Вы тут

Што вабіць магілёўскіх юнакоў і дзяўчат у маладзёжны парламент?


Тут усё па-сур'ёзнаму, нягледзячы на тое, што гэтыя дэпутаты, па сутнасці, яшчэ дзеці. Але для актыўных і крэатыўных маладзёжны парламент — добрая пляцоўка для таго, каб паспрабаваць нешта рэальна змяніць. Плюс новы вопыт, карысныя веды і вельмі добры шанц заявіць пра сябе.


Маладзёжны парламент пры гарадскім Савеце дэпутатаў існуе ў Магілёве ўжо пяты год, летась прайшлі трэція выбары ў яго склад. У адрозненне ад «дарослага» парламента, тэрмін дэпутацкай дзейнасці тут абмяжоўваецца двума гадамі. У выбарах задзейнічаны школьнікі, пачынаючы з 9 класа, а таксама навучэнцы і студэнты ВНУ да трэцяга курса. Гэтым разам з болей чым 200 прэтэндэнтаў абрана 64 чалавекі. Большую актыўнасць на выбарах праявілі дзяўчаты — іх у маладзёжным парламенце трэцяга склікання аж 44.

Першая сесія адбылася якраз напярэдадні Новага года. На ёй быў зацверджаны склад парламента, план работы, спіс камісій, асноўныя кірункі дзейнасці.

— Плануем больш актыўна займацца сацыяльнымі праектамі і заканатворчай дзейнасцю, — удакладніў старшыня маладзёжнага парламента Яраслаў Грыгор'еў.
Зараз ён студэнт другога курса Беларускага інстытута правазнаўства, але яго дэпутацкі стаж «адлічваецца» яшчэ са школы. Прызнаецца, што грамадская работа зацвердзіла яго ў жаданні стаць юрыстам.

Падтрымаць маладых калег прыйшлі дэпутаты Палаты прадстаўнікоў Нацыянальнага сходу Рэспублікі Беларусь Ігар Марзалюк і Вольга Петрашова.

Яраслаў Грыгор'еў прызнаецца, што ў парламент прыйшоў з цікавасці. Хацелася паспрабаваць сябе ў новай ролі. Сёння маладыя парламентарыі адны з галоўных удзельнікаў розных сацыяльных праектаў.

— Нядаўна ў Магілёве праходзіў тэлемарафон добрых спраў, мы таксама далучыліся, — прыводзіць прыклад Яраслаў. — Сабралі вялікую скрыню падарункаў — цацкі, канцылярскія прылады, развівальныя гульні. Падчас марафону хадзілі ў якасці валанцёраў у анкалагічнае аддзяленне абласной бальніцы, рабілі невялічкія прадстаўленні. З дэпутатамі гарадскога і абласнога Саветаў дэпутатаў наведвалі сацыяльныя ўстановы.

Для маладых людзей парламент гэта яшчэ і добрая адукацыйная пляцоўка.

— Мне цікава, як адбываецца кіраванне горадам, як фарміруецца той жа бюджэт, — кажа Яраслаў. — У нас ёсць магчымасць убачыць, дзе наша дапамога больш за ўсё патрэбна. Калі мы чуем, што на нешта не хапае грошай, пачынаем шукаць варыянты, дзе іх знайсці — еўрапейскія праграмы, гранты, нешта іншае. Усё гэта абмяркоўваем з дэпутатамі гарсавета. Калі ва ўсім гэтым варышся, з'яўляецца азарт і жаданне рабіць нешта карыснае.

Маладым парламентарыям лягчэй данесці да шырокай грамадскасці тыя праблемы, якія існуюць у іх асяроддзі.

— Падымалі, напрыклад, пытанне па інклюзіўнай адукацыі, — кажа Яраслаў. — У нашым парламенце ёсць прадстаўнікі «асаблівай» моладзі, якія агучваюць праблемы маладых людзей з абмежаванымі магчымасцямі. Пра гэта мы размаўлялі з дэпутатамі Нацыянальнага сходу, абмяркоўвалі з імі, чаго не хапае і што для гэтага трэба зрабіць. І вельмі добра нас тут падтрымлівае дэпутат Вольга Петрашова.

У найбліжэйшых планах магілёўскага маладзёжнага парламента ўвесці ў курс справы навічкоў і разам з гарсаветам працаваць над сумеснымі праектамі.

— Ці цяжка быць старшынёй маладзёжнага парламента? Чым прыходзіцца ахвяраваць? — пытаюся ў суразмоўніка.

— Асабістага жыцця сапраўды няма, — усміхаецца Яраслаў. — Раней я яшчэ і спортам займаўся. Але пачаліся праблемы са здароўем. Зараз цалкам прысвяціў сябе вучобе і грамадскай дзейнасці. Пакуль усё атрымліваецца.


Андрэй Кіблоў, старшыня Магілёўскага гарсавета дэпутатаў:

— Асноўная мэта маладзёжнага парламента — гэта навучанне юнакоў і дзяўчат прынцыпам мясцовага самакіравання ў горадзе, падрыхтоўка будучых дэпутатаў і кіраўнікоў. Мы вітаем развіццё лідарскіх якасцяў, генерацыю ідэй на паляпшэнне жыццядзейнасці ў горадзе. Нам важна, каб маладыя людзі самастойна прымалі рашэнні. Моладзь праяўляе цікавасць да сацыяльных праблем, удзельнічае ў валанцёрскім руху, падтрымлівае ідэі інклюзіўнай адукацыі.

Дэпутацкая дзейнасць своеасаблівая, часта не хапае ведаў нават звычайным дэпутатам. Наш гарсавет падчас апошніх выбараў абнавіўся на 40 %. Я сам навічок у гэтай дзейнасці, і мне таксама прыйшлося чамусьці вучыцца. Усе павінны ведаць асновы дзейнасці дэпутата — нарматыўную базу, умець складаць планы работ, даваць справаздачу выбаршчыкам, правільна рабіць дэпутацкія запыты і звароты і гэтак далей. Таму мы вырашылі зрабіць школу дэпутата.

Нэлі ЗІГУЛЯ

Загаловак у газеце: Усё па-даросламу

Выбар рэдакцыі

Грамадства

Аповед жанчыны, якая здолела вярнуць дачку з сацыяльнага прытулку

Аповед жанчыны, якая здолела вярнуць дачку з сацыяльнага прытулку

Жанчыну, якая здолела не толькі вярнуць дзіця з прытулку, але і далей выхоўвае яго, знайсці аказалася не проста. 

Грамадства

Чаму зараз варта далей трымацца ад вадаёмаў?

Чаму зараз варта далей трымацца ад вадаёмаў?

Люты больш нагадвае пазачарговы вясновы месяц.

Грамадства

Капыльскі раён. Мінулы год можна назваць стабільным

Капыльскі раён. Мінулы год можна назваць стабільным

Чым Капыльскі раён жыве сёння і якія планы на перспектыву?

Грамадства

Якую літаратуру здаюць у букіністычныя крамы?

Якую літаратуру здаюць у букіністычныя крамы?

Калі звычайныя кнігарні працуюць па формуле «кніга — чалавек», то букіністычныя трымаюцца на прынцыпе «людзі — кнігі — людзі».