Падслухала днямі ў грамадскім транспарце дыялог:
— Мама, хутка Новы год! А чый будзе наступны год?
— Свінні.
— Гэта значыць, дрэнны?
— Ну, чаму адразу дрэнны...
— Бо пройдзе па-свінску!
Ужо дома пачалі разам са старэйшай дачкой успамінаць: а праўда, свіння ў дзіцячым уяўленні — гэта станоўчы ці адмоўны персанаж? Якія ёсць казкі, вершы, песенькі, мультфільмы, дзе парася — герой?
Успомнілі перадусім «Трох парсючкоў». Гісторыя, скажам так, спрэчная: адзін парсюк кемлівы, двое другіх легкадумныя, але калі паставіць на іх месца, напрыклад, зайцоў — хіба мараль зменіцца?
Дачка ўспомніла пра свінку Пепу — мультыплікацыйная суперзорка брытанскага тэлебачання «нарадзілася» амаль 15 гадоў таму і разам са сваім свінскім сямействам заваявала больш чым 180 краін дзякуючы лёгкаму характару, невычарпальнаму аптымізму і адсутнасці абавязковай павучальнай маралі ў кожнай серыі мультфільма. А вось пра лялечнага Хрушу, актыўнага неслуха, які ўвесь час трапляе ў розныя гісторыі і ўсё ніяк не набярэцца розуму, нагадала ўжо я — дачка належыць да таго пакалення, для якога вечаровы прагляд перадачы «Добрай ночы, малыя!» даўно не з'яўляецца абавязковым рытуалам. Потым прыйшоў на памяць маленькі сябар Віні-Пуха Пятачок — вырашылі, што ён добры і амаль не баязлівы, далей — дружалюбны і шчыры Фунцік, які не стаў падманваць дзяцей і збіраць з іх грошы «на домікі для бяздомных парасят», далей ружовая модніца Нюша са «Смяшарыкаў», і пайшло-паехала...
І ведаеце, што? Аказваецца, гэта зацягвае — не звяртаючыся да ўсёмагутнага Гугла, з дапамогай толькі ўласнай памяці ды, на крайні выпадак, падказак сяброў пералічваць пэўных персанажаў (паспрабуйце самі!). Атрымліваецца і зарадка для мозга, і перадсвяточная настройка. Хіба што выхаваўчы момант цяпер пакутуе: толькі надумаеш крытыкаваць малую, прыгаворваючы «хіба ты свінка?», як яна ў адказ хітра прыжмурваецца і гаворыць, што зусім не супраць пабыць Нюшай ці свінкай-супергероем (як высветлілася, і такая ёсць!). І прысутнічае ў такім падыходзе нейкая сярмяжная праўда, бо літаратурныя, кіношныя, мультыплікацыйныя свінні — яны, прабачце, як людзі, якія гэтых персанажаў прыдумалі і надзялілі пэўнымі характарыстыкамі. І, у сваю чаргу, у пэўным сэнсе — усе мы трошачкі свінкі і парсючкі.
Таму, рыхтуючыся належным чынам сустрэць 2019-ы, адкажыце сабе шчыра: вы — які персанаж? Мілае і дружалюбнае парася Бэйб, якое запусціла сусветную моду на сімпатычных міні-пігаў, агрэсіўны міфічны Калядонскі вяпрук або наогул прыдуманы псеўданавукоўцам Свінтус грандыёзус? Магчыма, якраз ад гэтага залежыць, як пройдзе для вас наступны год.
Вікторыя ЦЕЛЯШУК
Фіналістка праекта «Акадэмія талентаў» на АНТ — пра творчасць і жыццё.
Амаль тысяча дзвесце чалавек сабраліся, каб вырашаць найважнейшыя пытанні развіцця краіны.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
