Вы тут

Рэальны патэнцыял інтэграцыі


Галоўныя мерапрыемствы V Форуму рэгіёнаў Беларусі і Расіі прайшлі з удзелам прэзідэнтаў абедзвюх краін — Аляксандра Лукашэнкі і Уладзіміра Пуціна. Гэты факт падкрэсліў не толькі значэнне і высокі статус магілёўскага форуму, але і вялікую ролю менавіта рэгіянальнага ўзаемадзеяння дзвюх дзяржаў


Аляксандр Лукашэнка перакананы:

— Гэтае мерапрыемства стала добрай традыцыяй для прэзідэнтаў дзвюх краін, кіраўнікоў рэгіёнаў, прадстаўнікоў бізнес-супольнасці і экспертаў, пляцоўкай для абмеркавання ключавых пытанняў міждзяржаўных адносін.

Тым больш што база для развіцця гэтых адносін больш чым салідная, пацвердзіў Уладзімір Пуцін.

Знакавы момант: зносіны прэзідэнтаў ў Магілёве пачаліся з асабістай сустрэчы. Спачатку непасрэдна ў аэрапорце, куды Аляксандр Лукашэнка прыбыў сустрэць Уладзіміра Пуціна. А затым і па месцы правядзення форуму — у Палацы культуры Магілёўскай вобласці. Дарэчы, цяперашняя сустрэча Аляксандра Лукашэнкі і Уладзіміра Пуціна — ужо трэцяя за апошнія дзве дэкады. І ў бягучым годзе не апошняя: яшчэ маюць адбыцца кантакты ў ходзе міжнародных самітаў у Астане і Маскве.

Асноўны фармат двухбаковай сустрэчы лідараў дзвюх краін прысутнасці журналістаў не прадугледжваў. Зрэшты, ні для каго з прысутных не было сакрэтам, пра што ішла гаворка за зачыненымі дзвярыма. Зразумела, пра найбольш актуальныя пытанні беларуска-расійскіх адносін. А таму з асаблівым нецярпеннем ўдзельнікі форуму чакалі выступленняў кіраўнікоў дзяржаў на пленарным пасяджэнні. Тэма якога казала сама за сябе: «Прыярытэтныя напрамкі развіцця рэгіянальнага супрацоўніцтва як ключавога фактару інтэграцыі ды саюзнага будаўніцтва».

Менавіта на ключавой ролі рэгіянальнага фактару акцэнтаваў увагу ўдзельнікаў форуму Прэзідэнт Беларусі:

— У цяперашні час больш за восем тысяч прадпрыемстваў Беларусі і Расіі звязаны вытворчай кааперацыяй. У Беларусі каля 3000 арганізацый з расійскім статутным капіталам. У Расіі зарэгістравана каля 50 сумесных зборачных вытворчасцяў, створана каля 160 суб’ектаў тавараправоднай сеткі з беларускім капіталам.

Гэта сотні тысяч працоўных месцаў, што ў наш час з’яўляецца немалым дасягненнем.

Пры гэтым, падкрэсліў Аляксандр Лукашэнка, менавіта ў рэгіёнах дзвюх краін пачынаецца мноства вытворчых і тэхналагічных ланцужкоў па выпуску сумеснай прадукцыі. Аб узаемнай зацікаўленасці ў развіцці міжрэгіянальных сувязяў сведчыць і высокая інтэнсіўнасць абмену візітамі дэлегацый рознага ўзроўню:

— Падпісана парадку 80 дамоваў аб супрацоўніцтве з суб’ектамі Расійскай Федэрацыі. Асноўнымі гандлёвымі партнёрамі Беларусі застаюцца Масква і Санкт-Пецярбург, Рэспублікі Татарстан і Башкартастан, Пермскі край, а таксама Бранская, Калужская, Маскоўская, Смаленская і Цюменьская вобласці. Аб’ём гандлю з дадзенымі рэгіёнамі складае больш за 70% беларуска-расійскага тавараабароту. Гэта высокі вынік, але важна наладзіць такое ж супрацоўніцтва і з іншымі суб’ектамі Расійскай Федэрацыі. Лічу, што ў нас ёсць усе неабходныя інструменты.

