На нарадзе з кіраўніцтвам Саўміна Прэзідэнт разгледзеў прапановы па больш эфектыўнаму кіраванню дзяржаўнымі прадпрыемствамі.
Літаральна тыдзень таму кіраўнік дзяржавы абмяркоўваў асноўныя стратэгічныя пытанні развіцця нашай эканомікі разам з урадам у пашыраным складзе. Сённяшняя сустрэча Прэзідэнта з кіраўніцтвам Савета Міністраў — гэта разбор канкрэтных сітуацый, якія патрабуюць аператыўнага рашэння. Пры гэтым кіраўнік дзяржавы падкрэсліў, што хоць ён і рэгулярна, на сістэмнай аснове сустракаецца з палітычным (Адміністрацыя Прэзідэнта), эканамічным (урад) і сілавым блокамі краіны, але менш за ўсё хацеў бы, каб такія нарады пераўтвараліся ў спробы нешта вырашаць у абыход устаноўленых правілаў.
Адно з пытанняў, якое павінна было разглядацца, датычылася запытаў аб дзяржаўнай падтрымцы на паўмільярда рублёў арганізацыям, якія абслугоўваюць АПК.
— На жаль, урад намерана абыйшоў гэтую тэму падчас абмеркавання праекта бюджэту на 2019 год, — канстатаваў Прэзідэнт. — Калі і з'яўляецца неабходнасць некага падтрымаць, то ў маі я ўстанавіў дакладны парадак. Спачатку дакладзіце, што вы зрабілі ўсё магчымае і немагчымае: знайшлі рэзервы, знізілі ўсе віды выдаткаў, асабліва невытворчых, па прозвішчах устанавілі, хто і як давёў прадпрыемства да такога стану, што прыходзіцца хадзіць з працягнутай рукой. А не проста само прадпрыемства альбо ведамства ўнесла ва ўрад прапанову, а вы яе як паштальёны накіравалі Прэзідэнту для прыняцця рашэння.
І самае галоўнае, трэба вызначыць, ці ёсць на прадпрыемстве кадры, якія здольныя эфектыўна распарадзіцца падтрымкай, падкрэсліў Алясксандр Лукашэнка. — Сёння кожны дакладчык павінен не проста праінфармаваць па сваім пытанні, а перш за ўсё прапанаваць рашэнне сістэмных праблем, з-за якіх узнікла бягучае абмеркаванне, — патрабаваў кіраўнік дзяржавы.
Адно з пытанняў нарады датычылася прапановы ўрада замацаваць вышэйшых службовых асоб у якасці прадстаўнікоў дзяржавы ў назіральных саветах. — Прэм'ер, абапіраючыся на асабісты вопыт, даказвае: калі выбудаваць сітэму кіравання, гэта дазволіць прадпрыемству вярнуць укладзеныя ў яго сродкі. Але ў чыноўніка і бізнесмена два прынцыпова розныя разуменні функцыянавання прадпрыемстваў, — заўважыў Прэзідэнт. — Да таго ж я сумняюся, што тыя, хто будзе замацаваны за гэтымі прадпрыемствамі, будуць добрымі памочнікамі кіраўніка, а калі паглядзець глыбей, то гэта не проста памочнікі, гэта людзі, якія, самае малае, будуць удзельнічаць у прыняцці рашэнняў, а то і прымаць гэтыя рашэнні.
На нарадзе абмяркоўваліся таксама пытанні аплаты працы бюджэтных прадпрыемстваў. — Урад прапануе дастаткова сур'ёзныя новаўвядзенні, паўсюдна ўніфікаваць, упарадкаваць, спрасціць, — паведаміў Аляксандр Лукашэнка. — Любыя змены, якія прынясуць карысць, будуць падтрыманы. Але трэба памятаць, што ў нас такіх 850 тысяч грамадзян (работнікаў бюджэтнай сферы — Аўт.), і ніхто, акрамя дзяржавы, пра іх не паклапоціцца і не абароніць іх.
На нарадзе разгледжаны таксама праект Указа "Аб дзяржаўным сацыяльным страхаванні". Кіраўнік дзяржавы запатрабаваў, каб любыя змены ў сферы сацыяльнага забеспячэння былі дасканала прадуманыя. Пры гэтым ён падняў праблему дэфіцыту фонда сацыяльнай абароны насельніцтва, які за шэсць гадоў вырас у дзевяць разоў, недахоп сродкаў у фондзе стабільна складае каля 10 %.
Яшчэ адзін дакумент, вынесены на абмеркаванне з Прэзідэнтам, датычыўся дражжавога камбіната ў Слуцкім раёне. — З аднаго боку, вы вынеслі праект выключна тэхнічнага рашэння аб павелічэнні статутнага фонду, — звярнуў увагу кіраўінк дзяржавы. — А з іншага — пасля вывучэння дакументаў у мяне ўзнікла пытанне: ці не спроба гэта пазбегнуць вырашэння праблемы? У прадпрыемства рэнтабельнасць продажу мінус 112 %! Як з такімі паказчыкамі можна ўвогуле працаваць?
Была таксама разгледжана прапанова ўрада па выдзяленні 92-ух мільёнаў еўра бюджэтных сродкаў на развіццё ААТ "Сукно". — Паслухаем, ці адзіны гэта шлях, каб аднавіць работу прадпрыемства да таго ўзроўню, які існаваў у часы Савецкага Саюза, — пракаментаваў парадак дня Прэзідэнт. Ён папрасіў таксама далажыць аб сітуацыі на ААТ "Камволь": што там удалося зрабіць, а што не.
— У сакавіку на справаздачы ўрада я адзначаў, што самая важная задача — гэта забяспечыць узгодненасць і паслядоўнасць дзеянняў. Перш за ўсё ўнутры ўрада, — акцэнтаваў увагу Прэзідэнт. — Калі на словах змагацца за стварэнне камфортнага бізнес-асяроддзя і дэклараваць павышэнне інвестыцый у чалавечы капітал, але наўмысна дараваць мільярды рублёў безгаспадарлівасці, а перавагу аддаваць вузкаведамасным інтарэсам перад грамадскімі — то мэтаў гэтай пяцігодкі вы не дасягнеце. Грошы трэба лічыць.
Вольга МЯДЗВЕДЗЕВА
Фота БЕЛТА
Мерапрыемства праводзіцца на добраахвотнай аснове.
Не выявіць ні секунды абыякавасці.
