Учора першы намеснік прэм'ер-міністра Аляксандр ТУРЧЫН наведаў навагодняе свята ў дзіцячым доме сямейнага тыпу ў Лагойску, у якім выхоўваюцца дзесяць дзяцей. «У кожнага дзіцяці напярэдадні Новага года павінна быць адчуванне свята, і акцыя «Нашы дзеці» — магчымасць выканаць дзіцячыя мары», — такое меркаванне выказаў ён журналістам.
Госці пастараліся дагадзіць з падарункамі, і пра тое, што навагоднія жаданні здзейсніліся, казалі шчаслівыя твары і ўсмешкі. Дзяўчаткі атрымалі казачны домік, лялькі і тэлефоны, хлопцы — чыгунку, веласіпед і канструктар, паведамляе БелТА.
Аляксандр Турчын таксама павіншаваў дзяцей ад імя Савета па развіцці прадпрымальніцтва і адзначыў, што акцыю «Нашы дзеці» актыўна падтрымалі і беларускія бізнесмены.
«Мы ведалі, што хочуць рабяты, і пастараліся іх жаданні выканаць. Думаю, атрымалася. Такія мерапрыемствы даюць станоўчыя эмоцыі, ты можаш часцінку цеплыні і дабра падарыць малым», — дадаў ён.
Да гэтага Аляксандр Турчын наведаў школьныя навагоднія святы ў гарадскім пасёлку Балбасава пад Оршай. Разам з кіраўніцтвам Парка высокіх тэхналогій ён уручыў дзецям 600 планшэтаў.
Як паведамілі ў прэс-службе ПВТ, планшэты валодаюць тэхналогіяй камп'ютарнага зроку. Гэта рэвалюцыйная тэхналогія распрацавана спецыялістамі кампаніі Віктара Пракапені. Рэзідэнты ПВТ Facemetrіcs і Playgendary ўкараняюць унікальныя ва ўсім свеце інструменты для навучання: праграма кантралюе час працы на планшэце з дапамогай кам'ютарнага зроку. На прыкладзе ўсталявана спецыяльная праграма Nіcola, якая сочыць за выкананнем хатніх заданняў. Спецыяльная камера аналізуе рухі вачэй карыстальніка, і калі малы захоча пагуляць у гульні на планшэце, то спачатку яму прыйдзецца выканаць хатняе заданне. Такім чынам кампаніі хочуць матываваць дзяцей да вывучэння розных прадметаў з маленства: ад чытання да матэматыкі. Плануецца супрацоўніцтва з вядучымі выдавецтвамі кніг. Праект разлічаны на дзяцей ва ўзросце ад шасці да дванаццаці гадоў.
— За гэты год, які прысвечаны малой радзіме, нямала зроблена ў развіцці кожнага рэгіёна, — адзначыў першы віцэ-прэм'ер. — ІT-сфера і наш Парк высокіх тэхналогій, які рэгіструе рэзідэнтаў па ўсёй Беларусі, а значыць, ІТ-тэхналогіі ўпэўнена крочаць па ўсіх рэгіёнах краіны.
«У сваю чаргу кіраўніцтва Беларусі зробіць усё магчымае, каб па ўсёй краіне дзеці раслі і вучыліся ў роўных умовах», — дадаў Аляксандр Турчын.
Наталля ТАЛІВІНСКАЯ
Канцэрт для дзяцей і моладзі, пластычны спектакль Ягора Дружыніна і «Рок-панарама».
Выбар саджанца для садавода — той момант, значнасць якога складана пераацаніць.
Актрыса НАДТ імя М. Горкага — пра шлях да сцэны і натхненне.
Тата і мама — два самыя важныя чалавекі ў жыцці кожнага дзіцяці.