Сын з'ехаў на некалькі дзён да бабулі. На другі дзень яго адсутнасці пытаюся ў дачок:
— Ну што, сумуеце па браце?
Старэйшая абурана:
— То-бок ён там, у бабулі, атрымлівае асалоду ад жыцця, а мы па ім плакаць павінны?
Вось яна, жаночая логіка: калі мужчына без цябе не пакутуе, то і сумаваць па ім неабавязкова.
Сёння раніцай, калі мяне не было дома, Вера падышла да жонкі і ціхім голасам спытала:
— Мама, скажы шчыра: у таты ёсць кнігі, якія ён ад нас хавае?
Жонка сказала, што не, але мяне гэта не надта суцешыла: калі расследаванне вядзе Вера, выратаваць можа толькі чыстасардэчнае прызнанне.
Вяду малодшых у школу.
Поля:
— Тата, а што ты робіш на рабоце?
— Працую.
— А як?
— Ну як... Сяджу за камп'ютарам, размаўляю па тэлефоне.
— І табе за гэта плацяць грошы?
— Увогуле так.
— Крута! Я таксама хачу працаваць!
P.S. Узрадавала гэта «таксама хачу». Няўжо хтосьці яшчэ хоча працаваць?
Тэлефаную дадому, здымае Поля.
— Прывітанне, Поля! Чым займаешся?
— Нічым.
— А Вера?
— Таксама нічым.
Вось яно — шчасце!
Паспрабаваў успомніць, калі апошні раз адказваў гэтак жа. Прыйшоў да высновы, што таксама гадоў у сем. Бо ў восем зразумеў: калі сказаць, што нічым не займаешся, табе вельмі хутка знойдуць работу.
Чытаў малодшым на ноч «Нязнайку ў Сонечным горадзе». Па ходзе чытання вырашыў спытаць:
— Як вам здаецца: Нязнайка разумны малы ці не вельмі?
Поля задумалася, а Вера сказала:
— Па-мойму, ён дурань.
Вось і як цяпер далей чытаць?
Поля спалохана:
— Тата, ты што, прадаеш нашу машыну?
— З чаго ты ўзяла?
— Мы з Верай бачылі, як нейкі дзядзька паклаў на шкло нашай машыны паперку «куплю вашу машыну».
— А грошы ён з паперкай не паклаў?
— Быццам не.
— Значыць, не прадаю.
P.S. А шкада.
У дзяцінстве нам казалі: «Хопіць ужо глядзець тэлевізар, ідзі лепш кніжку пачытай». Цяпер часы змяніліся і даводзіцца ўгаворваць дзяцей паглядзець тэлевізар, толькі б яны не бралі ў рукі чортаў тэлефон (пра кніжку ўжо маўчу). Хоць, зыходзячы з асабістых назіранняў, прагляд тэлевізара адначасовай перапісцы ва «УКантакце» не перашкаджае.
Хто б мог падумаць у былыя часы, што ў тэлефонах тоіцца такая небяспека. З выгляду тэлефоны заўсёды былі найбольш бяскрыўднымі апаратамі ў доме, калі параўноўваць з тымі ж тэлевізарамі ці прасамі. А яно вунь як выйшла...
Думаю, у будучым варта больш пільна прыгледзецца да прасаў. У іх, на мой погляд, схаваны вельмі сур'ёзны патэнцыял.
Павел ХОЛАД
Набор на бюджэтныя месцы павялічыцца.
Колькі ж каштуе гэты важны кампанент здаровага рацыёну зараз?
Не выявіць ні секунды абыякавасці.