Што да галіновай канкрэтыкі, то найважнейшым прыярытэтам міжрэгіянальнага ўзаемадзеяння Прэзідэнт Беларусі бачыць рэалізацыю вытворча-кааперацыйных праектаў у машынабудаванні, дрэваапрацоўцы, харчовай і лёгкай прамысловасці:

— Варта забяспечыць неабходную загрузку ўжо дзеючых прадпрыемстваў шляхам стварэння сумесных праграм па імпартазамяшчэнні. Тады нашы вытворчасці змогуць развівацца ў інтарэсах абедзвюх краін. На нядаўняй сустрэчы ў Сочы (з Прэзідэнтам Расіі.— Рэд.) мы дэталёва абмяркоўвалі гэтае пытанне. Спадзяюся, у бліжэйшы час прымем рашэнні, якія здымуць усе перашкоды ў развіцці сумесных вытворчасцяў.

Складанасці ёсць, і Прэзідэнт пра іх таксама казаў:

— Нашымі галоўнымі задачамі працягваюць заставацца ліквідацыя абмежаванняў ва ўзаемным гандлі і забеспячэнне роўных умоў дзейнасці гаспадарчых суб’ектаў. І найбольш адчувальнае пытанне — супрацоўніцтва ў аграпрамысловым комплексе. У многіх рэгіёнах Расіі беларусаў ведаюць як добрасумленных і надзейных партнёраў, а беларускія прадукты цэняць і любяць. На жаль, часцяком сумесная работа па павышэнні якасці экспартуемага харчавання падмяняецца абмежавальнымі мерамі.

Перспектыўным напрамкам з’яўляецца і развіццё ўзаемадзеяння ў будаўнічай сферы, нагадаў Аляксандр Лукашэнка:

— Беларускія спецыялісты могуць якасна ўзвесці любыя аб’екты сацыяльнай інфраструктуры.

Акрамя таго, у цяперашні час у Расіі ствараюцца кластары, індустрыяльныя паркі, тэрыторыі апераджальнага развіцця. Беларусь гатова актыўна ўдзельнічаць і ў гэтых праектах:

— Мы павінны эфектыўна задзейнічаць велізарны навуковы, прамысловы і кадравы патэнцыял дзвюх краін для стварэння сумеснай прадукцыі.

Аднак не толькі эканоміка ляжыць у аснове беларуска-расійскіх узаемаадносін. Наступныя два гады стануць знакавымі для блізкіх народаў: яны разам будуць адзначаць 75 гадоў з дня вызвалення Беларусі ад нямецка-фашысцкіх захопнікаў і 75­годдзе Вялікай Перамогі. Аляксандр Лукашэнка перакананы, што на прыкладзе подзвігу савецкіх салдат, якія абаранялі тады агульную Радзіму, павінна выхоўвацца новае пакаленне грамадзян Беларусі і Расіі. І тут жа была вылучана ідэя:

— Прапаную наступны Форум рэгіёнаў прысвяціць разгляду пытанняў, звязаных з маладзёжнай тэматыкай. Варта абмеркаваць розныя аспекты адукацыі, культуры, творчага развіцця, патрыятычнага выхавання і фарміравання здаровага ладу жыцця маладых людзей.

