Вы тут

«Год малой радзімы стаў лейтматывам свят і мерапрыемстваў на Гродзеншчыне»


Аляксандр Вярсоцкі, начальнік галоўнага ўпраўлення ідэалагічнай работы і па справах моладзі Гродзенскага аблвыканкама:

— Год малой радзімы стаў лейтматывам многіх свят і мерапрыемстваў на Гродзеншчыне. Дарэчы, сёлета ў абласной праграме запланавана 270 мерапрыемстваў. Асабліва знакава прайшлі юбілеі гарадоў — Гродна, Смаргоні, Астраўца, Зэльвы, Скідзеля, Дзятлава, Ліды. Падчас свят адбылася ўрачыстая пасадка алеі знакамітасцяў. І не толькі ў гарадах прайшлі такія святы. Сёлета юбілеі святкавалі ў аграгарадку Свіслач, вёсках Мількаўшчына Гродзенскага раёна (радзіма Элізы Ажэшкі) і Беражкі, што на Зэльвеншчыне. Прайшлі нават святы вуліц з нагоды іх утварэння.

Вельмі прыемна, што вядомыя ўраджэнцы Гродзеншчыны прыязджаюць сюды не толькі на святы, але і для таго, каб папрацаваць. Многія з іх прымалі ўдзел у навядзенні парадку на зямлі падчас суботнікаў. Напрыклад, знакамітыя выпускнікі ГрДУ імя Янкі Купалы высадзілі ў Гродне на новай вуліцы ліпавую алею.

Многае зроблена па стварэнні музеяў і музейных пакояў. У стартавым Годзе малой радзімы можна гаварыць аб адкрыцці на Гродзеншчыне 13 новых аб'ектаў. Папаўняецца існуючы фонд, а таксама ствараюцца новыя экспазіцыі. У іх ліку — этнаграфічныя экспазіцыі ў вёсках Смаргонскага і Дзятлаўскага раёнаў. У вёсцы Трокенікі Астравецкага раёна адноўлены побыт былой сядзібы знакамітага мастака і пісьменніка Мар'яна Богуша-Шышкі. На працягу года ў Навагрудку праходзілі мерапрыемствы, прысвечаныя 300-годдзю Саламеі Русецкай, першай у гісторыі Рэчы Паспалітай жанчыны-лекара. Вядома яна і мемуарамі «Авантуры майго жыцця».

Асаблівую асалоду і задавальненне адчуваеш тады, калі бачыш плады сваіх намаганняў, прыкладання сіл. Такім аб'ектам стала рэканструкцыя сядзібы Міхала Клеафаса Агінскага ў Смаргонскім раёне. У рамках трансгранічнага праекта быў зроблены першы крок да ажыццяўлення гэтага праекта. Потым работы працягваліся за бюджэтныя сродкі. Сёння сядзіба стала паўнавартасным турыстычным аб'ектам, дзе праходзіць мноства мерапрыемстваў, у тым ліку і цудоўны шляхецкі баль. Налета музеяў і экспазіцый будзе ў рэгіёне адкрыта не менш, бо яшчэ з'яўляюцца новыя імёны, якія былі незаслужана забыты, і трэба ўвекавечыць памяць аб іх.

Маштабныя работы вядуцца на гродзенскіх замках. Змяняецца воблік Старога замка ў Гродне, ідуць рэканструкцыя і кансервацыя Гальшанскага і Крэўскага замкаў. Працягваюцца аднаўленчыя работы па Каложскай царкве, наступным этапам якіх будзе рэканструкцыя ўнутранага ўбранства. Аб'ект унесены ў папярэдні спіс ЮНЕСКА.

Лічу, што мясцовым уладам, дэпутатам варта звярнуць увагу ў сваіх раёнах на знакавыя аб'екты і прывесці іх у належны стан. Механізмы гэтай работы могуць быць розныя, у тым ліку праз удзел у трансгранічных праектах. Пакуль патэнцыял прадстаўнікоў тэрытарыяльнага самакіравання, старастаў, дамавых камітэтаў выкарыстоўваецца не ў поўнай ступені.

Як вядома, пад знакам Года малой радзімы пройдуць і наступныя два гады — 2019-ы і 2020-ы. Гэта значыць, што ёсць час, каб паклапаціцца аб сваёй малой радзіме, упрыгожыць свой родны кут. Да 1 студзеня ў вобласці будзе сфарміраваны новы план работы ў гэтым кірунку.

Важнымі падзеямі стануць юбілей Гродзенскай вобласці, 75-годдзе вызвалення Беларусі, а ў 2020-м — 75-годдзе Перамогі. Будзем звяртаць асаблівую ўвагу на добраўпарадкаванне воінскіх манументаў і могілак. У сувязі з гэтым у кожным раёне вызначыцца такі знакавы аб'ект, рэканструкцыя якога будзе весціся ў наступным годзе. У Гродне гэта будуць воінскія могілкі на вуліцы Белуша.

Працягнецца выдавецкая дзейнасць. Убачаць свет фотаальбомы, якія раскажуць аб старажытнасці такіх гарадоў, як Гродна, Слонім і Смаргонь. Рыхтуецца прэзентацыйны альбом «Гродзенская вобласць» да 75-годдзя рэгіёна. Новыя выданні раскажуць аб мастаках і спартсменах Прынёманскага краю. Дарэчы, сёлета выйшаў у свет альбом «Гродзеншчына ў тварах», які прысвечаны вядомым і знакавым асобам рэгіёна, а таксама альбом, прымеркаваны да ХІІ фестывалю нацыянальных культур. У снежні плануецца надрукаваць кнігу аб рэках і азёрах Прынёмання.

Маргарыта УШКЕВІЧ

Загаловак у газеце: Пад знакам увагі і добрых спраў

Выбар рэдакцыі

Культура

Як  мастак Май Данцыг ствараў свае карціны

Як мастак Май Данцыг ствараў свае карціны

Наватар, «шасцідзясятнік», ваяўнічы аптыміст — гэта ўсё пра яго.

Грамадства

Як ператварыць звычайны ўрок беларускай літаратуры у творчую майстэрню?

Як ператварыць звычайны ўрок беларускай літаратуры у творчую майстэрню?

Настаўнікі ўпэўнены: ці будуць вучні чытаць, у многім залежыць ад іх саміх. 

Эканоміка

Петришенко: Называть ЕАЭС экономическим союзом сегодня можно только авансом

Петришенко: Называть ЕАЭС экономическим союзом сегодня можно только авансом

Однако наша страна надеется, что это временные трудности.

Грамадства

Апублікаваны поўны тэкст Канцэпцыі інфармацыйнай бяспекі Беларусі

Апублікаваны поўны тэкст Канцэпцыі інфармацыйнай бяспекі Беларусі

Дзяржаўным органам і іншым арганізацыям даручана кіравацца палажэннямі канцэпцыі ў практычнай дзейнасці.