Вы тут

Макей: трэба неадкладна заняцца вырашэннем канфлікту ва Украіне


Неабходна неадкладна заняцца вырашэннем канфлікту ва Украіне, заявіў міністр замежных спраў Беларусі Уладзімір Макей 19 снежня ў інтэрв'ю японскай тэлерадыёкампаніі NHK, паведамляе сайт беларускага знешнепалітычнага ведамства.


— Мы лічым, што ўкраінскі канфлікт з'яўляецца сёння галоўнай пагрозай еўрапейскай рэгіянальнай бяспекі. Трэба неадкладна заняцца яго вырашэннем, - сказаў Уладзімір Макей. - Мы стараемся згуляць сваю ролю, не навязваючы ў пасярэднікі, як кажа кіраўнік беларускай дзяржавы, але мы стараемся прыкласці максімум намаганняў па вырашэнні гэтага канфлікту.

Дзякуючы сустрэчы ў "нармандскім фармаце", якая прайшла ў Мінску ў лютым 2015 года, было спынена актыўнае ўзброенае супрацьстаянне на ўсходзе Украіны. Беларусь забяспечвае рэгулярнае правядзенне трохбаковай кантактнай групы АБСЕ. Пасяджэння гэтай групы праходзяць два разы на месяц у Мінску.

— Мы праводзім рэгулярныя кантакты, у тым ліку на вышэйшым узроўні, з абодвума бакамі, спрабуючы пераканаць іх знаходзіць пункты судакранання, кропкі збліжэння, для таго каб спыніць гэта ўзброенае супрацьстаянне і забяспечыць мір і стабільнасць на ўсходзе Украіны, - дадаў міністр.

Прэзідэнт Беларусі ў свой час высунуў некалькі ініцыятыў, яшчэ ў 2014 годзе прапанаваў свае паслугі па большай уцягнутасці Беларусі ў вырашэнне гэтай спрэчкі. У прыватнасці, ён прапанаваў накіраваць узброены міратворчы кантынгент Беларусі. Зразумела, што з прыцягненнем іншых дзяржаў, каб забяспечыць кантроль на расійска-ўкраінскай мяжы і на лініі супрацьстаяння паміж усходам і астатняй часткай тэрыторыі Украіны.

Паводле слоў Уладзіміра Макея, Беларусь кроўна зацікаўлена ў тым, каб усе бакі праявілі шчырую зацікаўленасць у вырашэнні і ўрэгуляванні гэтага канфлікту. Нікому не трэба тут імкнуцца атрымаць нейкія палітычныя ці іншыя дывідэнды - ні да чаго добрага гэта не прывядзе, упэўнены ён.

— З улікам таго, што наша эканоміка адкрытая (мы прадаем 60-70% тавараў, якія вырабляем у Беларусі), мы вельмі залежым ад знешніх рынкаў. Таму мы хацелі б, каб у нашым рэгіёне і іншых рэгіёнах былі спакой, мір і стабільнасць, што дазволіла б нам эфектыўна гандляваць і працаваць на гэтых рынках. Таму філасофія нашай знешняй палітыкі заключаецца ў тым, каб сыходзіць ад гэтай сённяшняй канфрантацыі, - адзначыў міністр.

Паводле яго слоў, менавіта таму Прэзідэнт Беларусі яшчэ ў 2017 годзе высунуў ідэю так званага ўсёабдымнага дыялогу, які быў бы накіраваны на тое, каб усе канфліктуючыя бакі селі за стол перамоваў і замест таго, каб высвятляць адносіны на поле бою, за сталом перамоў пачалі б размову пра тое, як нам супрацьстаяць больш актуальным глабальным выклікам і пагрозам, якія мы назіраем сёння. Гэта і тэрарызм, і кібертэрарызм, і гандаль людзьмі, і міжнародная злачыннасць, і многае іншае. Мы лічым, што толькі праз дыялог, праз аб'яднальны, а не раздзяляльны міжнародны парадак дня мы можам дамагчыся міру, спакою ў нашым рэгіёне, а таксама ў глабальным кантэксце.

