23 верасня, серада

Вы тут

Як пошта рыхтуецца да навагодніх святаў


У навагоддзе, дзякуючы ёй, можна на некалькі хвілін перанесціся ў казку.


Надоечы, у круглай зале мінскага Галоўпаштамта з'явілася незвычайная паштовая скрыня. З яе дапамогай можна адправіць святочны ліст са сваімі віншаваннямі, марамі і жаданнямі проста Дзеду Марозу і Снягурачцы. Навагоднія пасланні будуць дастаўляцца непасрэдна ў рэзідэнцыю Дзеда Мароза.

Каб ліст дайшоў своечасова, трэба правільна ўказаць адрас. Пасланні ахвотных аддацца эпісталярнаму жанру чакаюць у вёсцы Каменюкі Брэсцкай вобласці — рэзідэнцыя знаходзіцца ў Белавежскай пушчы. Паштовы індэкс — 225063.

Але для таго, каб даслаць ліст улюбёным казачным персанажам, зусім неабавязкова ехаць у Мінск. Лісты, адрасаваныя ім, прымаюцца ва ўсіх паштовых аддзяленнях Беларусі. Разам з тым трэба не адкладваць гэта «на потым» — непасрэдна ў апошнія дні адыходзячага года ў Белавежскую пушчу адпраўляецца вельмі шмат лістоў, і Дзед Мароз рызыкуе фізічна не паспець прачытаць усе пасланні.

Дарэчы, у той жа круглай зале Галоўпаштамта арганізавана сапраўдная навагодняя фотазона. Маленькіх наведвальнікаў там штодня чакаюць Дзед Мароз і Снягурка. Па просьбе бацькоў яны могуць уручыць хлопчыкам і дзяўчынкам загадзя падрыхтаваныя падарункі і павіншаваць з Новым годам. Але нават без папярэдняй дамовы малыя могуць пагутарыць з персанажамі казак, расказаць ім вершык, казку і сфатаграфавацца на памяць.

Дзед Мароз і Снягурка дзяжураць на галоўпаштамце па дзве гадзіны штодня. Па панядзелках, серадах і пятніцах — зранку, з 10 да 12 гадзін. У аўторак і чацвер яны заступаюць на вахту а 17-й гадзіне. Чакаць дзяцей яны будуць і зранку ў дзве суботы — 15 і 29 снежня.

— Найлепшыя фотаздымкі, апублікаваныя ў сацыяльных сетках пад хэштэгамі #белпочта і #bеlроst, трапяць у нашы афіцыйныя паблікі, — кажа прэс-сакратар РУП «Белпошта» Алена Арлова.

Навагодняя тэматыка прысутнічае і на паштовай прадукцыі. У продаж ужо паступіў вялікі асартымент адкрытак і картак, на якіх змешчаны выявы, прысвечаныя навагодняй і каляднай тэматыцы. Яркія і арыгінальныя паштоўкі змогуць стаць выдатным дадаткам да падарунка, прыемным знакам увагі і любові блізкім і сябрам, калегам і дзелавым партнёрам. Беларуская пошта вырабляе адкрытачную прадукцыю з 1993 года і за гэты час дасягнула многіх тэхналагічных вяршынь.

— Для нас стала добрай традыцыяй штогод распрацоўваць калекцыю паштовак, картак, канвертаў навагодняй і каляднай тэматыкі, — працягвае Алена Арлова. — У гэтым годзе мы прапануем нашым кліентам больш за 80 сюжэтаў паштовай прадукцыі. Разлічваем, што кожны з іх знойдзе свайго пакупніка. Што адлюстравана на нашых паштоўках? І традыцыйныя выявы Дзеда Мароза, Снягуркі і кампазіцыі з выявамі ёлачных цацак, гадзіннікаў, белых мішак на лёдзе.

