Вы тут

У першыя дні снежня ў агні загінулі 10 чалавек


Сёлетняя каляндарная зіма стартавала марозным акордам. Першыя два дні снежня адзначыліся не толькі дарожна-транспартнымі здарэннямі, якія адбываліся на заснежаных дарогах, але і ажно сямюдзесяццю пажарамі. У іх загінула дзесяць чалавек.


Прычым у трох выпадках на адным пажары развіталіся з жыццём адразу два чалавекі.

У 4.30 раніцы ў нядзелю ў вёсцы Белавусаўшчына Пружанскага раёна загарэўся трохкватэрны цагляны дом. Дзве кватэры ў доме былі нежылыя, а вось у трэцяй знаходзіліся 65-гадовая гаспадыня і яе сужыцель. Іх целы ратавальнікі знайшлі пад заваламі.

Чатырма гадзінамі раней тушылі нежылы дом у Бабруйску. Там знаходзіліся двое мужчын, якія самавольна праніклі ў пабудову. Іх асобы пакуль не высветлены. А ў ноч на трэцяга снежня загарэўся дачны дом у пасёлку Ільіч Гомельскага раёна. Калі ратавальнікі прыбылі на месца падзей, то ўбачылі, што адкрытым полымем гараць дом, гараж і гаспадарчая пабудова. З-за агню ў доме абрынуліся перакрыцці. Разабраўшы іх рэшткі, пажарныя знайшлі цела гаспадыні дома, 79-гадовай пенсіянеркі. У іншым пакоі на падлозе ляжаў яе 48-гадовы сын, таксама мёртвы.

Паказальна, што ўсе гэтыя выпадкі здарыліся ў начны час сутак, калі магчымасць таго, што нехта заўважыць своечасова пажар, вельмі імкліва змяншаецца.

— Меркаваная прычына большасці пажараў — неасцярожнае абыходжанне з агнём, — кажа афіцыйны прадстаўнік Міністэрства па надзвычайных сітуацыях Віталь Навіцкі. — Сцэнарый, які папярэднічае трагедыі, адзін і той жа: чалавек курыць, засынае, палаючая цыгарэта вывальваецца і прапальвае коўдру або вопратку. Яны пачынаюць тлець і вылучаць дым і чадны газ, які чалавек не ў стане ўнюхаць у сне. Таму мы заклікаем устанавіць аўтаномныя пажарныя апавяшчальнікі — магчыма, гэты невялікі прыбор уратуе менавіта ваша жыццё.

Ратавальнікі таксама нагадваюць, як абагрэцца бяспечна.

— Калі вы карыстаецеся электрычным ацяпляльнікам, то не пакідайце яго без нагляду і ўключаным на ноч, — раіць Віталь Навіцкі. — Абагравальнік — прыбор, які спажывае шмат электрычнасці, таму нельга ў адну разетку з ім падключаць яшчэ што-небудзь. Яго трэба ўсталяваць на адлегласці некалькіх метраў ад фіранак. Калі ж электрычны абагравальнік загарэўся, то яго трэба абясточыць: або вырваць шнур сілкавання з разеткі, або рубільнікам у электрашчытавой. Калі полымя невялікае, то накрыйце прыбор шчыльнай коўдрай — так вы перакрыеце доступ кіслароду. Але калі за некалькі хвілін справіцца з агнём не ўдалося, то выклікайце ратавальнікаў па нумары 101 або 112. Калі ж у вас дома стаіць печка, то юшку трэба зачыняць толькі пасля таго, як згаслі ўсе вугалькі, інакш вы рызыкуеце атрымаць атручэнне чадным газам.

Валяр'ян ШКЛЕННІК

Загаловак у газеце: Агонь не толькі грэе

Выбар рэдакцыі

Грамадства

Сувораўскае вучылішча вачыма яго навучэнцаў

Сувораўскае вучылішча вачыма яго навучэнцаў

Быць сувораўцам ва ўсе часы было прэстыжна. 

Культура

Харвацкі кінафестываль ZаgrеbDох даследуе рэгіён вялікім экранам

Харвацкі кінафестываль ZаgrеbDох даследуе рэгіён вялікім экранам

Балканскія краіны паўсталі перад гледачом з іх надзённым.

Эканоміка

Новыя жыллёвыя ўмовы. Абараніць уласнікаў, спажыўцоў і пастаўшчыкоў паслуг

Новыя жыллёвыя ўмовы. Абараніць уласнікаў, спажыўцоў і пастаўшчыкоў паслуг

Пра новаўвядзенні, якія дэпутаты мусяць разгледзець на вясновай сесіі.