У інтэрв'ю таксама былі закрануты пытанні беларуска-расійскага ўзаемадзеяння. Уладзімір Макей адзначыў, што Беларусь і Расія маюць цесныя адносіны ва ўсіх сферах і галінах.

— Мы з'яўляемся саюзнікамі, якія супрацоўнічаюць і ў ваеннай сферы, і ў палітычнай, і ў гандлёва-эканамічнай, і ў гуманітарнай. У рамках Саюзнай дзяржавы, якая існуе з 1999 года, мы дасягнулі вельмі шмат, - сказаў ён. - Я лічу, што галоўным дасягненнем з'яўляецца забеспячэнне роўных правоў для грамадзян Беларусі і Расіі. Сёння грамадзяне Беларусі не адчуваюць сябе чужымі ў Расіі і, адпаведна, расіяне - у нашай краіне. Яны могуць спакойна вучыцца, працаваць, набываць нерухомасць, атрымліваць медыцынскую дапамогу і г.д. таму можна сапраўды казаць аб брацкіх адносінах паміж Беларуссю і Расіяй

Але гэта, на жаль, не азначае, што паміж дружалюбнымі дзяржавамі не могуць узнікаць спрэчкі і рознагалоссі, дадаў міністр. На вялікі жаль, часам у адносінах з'яўляюцца моманты, звязаныя, па яго словах, з павярхоўнай, штучнай бухгалтэрыяй, калі падлічваецца, хто і колькі паклаў на шалі ў той ці іншай сферы супрацоўніцтва і хто каму павінен.

— Мы зыходзім з таго, што мы - брацкія, дружалюбныя дзяржавы i, працуючы ў рамках і Саюзнай дзяржавы, і Еўразійскага эканамічнага саюза, павінны імкнуцца да стварэння ў ЕАЭС адзінай эканамічнай прасторы, якая дазволіла б забяспечыць свабоднае перамяшчэнне тавараў, паслуг, капіталу і працоўнай сілы, - сказаў Уладзімір Макей.

— Але не трэба разглядаць гэтыя рэчы як трагічныя. Мы знаходзімся ў пастаянным дыялогу, і жыццё паказвае, што мы заўсёды вырашалі гэтыя пытанні ў рамках адкрытага, шчырага дыялогу з нашымі расійскімі сябрамі. Мы маем намер працягваць курс на далейшае паглыбленне і развіццё адносін з Расійскай Федэрацыяй. У любым выпадку бакі заўсёды будуць ўзаемавыгадна вырашаць праблемныя пытанні, якія часам узнікаюць, - упэўнены кіраўнік беларускага знешнепалітычнага ведамства. Расія і Беларусь з'яўляюцца адзін для аднаго галоўнымі гандлёва-эканамічнымі партнёрамі.

У той жа час Уладзімір Макей падкрэсліў, што Беларусь, як любая незалежная дзяржава, імкнецца праводзіць і праводзіць знешнюю палітыку, гандлёва-эканамічную палітыку зыходзячы з уласных нацыянальных інтарэсаў.

— Мы зыходзім у нашай палітыцы з таго, што неабходна нашай краіне, што важна для нашага народа, - сказаў ён. - Беларусь як незалежная, суверэнная дзяржава заўсёды імкнулася праводзіць і будзе праводзіць абсалютна незалежную знешнюю палітыку, якая накіравана на карысць народа.

Спыталі ў міністра і пра беларуска-японскія адносіны.

