Паэзія дыялогу

Для супрацоўніцтва інтэлігентных асоб у гуманітарнай сферы няма межаў. Гэта засведчыла V канферэнцыя міжнароднага праекта «Мінская ініцыятыва», арганізаваная Міждзяржаўным фондам гуманітарнага супрацоўніцтва дзяржаў — удзельніц СНД, Украінскім фондам культуры і Нацыянальнай акадэміяй навук Беларусі. Тэмай для абмеркавання стала спадчына Барыса Алейніка, украінскага паэта, якога не стала ў 2017 годзе.

Пакінуў ён не толькі творчую спадчыну, якая звярнула на сябе ўвагу яшчэ за савецкім часам (ён лаўрэат Дзяржаўнай прэміі СССР). Барыс Алейнік быў актыўным грамадскім дзеячам, чалавекам неабыякавым, з актыўнай жыццёвай пазіцыяй, з’яўляўся старшынёй Украінскага фонду культуры, быў кіраўніком парламенцкай дэлегацыі Вярхоўнай Рады Украіны ў Парламенцкай Асамблеі Савета Еўропы. Таму на гэтым тыдні расійскія і ўкраінскія навукоўцы сустрэліся ў Мінску, каб успомніць творцу ў кантэксце міжкультурнага дыялогу, які вельмі патрэбны сёння.

Аднак ХХ стагоддзе пакінула памяць пра творцаў, якія пазначалі свой час праз вобразы ў розных кірунках мастацтва. Пра гэта сведчыць неардынарная выстаўка «Жывапіс іголкай. Мастакі авангарда і вышыўка», што адкрылася ў галерэі «Універсітэт культуры». Злучыць дзве, здавалася б, розныя плыні праз адну экспазіцыю дазваляе сучаснае імкненне да пераасэнсавання спадчыны мінулага. Але ёсць сучаснасць, якая мае свае вобразы і асоб, здольных іх перадаваць праз розныя мовы. Для гэтага існуе мастацкі пераклад, і перакладчыкі трох краін абмеркавалі варыянты супрацоўніцтва падчас семінара. І тут асоба Барыса Алейніка стала яднальнай: у Мінску прадставілі пераклады яго твораў. Прэзентацыя III Міжнароднага альманаха «TerraPoetica» адбылася дзеля таго, каб заахвоціць сучасных літаратараў да супрацоўніцтва.

Ларыса ЦІМОШЫК