Вы тут

Замежнікам могуць дазволіць прылятаць па бязвізе праз Брэст і Гродна


Замежнікам могуць дазволіць прылятаць у нашу краіну па бязвізе праз аэрапорты Брэста і Гродна.

Таксама магчыма аб'яднанне бязвізавых зон Брэсцкага і Гродзенскага рэгіёнаў. Пра гэта ішла размова ў Палаце прадстаўнікоў на круглым стале: «Беларускі турызм: тэндэнцыі і перспектывы».


Абмеркаванне арганізавала Пастаянная камісія па ахове здароўя, фізічнай культуры, сямейнай і маладзёжнай палітыцы. За круглым сталом сабраліся парламентарыі, прадстаўнікі міністэрства спорту і турызму, выканаўчых органаў улады, дзелавых колаў, навуковай суполкі і грамадскіх арганізацый.

Старшыня Пастаяннай камісіі Людміла Макарына-Кібак адной з мэт сустрэчы назвала вызначэнне праблемных пытанняў у турыстычнай сферы, якія патрабуюць дадатковага прававога рэгулявання. «Гэта асабліва актуальна зараз у сувязі з мяркуемай карэкціроўкай закона Рэспублікі Беларусь «Аб турызме», — сказала яна.

Штуршком для больш актыўнага абмеркавання праблем у турыстычнай сферы стала і сітуацыя, якая здарылася ў сёлетні сезон з расійскай кампаніяй «Наталі Турс». У Беларусі прадалі каля 400 тураў, якія былі ануляваныя ў сувязі з неплацежаздольнасцю кампаніі. Профільныя міністэрствы Расіі і Беларусі працуюць над тым, каб вярнуць сродкі людзям, паведаміў на круглым стале намеснік міністра спорту і турызму Міхаіл Партной, аднак гэта складаны працэс.

Банкруцтва «Наталі Турс» стала нагодай для досыць гарачага абмеркавання пытанняў страхоўкі ад падобных абставін. Ці абавязваць страхаваць рызыку ўзаемаадносін турагента і тураператара з пастаўшчыкамі турыстычных паслуг (перавозка, размяшчэнне, харчаванне, экскурсіі і інш.)? Хто будзе несці расходы па страхаванні: турыст ці турыстычнае агенцтва? У гэтай сувязі ўзнікае неабходнасць размежавання адказнасці турагентаў і тураператараў. Турагенты прадаюць туры, якія ствараюць тураператары.

— Тураператар павінен мець магчымасць адказаць па сваіх абавязацельствах, турагент павінен быць кампетэнтны, турыст — абаронены, а нацыянальныя інтарэсы — размежаваны з замежнымі. Гэта асноўныя прынцыпы, якія павінны быць замацаваны ў заканадаўстве, — лічыць старшыня праўлення Рэспубліканскага саюза турыстычнай індустрыі Філіп ГУЛЫ.

Аднак не менш важная тэма для Беларусі — уязны турызм, асабліва напярэдадні ІІ Еўрапейскіх гульняў. Ды і самы час падрыхтавацца да новага турыстычнага сезона.

Пакуль уязны турызм у нас развіты недастаткова, паведаміў Міхаіл Партной. «У сусветным рэйтынгу краіна займае 96-е месца па развіцці турыстычнага бізнесу сярод 186, — сказаў ён. — У асноўным да нас прыязджаюць з краін Балтыі, Расіі і Польшчы».

Па звестках Дзяржпагранкамітэта, за 9 месяцаў 2018 года ў Беларусі пабывала больш за 3,6 мільёна замежнікаў, гэта амаль на паўмільёна больш, чым за ўвесь мінулы год. Сярэдняя працягласць знаходжання арганізаваных турыстаў у краіне — каля чатырох дзён. Экспарт турыстычных паслуг за студзень — верасень сёлета склаў каля 171 мільёна долараў.

