрэгуляванні канфлікту ў Данбасе. Беларусь і Мінск сталі вельмі важным месцам з пункту гледжання міжнароднай дыпламатыі”, — адзначыў палітык. Ён прызнаўся, што быў вельмі ўражаны выступленнем Прэзідэнта Аляксандра Лукашэнкі, яго сумленнасцю й шчырасцю. А таксама прапановамі скарыстацца магчымасцямі Беларусі ў справе нармалізацыі ды ўрэгулявання сітуацыі ў Данбасе пры міжнародным удзеле.
Мост-падарунак для Палесся
Рэканструяваны ў кароткія тэрміны мост цераз Прыпяць адкрыты 6 лістапада з удзелам Аляксандра Лукашэнкі ў Жыткавіцкім раёне. Пры тым кіраўнік дзяржавы падкрэсліў: адкрыццё новых значных аб’ектаў напярэдадні свята 7 лістапада ў Беларусі стала добрай традыцыяй.
Нагадаем, летась у снежні мост з-за аварыйнага стану прыйшлося закрыць. Арганізаваная там пантонная й паромная пераправы толькі часткова вырашалі праблему для жыхароў Жыткавіцкага раёна, Турава — усяго Палесся. Таму было прынята рашэнне: як мага хутчэй рэканструяваць мост. І тое было зроблена ў рэкордна кароткія тэрміны. Прэзідэнт шчыра падзякаваў усім, хто ўдзельнічаў у будаўніцтве і падкрэсліў: “Галоўная задача дзяржавы — забяспечыць годную якасць жыцця сваім грамадзянам і даць ім роўныя магчымасці для паўнавартаснай працы, незалежна ад месца жыхарства”.
Цырымонія адкрыцця абноўленага моста стала святам для мясцовых жыхароў. Яны шчыра дзякавалі кіраўніку дзяржавы за падарунак, а школьнікі ўручылі яму макет моста. “Гэты мост многаму нас навучыў, — сказаў Прэзідэнт. — Масты ж аб’ядноўваюць, у тым іх функцыя, яны не нясуць у сабе раз’яднанне ці падзел А гэта сутнасць нашай палітыкі: аб’яднанне”.
Іван Ждановіч — паводле матэрыялаў БелТА
Амаль тысяча дзвесце чалавек збяруцца, каб вырашаць найважнейшыя пытанні развіцця краіны.
Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.