Вы тут

Санаторый дома і гурткі для пажылых


— Для таго каб зразумець, якая дапамога патрабуецца канкрэтнаму пажылому чалавеку, мы пастаянна праводзім абследаванні дома, — расказвае дырэктар Жыткавіцкага тэрытарыяльнага цэнтра сацыяльнага абслугоўвання насельніцтва Ніна Рамановіч. — У прыватнасці, сёння ў Чырвоненскі сельскі Савет выехала шэсць чалавек.


Загадчык аддзялення сацыяльнай дапамогі дома Любоў Макушэнка і адзінокая 86-гадовая Зося Чабатарова з Жыткавічаў.

Штотыдзень супрацоўнікі цэнтра з Жыткавічаў ажыццяўляюць два-тры выезды ў раён. І ўсё для таго, каб на месцы зразумець і разабрацца, каму якія патрабуюцца паслугі. Тут лічаць, што трэба зрабіць усё, каб пажылы чалавек як мага даўжэй змог жыць у сябе дома. Пры гэтым яму прапануюць сацыяльнае абслугоўванне, гаворыць Ніна Мікалаеўна:

— Звычайна пры абследаванні заходзім у дом, правяраем работу сацыяльнага работніка, ажыццяўляем кантроль сродкаў рэабілітацыі, глядзім, ці прыбрана ў доме, ці можа чалавек дровы сабе прынесці або прыгатаваць ежу, ці дапамагаюць сваякі яго абслугоўваць. Калі сваякоў няма — прапануем нашы паслугі. Бывае так, што спачатку людзі катэгарычна адмаўляюцца. Тады мы накіроўваем у гэты дом псіхолага. Дамаўляемся, што сацработнік папрацуе месяц-два. Гаворым: калі не задаволіць дапамога — адмовіцеся. Як правіла, потым сацыяльныя работнікі становяцца амаль што роднымі і надалей пажылыя людзі ўжо не ўяўляюць жыцця без іх дапамогі.

Ніна Мікалаеўна адзначае, што на пачатку года на абслугоўванні ў цэнтры сацыяльнага абслугоўвання насельніцтва было 930 чалавек, сёння іх — 950. І гэта з улікам таго, што кожны месяц 14-15 людзей сталага веку ў раёне пакідаюць гэты свет. Але ж колькасць тых, каго цэнтр абслугоўвае, становіцца большай.

Распытаць пажылога чалавека пра яго штодзённыя праблемы — абавязковая місія супрацоўнікаў цэнтра. Выслухоўваюць прэтэнзіі, праблемы, просьбы пра меддапамогу. Таму звычайна работа ідзе яшчэ і разам з медыкамі. Здараецца, што вясковую бабулю трэба тэрмінова шпіталізаваць, што і дапамагаюць зрабіць інспектары з раёна.

— Цяпер у нашым раёне чатыры дамы зімоўкі, — гаворыць Ніна Рамановіч. — На халодны перыяд звычайна разам збіраюцца блізкія сваякі: родныя ці стрыечныя сыходзяцца ў адзін дом, каб было весялей і зручней. На сённяшні дзень мы плануем і прыёмныя сем'і — унесена адпаведная прапанова ў бюджэт наступнага года. А яшчэ ў нас практыкуецца так званы санаторый дома. У населеным пункце дамаўляемся з нейкай гаспадыняй. У яе дома збіраюцца пажылыя людзі, бавяць час не толькі за гарбатай. Да іх прыходзяць супрацоўнікі сельсавета, Дома культуры, ФАПа, сацыяльныя работнікі. На працягу месяца праводзім медагляд, у тым ліку прызначаюцца пэўныя курсы лячэння.

І гэта далёка не ўсе мерапрыемствы, якія практыкуюцца ў раёне для людзей сталага веку. Восенню і ранняй вясной ужо традыцыйна праходзіць акцыя «Чысты дом і чысты двор». Спецыялісты цэнтра дапамагаюць зрабіць генеральную прыборку ў тых дамах і дварах, дзе гэта асабліва неабходна.

Усім, хто на абслугоўванні, супрацоўнікі цэнтра прапануюць «зялёную аптэку»: загадзя нарыхтаваныя травы бясплатна разносяць інвалідам і адзінокім пенсіянерам.

— Цяпер вось вырашылі, што да дня інваліда ў нас будзе дабрачынны канцэрт, — адзначае Ніна Мікалаеўна. — Кожны купіў па тры білеты: адзін для сябе, а два — для інвалідаў і адзінокіх. Ім мы білеты бясплатна раздаём і прывозім у Жыткавічы на канцэрт.

Да таго ж 44 пажылыя жыхары Жыткавічаў пастаянна займаюцца ў спартыўнай зале, яшчэ каля 90 — непастаянна. Для гэтага ёсць тут два трэнажоры, але Ніна Мікалаеўна спадзяецца, што з'явяцца і яшчэ некалькі. Папулярнай у раёне стала скандынаўская хада. Цяпер пенсіянеры з глыбінкі шпацыруюць са спецыяльнымі палкамі па наваколлі. Таксама ж актыўна ходзяць у гурткі: займаюцца рукадзеллем, асвойваюць камп'ютар і нават з задавальненнем танцуюць.

Ірына АСТАШКЕВІЧ

Выбар рэдакцыі

Грамадства

Як выхаваць даследчыка за школьнай партай?

Як выхаваць даследчыка за школьнай партай?

Чаму ўсе краіны, якія развіваюць інавацыйную эканоміку, робяць сёння стаўку на STЕM? 

Палітыка

Аляксандр Лукашэнка сустрэўся з прадстаўнікамі СМІ Расіі

Аляксандр Лукашэнка сустрэўся з прадстаўнікамі СМІ Расіі

Некалькі рэчаў сёлета адбываюцца ўпершыню.

Грамадства

Ці набудуць у гаспадароў старыя хаты?

Ці набудуць у гаспадароў старыя хаты?

Адэльскі сельскі савет, што ў Гродзенскім раёне, можна назваць брамай у Еўрасаюз.