Нашы паштоўкі сталі прыгажэйшыя. Справа ў тым, што кожны дызайн дэталёва прапрацоўваецца з улікам тэхнічных магчымасцяў беларускіх паліграфічных прадпрыемстваў. Мы шырока выкарыстоўваем паслядрукаваныя тэхналогіі. Гэта пластызоль белага і жоўтага колеру, цісненне гладкай каляровай і тэкстурнай фольгай, тэрмапад'ём... Такім чынам, у век інтэрнэту і СМС мы імкнёмся зрабіць так, каб паштоўка атрымала свой унікальны стыль і скіраванасць. Таму што гэта для кожнага чалавека крыху больш, чым проста прамавугольнік з прыгожай карцінкай. Нават у век хуткаснага інтэрнэту асноўная функцыя паштоўкі — прыносіць радасць, жывыя эмоцыі, пачуцці — не змянілася.

Навагодняя і калядная паштовая прадукцыя застанецца ў продажы і ў першыя дні 2019 года. Купіць яе можна як на галоўпаштамце, так і ва ўсіх аддзяленнях паштовай сувязі Беларусі і ў інтэрнэт-краме shор.bеlроst.bу.

Гэта сапраўды проста: прыйсці ў аддзяленне паштовай сувязі, выбраць прыгожую паштоўку і канверт, напісаць добрыя, цёплыя словы, а беларуская пошта своечасова даставіць ваша віншаванне!

«Белпошта» таксама нагадвае пра тое, што працягваецца акцыя «Віншаванне Дзеда Мароза». З яе дапамогай можна заказаць ліст ад чараўніка, што будзе змяшчаць не толькі прыгожую паштоўку са святочным віншаваннем, але і наборы, якія дапамогуць стварыць непаўторную навагоднюю атмасферу, — гірлянду, ёлачныя цацкі, казачныя маскі і нават вінтажныя наклейкі. Па Беларусі паслуга каштуе 8,5 рубля. За 23 рублі дадаткова дашлюць яшчэ і мяккую цацку — сімвал надыходзячага года парасяці Вачасціка. Заказаць прыемны сюрпрыз для дзяцей можна да 23 снежня ў любым паштовым аддзяленні, з дапамогай спецыяльнага інтэрнэт-сэрвісу «Віншаванне Дзеда Мароза» і нават у паштальёна.

— Атрымлівайце падарунак ад Дзеда Мароза, фатаграфуйцеся з Вачасцікам і выкладвайце фота ў «Інстаграм», суправаджаючы яго хэштэгам #принесу_удачу! — заклікае Алена Арлова. — Самыя яркія фотаздымкі мы размесцім на нашым сайце і ў акаўнтах у сацыяльных сетках.

А яшчэ ў кожнага чалавека ёсць магчымасць зрабіць адну невялікую, але вельмі добрую справу. З 2014 года Белпошта праводзіць акцыю «Падары дзіцяці радасць». Кожны ахвотны можа аформіць падпіску на газеты і часопісы, адрасаваўшы выданне аднаму з дзіцячых дамоў. За гэты час да акцыі далучыліся тысячы неабыякавых людзей. Аформіць падпіску можна як анлайн, так і ў любым паштовым аддзяленні.

Выбар рэдакцыі

Грамадства

Конкурс прафесiйнага майстэрства WorldSkills Belarus 2020 прайшоў у Мiнску

Конкурс прафесiйнага майстэрства WorldSkills Belarus 2020 прайшоў у Мiнску

Конкурс прафесiйнага майстэрства WorldSkills Belarus 2020 прайшоў у Мiнску ў Індустрыяльным парку «Вялiкi камень» з грандыёзным размахам. 

Культура

У выдавецтве «Мастацкая лiтаратура» выйшла кнiга Аляксандра Радзькова «Мой фiзмат»

У выдавецтве «Мастацкая лiтаратура» выйшла кнiга Аляксандра Радзькова «Мой фiзмат»

Пра калег — настаўнiкаў, старэйшых таварышаў, паплечнiкаў распавядае доктар педагагiчных навук, прафесар матэматыкi, заслужаны дзеяч навукi Рэспублiкi Беларусь.

Грамадства

Тураўскі крыж упершыню будзе прадстаўлены 26 верасня

Тураўскі крыж упершыню будзе прадстаўлены 26 верасня

На свята Узнясення Крыжа Гасподняга, падчас вячэрняй службы ў Мінскім кафедральным саборы.