Вы тут

Музей у... чамадане


Нядаўна такі музей сапраўды з’явіўся ў актавай зале Чыркавіцкай сярэдняй школы Светлагорскага раёна. А прыехаў ён з Прэзідэнцкай бібліятэкі Рэспублікі Беларусь. Суправаджала экспанаты загадчыца аддзела старадрукаваных і рэдкіх выданняў гэтай установы Святлана Паўлавіцкая.


С. Паўлавіцкая дэманструе фрагмент Торы на пергаменце ў Чыркавіцкай сярэдняй школе.

Настаяцель Баравікоўскай царквы Святой вялікапакутніцы Варвары архімандрыт Аляксей і яго нязменны памочнік Аляксандр Коршук гэтым візітам проста прадоўжылі сваё супрацоўніцтва з Прэзідэнцкай бібліятэкай. Напярэдадні была своеасаблівая прэзентацыя духоўна-патрыятычнай работы сельскага храма ў сталічных сценах. Дырэктар бібліятэкі Сяргей Квачан, які таленавіта ўмее пашыраць духоўную прастору свайго кніжнага дзецішча, вырашыў падоўжыць пачатае праз новую акцыю — «Музей у чамадане».

Мы часам забываем, што Беларусь — дзяржава са сваёй больш як тысячагадовай гісторыяй і такой жа старажытнай пісьменнасцю ды багатай палітрай старадрукаваных кніг. Нашы кніжніцы бяруць пачатак у ІХ стагоддзі…

У Прэзідэнцкай бібліятэцы Беларусі сёння захоўваецца больш як 75 тысяч кніг, часопісаў, газет і іншых дакументаў, датаваных ад ХVІ стагоддзя да нашага часу. Зразумела, у музейны чамадан змясцілася няшмат. Вось фрагмент старажытнаяўрэйскай рэлігійнай рэліквіі на пергаменце — Торы (у бібліятэцы ён 11-метровы). Цікава, што літары іўрыту, якім яна напісана, засталіся нязменныя ў плыні тысячагоддзяў. А вось адно з кірылічных выданняў — «Служэбнік», датаванае XVIIІ стагоддзем. «Мінея дадатковая» — пачатку XIХ стагоддзя. Госця дэманструе падручнік «Гісторыя геалогіі», на якім ёсць нават нямецкі штамп са свастыкай, бо акупанты збіраліся вывезці гэту кнігу ў ліку іншых кніжных рарытэтаў у Германію. Бачым і «Пачатковую геаграфію» 1925 года. Некаторыя ўнікальныя выданні чыркавіцкія школьнікі маглі не толькі ўбачыць, але і патрымаць у руках, рэальна далучыўшыся да далёкага ад нас часу. Напрыклад, кнігу Максіма Багдановіча «Вянок», выдадзеную ў 1913 годзе, упершыню з хваляваннем узяў у рукі і я. А яшчэ мы ўбачылі выданні нашых землякоў — Івана Мележа, Андрэя Макаёнка, Івана Шамякіна, Анатоля Грачанікава, Уладзіміра Ліпскага і іншых… Усе з аўтографамі.

А як захапілі школьнікаў мініяцюрныя, не больш за два сантыметры, кніжачкі! Некаторыя ўнікальныя выданні можна было ўбачыць на экране манітора. З’явіўся на ім і знакаміты «Статут Вялікага Княства Літоўскага» 1588 года. А затым — кнігі з бібліятэкі Радзівілаў, выданні па юрыдычным праве пачатку ХVI стагоддзя…

Дзіўныя пачуцці адчулі і мы з Соф’яй Шах, калі з чароўнага чамадана дасталі некалькі нашых кніг, падораных у свой час Прэзідэнцкай бібліятэцы. З адной я і прачытаў урывак паэмы «Ала», далучаючы школьнікаў да трывожнай, трагічнай памяці часоў Вялікай Айчыннай вайны. Чытала свае вершы і Соф’я Шах — пра Радзіму, пра беларускую мову, пра вернасць нашым духоўным вытокам.

І, вядома ж, вельмі хораша ўспрынялі ўсе своеасаблівую пропаведзь архімандрыта Аляксея пра сэнс чалавечага жыцця, які бярэ свой пачатак у раннім дзяцінстве, пра праваслаўную кнігу — невычэрпную крыніцу маралі.

У гэты ж дзень завочную экскурсію ў Прэзідэнцкую бібліятэку змаглі здзейсніць і вучні Баравікоўскай сярэдняй школы. Хочацца пажадаць музею ў... чамадане новых маршрутаў па гарадах і вёсках Беларусі.

Ізяслаў КАТЛЯРОЎ

Выбар рэдакцыі

Грамадства

Пераможца «Жанчыны года-2018»: З трыма дзецьмі можа справіцца кожная пара

Пераможца «Жанчыны года-2018»: З трыма дзецьмі можа справіцца кожная пара

Тры гады таму прозвішча Трыкоза ўжо было на слыху.

Грамадства

Мэр Брэста Аляксандр Рагачук: Дзеці ў пясочніцах на касцях гуляць не будуць

Мэр Брэста Аляксандр Рагачук: Дзеці ў пясочніцах на касцях гуляць не будуць

Кіраўнік Брэсцкага гарвыканкама адмеркаваў рэзанансную тэму раскопак на тэрыторыі гета.

Культура

Як  мастак Май Данцыг ствараў свае карціны

Як мастак Май Данцыг ствараў свае карціны

Наватар, «шасцідзясятнік», ваяўнічы аптыміст — гэта ўсё пра яго.