— Амаль 179 тысяч чалавек наведалі нашу краіну па бязвізавым рэжыме праз Нацыянальны аэрапорт Мінск, — дадаў Міхаіл Партной. — Бязвізавы рэжым робіць нашу краіну больш прывабнай для замежнікаў.

У Міністэрстве замежных спраў згодныя з такой высновай і спадзяюцца, што на працягу 2018—2019 гадоў будуць унесены змяненні ва Указ № 8 «Аб устанаўленні бязвізавага парадку ўезду і выезду замежных грамадзян», якія дазволяць іншаземцам прылятаць у Беларусь па бязвізе праз аэрапорты Брэста і Гродна, а таксама праз Расію. Аб гэтым паведаміў намеснік начальніка галоўнага консульскага ўпраўлення, начальнік упраўлення аналізу, планавання візавай і тарыфнай палітыкі Міністэрства замежных спраў Алякандр ГАНЕВІЧ.

Што датычыцца дазволу на ўезд па 30-дзённым бязвізе праз усе пункты пропуску, то да гэтага пытання магчыма вярнуцца толькі пасля таго, як запрацуе пагадненне па ўзаемным прызнанні віз з Расіяй. На сённяшні дзень парадак бязвізавага руху праз аэрапорт не распаўсюджваецца на іншаземцаў, якія прылятаюць у Беларусь авіярэйсамі з Расіі, а таксама на замежнікаў, якія плануюць вылецець з Беларусі ў расійскія аэрапорты. Бо гэтыя рэйсы лічацца ўнутранымі і пагранічны кантроль на іх не распаўсюджваецца.

— Праблема ў магчымасцях нашага Нацыянальнага аэрапорта, — растлумачыў Аляксандр Ганевіч. — Неабходна арганізаваць пункты пагранкантролю ў сектары, які працуе менавіта з рэйсамі з Расіі. Тады іншаземцы, якія знаходзяцца ў Расіі, змогуць да нас прылятаць і адлятаць па бязвізе абсалютна ў прававым полі.

На круглым стале таксама прапанавалі аб'яднаць бязвізавыя зоны Брэсцкага і Гродзенскага рэгіёнаў. Тады турысты, якія прыехалі ў Гродна без візы, працягнуць свае падарожжа без перашкод і ў Брэст, і наадварот. А пакуль такой магчымасці няма.

Апроч іншага, у Палаце прадстаўнікоў узнімаліся праблемы даступнасці беларускіх гасцініц (кошт якіх часта нятанны пры даволі сціплых умовах пражывання), няветлівасці работнікаў турыстычнай сферы і недастаткова развітой турыстычнай інфраструктуры.

У сферы турызму і сапраўды ёсць над чым працаваць па ўсіх кірунках, але па-ранейшаму для дзяржавы прыярытэтным застаецца развіццё ўязнога і ўнутранага турызму, бо гэта тыя кірункі, якія прыносяць краіне грошы, рэзюмавалі ўдзельнікі круглага стала.

Наталля ТАЛІВІНСКАЯ

Загаловак у газеце: Беларусь запрашае!

Выбар рэдакцыі

Грамадства

Уладзімір Каранік: «На ШВЛ вакцынаваных няма»

Уладзімір Каранік: «На ШВЛ вакцынаваных няма»

Медыкі і губернатар Гродзенскай вобласці адказалі на пытанні па прышчэпках

Грамадства

Як партызаны за адну ноч знішчылі нямецкі гарнізон

Як партызаны за адну ноч знішчылі нямецкі гарнізон

22 чэрвеня 1943 года партызаны атрада «Бальшавік» здзейснілі нападзенне на фашысцкі гарнізон у былым саўгасе «Косіна».

Эканоміка

Хто выбраў год таму айчынную валюту, аказаўся ў выйгрышы. Куды ўкласці грошы зараз, каб атрымаць выгаду

Хто выбраў год таму айчынную валюту, аказаўся ў выйгрышы. Куды ўкласці грошы зараз, каб атрымаць выгаду

Знаёмства маладых людзей з першымі грашыма адбываецца дзіўным чынам.