Вы тут

Калядная праграма створана для дзяцей-сірот у Купалаўскім музеі


Пагушкацца на парашуце, праспяваць «У лесе нарадзілася елачка» па-беларуску, пазнаёміцца з калядоўшчыкамі, убачыць, як убіралі ёлку нашы прадзеды, адправіць тэлеграму Дзеду Марозу, пакарміць каўбасой «казу»... Гэта і шмат іншага змагла зрабіць малеча з дзіцячых дамоў сямейнага тыпу Віцебскай і Магілёўскай абласцей, якую падчас акцыі «Нашы сэрцы — дзецям» запрасіў у сталіцу на свята Беларускі дзіцячы фонд.


Для амаль 50 дзетак-сірот дырэкцыя Дзяржаўнага літаратурнага музея Янкі Купалы стварыла аўтарскую калядную праграму. Падчас інтэрактыўных гулянняў малым правялі экскурсію па музеі. Хлопцы змаглі пагушкацца ў парашуце, якім аздоблены стэнд з купалаўскім вершам «Хлопчык і лётчык». А дзяўчаты віртуальна лёталі ў самалёце, збіралі літары, што падалі з неба, і стараліся не збіць птушку і не трапіць пад маланку. Пасля юныя экскурсанты паслухалі старадаўні патэфон, а вядомы паэт на відэапраекцыі прачытаў ім уласны верш.

— Наша дабрачынная акцыя праходзіць сёння 28-ы раз. Дзеткі, якіх мы запрашалі першыя разы, цяпер самі прыходзяць да нас з дзецьмі, — кажа Ірына ЧАРНЯКОВА, намеснік дырэктара Беларускага дзіцячага фонду. — Сёлета нам вельмі захацелася паглыбіцца ў мінулае, больш расказаць дзецям менавіта пра спрадвечныя беларускія Каляды, а не толькі пра Новы год, які на слыху. Пазней мы павязём малых у Брэсцкую вобласць, таму запрасілі дзяцей, што жывуць далей ад яе, на Магілёўшчыне і Віцебшчыне. Тым больш што гэта малеча з дзіцячых дамоў сямейнага тыпу і не заўжды ў сям'і ёсць і час, і сродкі, каб такім натоўпам некуды выехаць.

У дзіцячым доме сямейнага тыпу Магілёўскага раёна Святланы МАРЧАНКІ, напрыклад, шасцёра дзяцей і, як яна кажа, з'явяцца яшчэ. Ёсць і тры свае дачкі. Шасцярых малых ужо выгадавалі. Усе з часам пачынаюць называць яе мамай. А гэта дарагога варта.

— Дапамагаю і тым, хто ўжо жыве самастойна, я двойчы бабуля, — смяецца жанчына. — У Мінск мы прыехалі ўпершыню, і дзецям вельмі спадабалася. Гэта вялікая праца — падрыхтаваць такую праграму і арганізаваць столькі дзетак.

— Мне вельмі спадабалася, — кажа адзін з выхаванцаў Святланы Ваня. — Цікава было і пра Купалу паслухаць, і пабачыць, дзе ён жыў, і паперакладаць словы на беларускую мову.

Прыбраная ў нацыянальны строй начальнік аддзела культурна-адукацыйнай работы Купалаўскага музея Вольга ПАРХІМОВІЧ пазнаёміла малых з традыцыямі святкавання Каляд і заўзята іграла ролю аднаго з калядоўшчыкаў. Вось вы ведалі, чаму на вокны раней ставілі свечку, а цяпер вешаюць гірлянду? Каб госці на Каляды ў хату прыйшлі, а сям'я гаспадароў увесь год была самая шчаслівая. А старажытны «дожджык» з дроту на ёлку — гэта не што іншае, як валасы анёлаў.

Дзеці таксама не засталіся звычайнымі гледачамі. Яны частавалі хітрую «казу» каўбасой, салам, абаранкамі ды цукеркамі, каб тая ўстала ды танчыла далей. Гулялі ў вясёлую карагодную гульню «Ішоў казёл па ельнічку». Дапамагалі адгадваць загадкі Бабы Ягі падчас лялечнага спектакля, каб знайсці Снягурку, якая падарыла ўсім маленькіх анёльчыкаў-ахоўнікаў.

А малыя з дзіцячага дома сямейнага тыпу з Глыбокага нават самі выступілі пасля калядоўшчыкаў пад уласную аранжыроўку. Дзяцей тут дзевяць. На свята прыехалі восем: Вольга, Ваня, Ігар, Сяргей, Насця, Арцём, Улад, Віталік.

— Наша сям'я шмат чым займаецца, і мы ўсім гасцям паказваем сваю творчасць. І тут таксама вырашылі паказаць, што мы ўмеем, — кажа адна з юных артыстаў Насця. — Уражанняў мора! Я даўно хацела пабываць у гэтым музеі.

— У нас гасцей заўжды шмат бывае, і заўжды мы абавязкова пячом торт. А ўсе нумары прыдумваюць самі дзеці, а па выхадных у нас яшчэ больш дзяцей, з'язджаюцца студэнты нашы, — дзеліцца мама гэтага вялікага дома Таццяна ГРАБКО.

Задаволеныя і ўражаныя дзеці атрымалі падарункі ад Дзеда Мароза, які знайшоў малых па адпраўленай яму тэлеграме, і рушылі ў далейшае святочнае падарожжа ў галоўную сядзібу чароўнага персанажа ў Белавежскай пушчы.

Ірына СІДАРОК

Фота Ганны ЗАНКАВІЧ

Выбар рэдакцыі

Эканоміка

Петришенко: Называть ЕАЭС экономическим союзом сегодня можно только авансом

Петришенко: Называть ЕАЭС экономическим союзом сегодня можно только авансом

Однако наша страна надеется, что это временные трудности.

Грамадства

Апублікаваны поўны тэкст Канцэпцыі інфармацыйнай бяспекі Беларусі

Апублікаваны поўны тэкст Канцэпцыі інфармацыйнай бяспекі Беларусі

Дзяржаўным органам і іншым арганізацыям даручана кіравацца палажэннямі канцэпцыі ў практычнай дзейнасці.

Калейдаскоп

Каля 150 спартсменаў-аматараў хочуць выступіць у «даеўрапейскіх гульнях»

Каля 150 спартсменаў-аматараў хочуць выступіць у «даеўрапейскіх гульнях»

Трэніроўкі і здымкі ўдзельнікаў пачнуцца ў красавіку.

Грамадства

Сувораўскае вучылішча вачыма яго навучэнцаў

Сувораўскае вучылішча вачыма яго навучэнцаў

Быць сувораўцам ва ўсе часы было прэстыжна.