Вы тут

У галерэі Савіцкага можна акунуцца ў атмасферу лекавання і алхіміі


Да 13 студзеня ў Мастацкай галерэі Міхаіла Савіцкага, што ў сталіцы, можна акунуцца ў атмасферу лекавання і нават алхіміі, убачыўшы выстаўку «Аптэка ў старой сядзібе. Гісторыя фармацыі ў Мінску ў XVІІІ—XX стагоддзях», прысвечаную 270-годдзю аптэкі Яна Шэйбы.


Гістарычна будынак на плошчы Свабоды, 15 (дзе цяпер размяшчаецца галерэя) вядомы з канца XVІІІ стагоддзя як гарадская сядзіба. У 1799 годзе першы гаспадар граф Міхаіл Пшаздзецкі прадаў дом за 40 тысяч польскіх злотых Андрэю і Ганне Станкевічам. Менавіта з імем Андрэя Станкевіча звязана «аптэчная» гісторыя сядзібы. Яшчэ ў 1782 годзе будучы гаспадар дома мешчанін Андрэй Станкевіч адкрыў у Мінску аптэку.

На выстаўцы прадстаўлена гісторыя аптэчнай справы сталіцы з канца XVІІІ стагоддзя. Экспануецца арыгінальны аптэчны посуд: шкляныя і парцалянавыя штанглазы, рэторты, перагонныя колбы; узоры лекавых раслін; аптэчныя сігнатуры, фірмовыя этыкеткі аптэкі № 88 у Траецкім прадмесці; кнігі па фармацэўтыцы; аптэчныя вагі; дакументы і фотаматэрыялы.

Выстаўка падрыхтавана супрацоўнікамі галерэі сумесна з прадпрыемствам «Белфармацыя», клубам па гісторыі фармацыі пры рэспубліканскім грамадскім аб'яднанні фармацэўтычных работнікаў «ФАРМАБЕЛ».

Варта дадаць, што ў дарэвалюцыйным Мінску аптэк таксама было нямала. З 1907 года ў сталіцы ў раёне цяперашняй вуліцы Фабрыцыуса працаваў шклозавод Батвінніка, які, у прыватнасці, пастаўляў аптэкам слоічкі, бутэлечкі. Пасля рэвалюцыі ён стаў шклозаводам «Пралетар». Адзін з будынкаў былой «гуты» захаваўся. Яго гісторыя цесна звязана з самой аптэкай, якая адкрылася ў Траецкім у 1987 годзе пасля рэстаўрацыі заходняй часткі прадмесця (кабінет гісторыі аптэчнай справы знаходзіцца па адрасе: Старажоўская, 3). А сам будынак аптэкі № 88, дзе ён размяшчаецца, уключаны ў рэестр гісторыка-культурных каштоўнасцяў Беларусі. Першапачаткова было прынята рашэнне зрабіць у ім не толькі ўстанову па вырабе лекавых збораў і продажы лекаў, але і асветніцкі, папулярызатарскі аб'ект. Аформіць уваход, тамбур і гандлёвую залу ў стылі старадаўніх аптэк XVІІ стагоддзя запрасілі архітэктара Ілью Дзятлава, мастачак Аляксандру Дзятлаву і Вольгу Сазыкіну. Дзякуючы ім знешні выгляд і інтэр'ер аптэкі цяпер з'яўляюцца ўнікальнымі.

Ніна ШЧАРБАЧЭВІЧ

Загаловак у газеце: Гісторыя старых аптэк

Выбар рэдакцыі

Грамадства

Як у Беларусі трансплантуюць органы

Як у Беларусі трансплантуюць органы

І чаму да нас на аперацыі едуць замежнікі.

Грамадства

Карэспандэнты «Звязды» наведалі «Воўчыя норы»

Карэспандэнты «Звязды» наведалі «Воўчыя норы»

Там адбываюць пакаранне мужчыны, упершыню асуджаныя за незаконны абарот наркотыкаў.

Спорт

Аляксандра Герасіменя: У кожнага свой рэцэпт поспеху

Аляксандра Герасіменя: У кожнага свой рэцэпт поспеху

Аляксандра Герасіменя — сапраўдны баец, а яшчэ — клапатлівая маці і жонка. І проста працавіты чалавек, які не ведае перашкод.