Вы тут

За прапаганду нацызму прапануецца караць пазбаўленнем волі да пяці гадоў


Мужчына да 40 гадоў, неўладкаваны, не жанаты, былы або дзеючы член футбольных фан-клубаў, ці так званы скінхэд. Увогуле, «маргінальныя людзі» — такі сацыяльны партрэт прыхільніка ідэй нацызму апісаў па просьбе дэпутата міністр унутраных спраў Беларусі Ігар ШУНЕВІЧ.


Законапраект «Аб змяненні законаў Рэспублікі Беларусь па пытанні ўзмацнення барацьбы з прапагандай нацызму і экстрэмізму» ўчора ў першым чытанні разгледзелі дэпутаты Палаты прадстаўнікоў Нацыянальнага сходу.

Як прыклад нагоды для ўвядзення паправак у заканадаўства Ігар Шуневіч прывёў выпадак у цягніку «Мінск — Маладзечна», калі адзін з пасажыраў дэманстраваў фашысцкія татуіроўкі. Тады іншыя грамадзяне звярнуліся да СМІ, і падзею абмяркоўвала грамадства. Пры гэтым, па словах міністра, прыхільнікі нацысцкай сімволікі не спыняюцца толькі на «зігаванні» і бравіраванні адпаведнымі выявамі на сваім целе.

— Гэты выпадак адлюстраваў у цэлым пэўную тэндэнцыю, якая ўзнікла ў краіне і звязана са значным ростам неанацысцкіх і экстрэмісцкіх праяў. За апошнія тры гады колькасць зарэгістраваных фактаў грамадскай дэманстрацыі нацысцкай сімволікі вырасла ў 15 разоў, — расказаў дэпутатам міністр унутраных спраў. — МУС фіксуе цэлы шэраг злачынстваў, звязаных з праявамі неанацызму. У 2017 годзе да крымінальнай адказнасці прыцягваўся 121 кіраўнік і актыўны ўдзельнік такіх аб'яднанняў. З неанацызмам суадносна расце і экстрэмісцкая актыўнасць. За апошнія тры гады колькасць зарэгістраваных фактаў распаўсюджвання экстрэмісцкай прадукцыі вырасла ў 31 раз. Удумайцеся! У гэтым жа перыядзе ў 28 разоў вырасла колькасць зарэгістраваных злачынстваў, звязаных з распальваннем расавай, нацыянальнай і рэлігійнай варожасці.

Прычыну павелічэння ўзроўню злачынстваў такога роду міністр бачыць у падзеях у еўрапейскіх краінах, дзе растуць неанацысцкія настроі і скажаюцца падзеі Другой сусветнай вайны.

Законапраект прадугледжвае змяненні ў крымінальным, адміністрацыйным заканадаўстве і заканадаўстве па процідзеянні экстрэмізму. Па-першае, будзе скарэктаваны артыкул 130 Крымінальнага кодэксу — устанаўліваецца крымінальная адказнасць за грамадскую рэабілітацыю нацызму. Гэта дазволіць прымяніць пакаранне да пяці гадоў пазбаўлення волі. Па-другое, уводзіцца адміністрацыйная адказнасць за прапаганду грамадскага дэманстравання, выраб і распаўсюджванне не толькі нацысцкай сімволікі і атрыбутыкі, а таксама сімволікі эсктрэмісцкіх і тэрарыстычных арганізацый. Таксама прадугледжваецца адміністрацыйнае пакаранне за захоўванне і набыццё з мэтай збыту нацысцкай, экстрэмісцкай і тэрарыстычнай атрыбутыкі.

Поўны пералік прадукцыі з апісаннем нацысцкай, экстрэмісцкай і тэрарыстычнай сімволікі будзе размешчаны ў інтэрнэце.

Не змяняе законапраект падыходы да выкарыстання атрыбутаў і сімволікі ў музейнай, тэатральнай і кінематаграфічнай дзейнасці.

Усяго на парадку дня чарговага пасяджэння пятай сесіі ніжняй палаты парламента было дзесяць пытанняў — законапраекты ў паштовай, энергетычнай, дарожнай сферах.

Адзін з дакументаў прадугледжвае стварэнне ўмоў для выхаду на сусветны рынак беларускіх аўдытараў. Змяненні закона «Аб аўдытарскай дзейнасці» дапамогуць стварыць агульны рынак і роўныя ўмовы для ажыццяўлення аўдытарскіх паслуг у ЕАЭС і паспрыяюць павышэнню якасці гэтай дзейнасці, лічаць распрацоўшчыкі. Праект прадугледжвае ўвядзенне ў Беларусі міжнародных стандартаў аўдытарскай дзейнасці і Кодэкса этыкі. Акрамя таго, плануецца стварыць Дзяржаўны рэестр аўдытарскіх арганізацый, аўдытараў і адзінага органа самакіравання — Аўдытарскай палаты. Яна будзе функцыянаваць як грамадская арганізацыя і будзе прадугледжваць членскія ўзносы.

Марыя ДАДАЛКА

Загаловак у газеце: Аж да крымінальнай адказнасці

Выбар рэдакцыі

Калейдаскоп

Каля 150 спартсменаў-аматараў хочуць выступіць у «даеўрапейскіх гульнях»

Каля 150 спартсменаў-аматараў хочуць выступіць у «даеўрапейскіх гульнях»

Трэніроўкі і здымкі ўдзельнікаў пачнуцца ў красавіку.

Грамадства

Сувораўскае вучылішча вачыма яго навучэнцаў

Сувораўскае вучылішча вачыма яго навучэнцаў

Быць сувораўцам ва ўсе часы было прэстыжна. 

Культура

Харвацкі кінафестываль ZаgrеbDох даследуе рэгіён вялікім экранам

Харвацкі кінафестываль ZаgrеbDох даследуе рэгіён вялікім экранам

Балканскія краіны паўсталі перад гледачом з іх надзённым.