Вы тут

Новыя сметніцы з'явяцца на кожным беларускім падвор'і


Раз на тыдзень узімку, летам — тройчы. Прыкладна такі расклад руху смеццявозаў мяркуецца пачаць наладжваць налета ва ўсіх беларускіх населеных пунктах без выключэння. Збіраць свае адходы жыхары індывідуальных дамоў цяпер будуць не ў пакеты, а ў два 120-літровыя пластыкавыя кантэйнеры: для камунальнага смецця і другасных рэсурсаў.


Такія новаўвядзенні прадугледжаны Перспектыўнай схемай абыходжання з камунальнымі адходамі, якая вось-вось атрымае юрыдычную сілу. Пра жаданне апрабаваць новы спосаб збору смецця на вёсцы і ў сядзібнай забудове гарадоў ужо заявілі камунальныя службы некалькіх рэгіёнаў: Астравецкая ЖКГ, гомельскі «Спецкамунтранс», ЖКГ Гродзенскага раёна, Баранавіцкая гарадская ЖКГ і «Аршанская спецаўтабаза». Аператар другасных матэрыяльных рэсурсаў запланаваў набыццё кантэйнераў і смеццявозаў для іх абслугоўвання для Астравецкага раёна і гарадскога пасёлка Копысь, што на Аршаншчыне.

— Сёлета на выкананне дзяржпраграмы па абыходжанні з адходамі, укараненне новых тэхналогій іх збору і выкарыстання ў якасці другаснай сыравіны, будаўніцтва заводаў і вытворчасцяў па сартаванні і выкарыстанні камунальных адходаў і другасных матэрыяльных рэсурсаў (ДМР) выдзелена звыш 60 мільёнаў рублёў, — расказала Наталля ГРЫНЦЭВІЧ, дырэктар дзяржаўнай установы «Аператар другасных матэрыяльных рэсурсаў». — Гэтая сума разлічана таксама на ўдасканаленне матэрыяльна-тэхнічнай базы арганізацый, якія збіраюць і выкарыстоўваюць другасныя рэсурсы. Забеспячэнне кантэйнерамі для раздзельнага збору смецця сектара індывідуальнай забудовы — гэта адзін з новых падыходаў да збору адходаў у невялікіх гарадах і на вёсцы.

Падлічыць, колькі ўсяго спатрэбіцца грошай на закупку кантэйнераў і смеццявозаў, не бяруцца пакуль ні Аператар другасных матэрыяльных рэсурсаў, ні Міністэрства жыллёва-камунальнай гаспадаркі Беларусі. Адзінае, што вядома дакладна: кожная новая 120-літровая сметніца для падворкаў сёння абыходзіцца ў 57 рублёў, а людзі атрымаюць іх бясплатна. Кантэйнеры будуць пластыкавымі, з накрыўкай і на калёсах. Чорны — для змешаных камунальных адходаў, каляровы — для другаснай сыравіны. У апошні трэба класці шкло, паперу, пластык, цэлафан і ўсё, што вартае перапрацоўкі. Такі змешаны, але асобны збор усё роўна значна палягчае далейшае сартаванне і павышае працэнт вымання карысных адходаў з агульнага складу камунальнага смецця.

Акрамя таго, пяройдуць на выкарыстанне смеццявозаў з задняй загрузкай адходаў. Гэта ўніфікуе закупкі, а таксама рамонт і абслугоўванне транспарту. Плюс лягчэй будзе пад'ехаць да сметнікаў. Кантэйнеры, як мяркуюць спецыялісты, людзі будуць трымаць на падворку, а ў дні прыезду смеццявоза выкочваць іх на вуліцу.

Запланаваны крок у ЖКГ разглядаюць перш за ўсё з экалагічнага і сацыяльнага бакоў. Эканамічныя складнікі адыходзяць на другі план. Нават калі ў вёсцы жыве адзін чалавек, па яго смецце будуць прыязджаць, а павышаць аплату за вываз падчас рэалізацыі новай схемы не збіраюцца, расказалі ў міністэрстве.

— Удасканальванне парадку збору і выдалення камунальных адходаў павінна прадухіліць забруджванне смеццем асяроддзя і зрабіць раздзельны збор ДМР даступным для кожнага чалавека, дзе б ён ні жыў. Неабходна забяспечваць збор усіх відаў камунальнага смецця, уключаючы адходы жыццядзейнасці насельніцтва. Гэта і рэшткі ежы, і смецце з двара, абрэзкі дрэў, зелле з агарода, буйнагабарытнае смецце, электратэхніка, не павінна быць выключэнняў, — мяркуе Алег ГРУЗІНАЎ, начальнік аддзела водаправодна-каналізацыйнай гаспадаркі і добраўпарадкавання Міністэрства ЖКГ. — Да таго ж гэта наступная прыступка ў развіцці менталітэту нашых грамадзян у разуменні сваёй адказнасці за тое, што мы пакінем пасля сябе. Гэта прызвычайванне да думкі, што сартаванне смецця, недапушчэнне выкідвання яго ў лесе, паабапал дарог, каля вёсак — задача кожнага чалавека.

Ірына СІДАРОК

Загаловак у газеце: Адходы з хаты, двара і агарода

Выбар рэдакцыі

Эканоміка

Петришенко: Называть ЕАЭС экономическим союзом сегодня можно только авансом

Петришенко: Называть ЕАЭС экономическим союзом сегодня можно только авансом

Однако наша страна надеется, что это временные трудности.

Грамадства

Апублікаваны поўны тэкст Канцэпцыі інфармацыйнай бяспекі Беларусі

Апублікаваны поўны тэкст Канцэпцыі інфармацыйнай бяспекі Беларусі

Дзяржаўным органам і іншым арганізацыям даручана кіравацца палажэннямі канцэпцыі ў практычнай дзейнасці.

Калейдаскоп

Каля 150 спартсменаў-аматараў хочуць выступіць у «даеўрапейскіх гульнях»

Каля 150 спартсменаў-аматараў хочуць выступіць у «даеўрапейскіх гульнях»

Трэніроўкі і здымкі ўдзельнікаў пачнуцца ў красавіку.

Грамадства

Сувораўскае вучылішча вачыма яго навучэнцаў

Сувораўскае вучылішча вачыма яго навучэнцаў

Быць сувораўцам ва ўсе часы было прэстыжна.