— Японія ўяўляе для нас найвелізарную цікавасць. Так, у нас развіваецца ў пэўнай меры гандлёва-эканамічнае ўзаемадзеянне - дзесьці каля $120 млн таваразварот за дзесяць месяцаў гэтага года, але мы лічым, што наш патэнцыял далёка не выкарыстаны. Мы зацікаўлены ў больш цесных кантактах паміж бізнесам Беларусі і Японіі, - сказаў Уладзімір Макей. - мы ўсе ведаем, якая моцная Японія ў аўтамабілебудаванні, вытворчасці бытавой тэхнікі, у сферы высокіх тэхналогій. Таму мы зацікаўленыя ў тым, каб нашы адносіны развіваліся больш актыўна і глыбока. Мы гатовыя даць максімальныя прэферэнцыі для японскага бізнесу ў выпадку яго рашэння прыйсці ў Беларусь.

Трэба таксама падумаць над актывізацыяй палітычнага дыялогу, у тым ліку на вышэйшым узроўні, над чым цяпер і вядзецца праца, дадаў міністр.

У пачатку гэтага года Беларусь прыняла рашэнне даць японцам права ўязджаць без візы і знаходзіцца на тэрыторыі краіны на працягу 30 дзён. Японія ўваходзіць у лік каля 80 краін, якія былі ўключаныя ў спіс бязвізавага ўезду на 30 дзён у мэтах турызму, бізнесу, гуманітарнага ўзаемадзеяння і г.д.

— Мы сёння вельмі шчыльна ўзаемадзейнічаем па пытаннях пераадолення негатыўных наступстваў атамных катастроф. Мы ўдзячныя японцам за тое, што з дапамогай адпаведных праграм мы рэалізавалі амаль 40 сацыяльных праектаў па чарнобыльскай праблематыцы. У сваю чаргу мы падалі Японіі пэўную матэрыяльную дапамогу пасля аварыі на Фукусіме. Мы штогод прымаем парадку 130-150 японскіх дзяцей на аздараўленне, летам яны адпачываюць у нашым піянерскім лагеры "Зубронак", - дадаў Уладзімір Макей.

У інтэрв'ю была закранутая тэма і ўзаемадзеяння Беларусі з Кітаем. Для развіцця супрацоўніцтва з гэтай краінай трэба пераходзіць ад простага гандлю да прамога крэдытна-інвестыцыйнага супрацоўніцтва, упэўнены кіраўнік беларускага знешнепалітычнага ведамства.

— Мы цяпер працуем вельмі шчыльна над рэалізацыяй падобнага роду праектаў як у нашай краіне, так і ў Кітаі. Адна з галоўных задач складаецца таксама ў тым, каб умацоўваць міжрэгіянальнае супрацоўніцтва, - сказаў ён. - Наша краіна - невялікая, дзесяць мільёнаў - гэта маленькая вёсачка ў Кітаі, скажам так, калі параўноўваць па маштабах. Таму мы вельмі актыўна цяпер працуем з рэгіёнамі гэтай краіны, трэба сказаць, вельмі і вельмі паспяхова. зараз назіраецца сур'ёзны рост нашага экспарту ў Кітай, у першую чаргу сельскагаспадарчай прадукцыі.

Фота БЕЛТА

Выбар рэдакцыі

Грамадства

Успаміны былой вязніцы пра Саласпілскі лагер смерці

Успаміны былой вязніцы пра Саласпілскі лагер смерці

Яна добра памятае той летні дзень. За акном сталі чутныя роў матацыклаў і нямецкая гаворка.

Грамадства

Першыя беларускія Соdе Сlub далучыліся да сусветнага руху

Першыя беларускія Соdе Сlub далучыліся да сусветнага руху

Як з дапамогай кода стварыць уласную анімацыю і «ажывіць» касмічны карабель? 

Грамадства

Як Віцебшчына развівае стасункі з Кітаем

Як Віцебшчына развівае стасункі з Кітаем

Наш карэспандэнт пастараўся згадаць самыя цікавыя прыклады сумеснай рэалізацыі праектаў.

Спорт

Анастасія Мірончык-Іванова: «Веру ў сябе і ў свае сілы»

Анастасія Мірончык-Іванова: «Веру ў сябе і ў свае сілы»

У спорце ёй двойчы прыходзілася пачынаць усё спачатку.