Прэзідэнт Расіі Уладзімір Пуцін праілюстраваў лічбамі глыбіню эканамічнай інтэграцыі дзвюх краін:

— Беларусь займае першае месца па аб’ёмах тавараабароту Расіі з краінамі СНД. На расійскі рынак пастаўляецца палова ўсёй беларускай экспартнай прадукцыі. У мінулым годзе тавараабарот павялічыўся амаль на чвэрць і дасягнуў 32,4 мільярда долараў. У студзені–жніўні бягучага года дадаў яшчэ 14,5% — і нам цалкам па сілах вывесці ўзаемны гандаль на ўзровень у 50 мільярдаў долараў. Для параўнання: я зусім нядаўна быў у Індыі. Краіна з насельніцтвам 1,1 мільярда чалавек. Аб’ём гандлю Расіі з Індыяй — 10 мільярдаў долараў пакуль мы не дасягнулі. А з Беларуссю ўжо 32 з лішнім. Гэта шмат пра што кажа.

Пры гэтым расійскі лідар перакананы, што хуткі ўвод у дзеянне ў Беларусі першай атамнай электрастанцыі, якая будуецца пры дапамозе Расіі, палепшыць сітуацыю з энергазабеспячэннем краіны і дасць ёй дадатковыя экспартныя магчымасці. Прадугледжана збудаванне і яшчэ аднаго знакавага аб’екта — цэнтра ядзернай навукі і тэхналогій:

— Мы не проста будуем вельмі важны прамысловы аб’ект, а ствараем у Беларусі новую галіну. Вядома, Беларусь і ў Савецкім Саюзе славілася навукоўцамі, высокім узроўнем адукацыі. Але такой асобнай галіны не было. Цяпер будзе.

Эталонным можна смела назваць цяперашні форум, аналагаў якому яшчэ не было — як па колькасці ўдзельнікаў, так і па аб’ёме заключаных на ім дамоваў. Наогул кажучы, мерапрыемства гэта набыло такі статус і такую вагу, што за права правядзення наступнага, VI Форуму рэгіёнаў Беларусі і Расіі ўжо расце канкурэнцыя гарадоў. Прапануюцца розныя пляцоўкі, у тым ліку Санкт-Пецярбург. Пакуль у гэтым пытанні арганізатарамі  — верхнімі палатамі парламентаў абедзвюх краін — узятая паўза. Толькі вядома, што тэма будучага форуму будзе маладзёжнай і праходзіць ён будзе на тэрыторыі Расіі. Цалкам ясна і тое, што арганізатарам давядзецца пастарацца, каб наступнае мерапрыемства аказалася не горшым за магілёўскае. Зрэшты, народы Беларусі і Расіі ды эканоміка абедзвюх краін ад гэтага апынуцца толькі ў выйгрышы.

Васіль Харытонаў

Фота БЕЛТА

 

Выбар рэдакцыі

Грамадства

Галiна Левіна: Помнiк — не канструктар i не чарцёж, яго трэба перажыць, выпакутаваць

Галiна Левіна: Помнiк — не канструктар i не чарцёж, яго трэба перажыць, выпакутаваць

У архiтэктара Галiны Левiнай — Хатынь, творчая спадчына яе бацькi.

Грамадства

Прэмiя прыгажосцi. Дзеля чаго людзi кладуцца пад нож пластычнага хiрурга?

Прэмiя прыгажосцi. Дзеля чаго людзi кладуцца пад нож пластычнага хiрурга?

Як сведчаць шматлiкiя даследаваннi, прывабным людзям прасцей прабiцца ў жыццi i яны дасягаюць у кар'еры большага поспеху. 

У свеце

Як Еўропа аднаўляецца ад кавiднага ўдару?

Як Еўропа аднаўляецца ад кавiднага ўдару?

Сёлета еўрапейская эканомiка будзе перажываць глыбокую рэцэсiю з-за ўспышкi каранавiруса, нягледзячы на хуткiя i ўсёабдымныя антыкрызiсныя меры як на саюзным, так i на нацыянальным узроўнi.

Эканоміка

Тонкае мастацтва дабрабыту. Складаем сямейны бюджэт разам са спецыялістам Нацбанка

Тонкае мастацтва дабрабыту. Складаем сямейны бюджэт разам са спецыялістам Нацбанка

2020 год паставіў усіх нас перад неабходнасцю дакладна планаваць свае выдаткі.