Вы тут

Якія энцыклапедычныя выданні з'явіліся сёлета ў Беларусі?


Гісторыя сямейных і культурных традыцый нашых продкаў, трагічныя старонкі Вялікай Айчыннай вайны, маляўнічы даведнік пра музеі краіны і ўнікальнае выданне, прысвечанае беларускім арганам... Выдавецтва «Беларуская Энцыклапедыя імя Петруся Броўкі» падвяло своеасаблівыя вынікі года і прадставіла свае галоўныя навінкі, якія ўбачылі свет у канцы 2018-га.


У прыватнасці, сёлета была завершана фундаментальная праца — трохтомнік «Янка Купала», над якім працавалі агулам больш за 1000 даследчыкаў, літаратуразнаўцаў і супрацоўнікаў выдавецтва. Акрамя таго, выйшаў з друку зборнік «Музеі Беларусі», у якім падрабязна прадстаўлены амаль 200 музейных устаноў нашай краіны — ад нацыянальных да гарадскіх і прыватных: гісторыя стварэння, выгляд звонку і знутры, змест асноўных экспазіцый, кантакты і час работы для наведвальнікаў.
У наступным годзе гэта работа прадоўжыцца і ахопіць народныя школьныя музеі, якіх у Беларусі налічваецца каля 1,5 тысячы.

Адзін з такіх кірункаў — захаванне гістарычнай памяці. Кніга «Трасцянец. Трагедыя народаў Еўропы» на рускай, беларускай і англійскай мовах працягвае серыю «Беларусь. Трагедыя і праўда памяці» пра падзеі Вялікай Айчыннай вайны (адкрыла серыю на пачатку гэтага года выданне, прысвечанае Хатыні). Пад вокладкай — гістарычныя звесткі пра вёскі і іх жыхароў, дакументы, архіўныя фотаздымкі і падрабязны расказ пра нацысцкую «фабрыку смерці», якая перамалола ў бязлітасных жорнах сотні тысяч грамадзян Савецкага Саюза, Германіі, Аўстрыі, Чэхіі і іншых краін Еўропы... У планах выдавецтва — аповед у наступных кнігах пра іншыя месцы масавага знішчэння нацыстамі мірнага насельніцтва і лагеры для ваеннапалонных: Навагрудскае і Мінскае гета, Красны Бераг, Масюкоўшчынскі лагер смерці, энцыклапедыя спаленых вёсак Беларусі...

«Пра цывілізаванасць дзяржавы можна меркаваць па розных паказчыках, у тым ліку — па колькасці энцыклапедый, якія даюць поўнае ўяўленне пра культуру, гісторыю і сучаснасць краіны», — адзначыў дырэктар музея старабеларускай культуры НАН Беларусі Барыс Лазука, прадстаўляючы шэраг культуралагічных кніжных навінак. Так, кніга акадэміка НАН Беларусі, дырэктара Цэнтра даследаванняў беларускай культуры, мовы і літаратуры Аляксандра Лакоткі «Мелодыі і летапіс эпох», дзе ў навукова-папулярнай форме расказваецца пра развіццё беларускай культуры — шляхецкай і сялянскай, гарадской і вясковай, традыцыйнай і сучаснай. А зборнік «Арганы Беларусі» без перабольшання ўнікальны, бо змяшчае ў выдатнай паліграфічнай якасці больш як 600 гадоў гісторыі і апісанне 123 арганаў, якія знаходзяцца ў храмах розных хрысціянскіх канфесій, расказвае пра тэхнічныя характарыстыкі і асаблівасці стварэння інструментаў, пра выдатных кампазітараў і выканаўцаў, а ў дадатак — дыск з арганнай музыкай.

Выклікае цікавасць і чарговая кніга доктара педагагічных навук Ірыны Калачовай «Ад добрага кораня — добры парастак», якая проста, займальна і цікава расказвае пра сямейныя традыцыі беларусаў, прыёмы і метады выхавання, а сучасным бацькам, дзецям і педагогам прапануе таксама практычную частку — тэматычныя гульні і заданні, якія дапамогуць засвоіць атрыманыя ўрокі і працягнуць традыцыі.

Нарэшце, у супрацоўніцтве з Белтэлерадыёкампаніяй выдавецтва падрыхтавала кнігу «Запальвай. Дзіцячае Еўрабачанне» — пра міжнародны конкурс, які зусім нядаўна адбыўся ў Мінску, яго ўдзельнікаў і пераможцаў, у тым ліку і юных артыстаў з нашай краіны.

«Наша задача — рабіць пашпарт краіны, суверэннай Беларусі, адлюстроўваць яе жыццё з розных бакоў», — падкрэсліў дырэктар выдавецтва «Беларуская Энцыклапедыя імя Петруся Броўкі» Уладзімір Андрыевіч, які выказаў спадзяванне, што гэтыя і іншыя выданні знойдуць сваё месца на паліцах бібліятэк і сустрэнуць зацікаўленых чытачоў.

Вікторыя ЗАХАРАВА

Выбар рэдакцыі

Грамадства

Што паглядзець у Хоцімску?

Што паглядзець у Хоцімску?

У Хоцімску нават ёсць кола агляду.

Грамадства

«За больш чым сем год былі ўсяго адны суткі без баявога выезду»

«За больш чым сем год былі ўсяго адны суткі без баявога выезду»

Гісторыя кар'еры падпалкоўніка ў адстаўцы Генадзя Цімахоўцава.

Палітыка

Беларусь і ЕС падпішуць візавае пагадненне не пазней за 2 лютага 2020 года

Беларусь і ЕС падпішуць візавае пагадненне не пазней за 2 лютага 2020 года

Верагодна, гэта адбудзецца ўжо ў гэтым лістападзе. 

Грамадства

Як праходзіў ваенна-гістарычны фестываль «Мір-1812»

Як праходзіў ваенна-гістарычны фестываль «Мір-1812»

Трэці раз ваенна-гістарычны фестываль «Мір-1812» на два дні перанёс пасёлак больш чым на два стагоддзі назад.